വന്നല്ലോ നമ്മുടെ അനഘ, അനഘ എന്ന മിടുക്കിയെ ആദ്യം കണ്ടപ്പോള്‍ നടന്‍ സുരേഷ് ഗോപിയുടെ പ്രതികരണം ഇങ്ങനെയായിരുന്നു. പ്ലസ് വണ്‍ വിദ്യാര്‍ഥിനിയായ അനഘയുടെ ആഗ്രഹങ്ങളില്‍ ഒന്നായിരുന്നു സുരേഷ് ഗോപിയെ നേരിട്ട് ഒന്ന് കാണുക എന്നത്. 

സ്‌പെഷല്‍ സ്‌കൂള്‍ കലോത്സവത്തില്‍ മോഹിനിയാട്ടത്തില്‍ ഒന്നാം സ്ഥാനം നേടിയ താരമാണ് അനഘ. ഇഷ്ടതാരമായ സുരേഷ് ഗോപി വരുന്നുണ്ടെന്നു പറഞ്ഞാണ് അനഘയെ വീട്ടുകാരും സംഘാടകരും മത്സരവേദിയിലെത്തിച്ചത്. മത്സരം കഴിഞ്ഞതോടെ സദസിലെത്തിയ അനഘ, സൂപ്പര്‍താരം എവിടെയെന്നു ചോദിച്ചു. അന്ന് അദ്ദേഹം എത്തിയിരുന്നില്ല. അത് അനഘയെ ഒരുപാട് വിഷമത്തിലാക്കി.

ഇക്കാര്യം അടുത്ത ദിവസങ്ങളില്‍ പത്രങ്ങളില്‍ വാര്‍ത്തയായി വരികയും ചെയ്തിരുന്നു. വാര്‍ത്ത വായിച്ച സുരേഷ് ഗോപി, തൃശൂരിലോ ഗുരുവായൂരിലോ എത്തുമ്‌ബോള്‍ അനഘയെ കാണാമെന്ന് ദീപികയുടെ തിരുവനന്തപുരം ലേഖകനെ അറിയിച്ചിരുന്നു. ഇന്നലെ ജ്യോതി എന്‍ജിനിയറിംഗ് കോളജിന്റെ ക്രിസ്റ്റല്‍ ജൂബിലി സമ്മേളനത്തിനായി ലുലു കണ്‍വന്‍ഷന്‍ സെന്ററില്‍ വരുന്നുണ്ടെന്ന് അറിയിച്ചതനുസരിച്ചാണ് അനഘയും വീട്ടുകാരും എത്തിയത്.

ഇന്നലെ അരികിലെത്തിയ സൂപ്പര്‍താരം കൈനീട്ടിയപ്പോള്‍ അനഘ ഹസ്തദാനം നല്‍കി. 'മിടുക്കി' എന്നു വിളിച്ച് സുരേഷ് ഗോപി അനഘയെ ചേര്‍ത്തുപിടിച്ചു. അനഘയോടും കൂടെയുണ്ടായിരുന്ന അമ്മ ഉഷയോടും സഹോദരന്‍ അക്ഷയ്‌നോടുമെല്ലാം കുശലാന്വേഷണങ്ങള്‍. പിന്നെ അനഘയെയും കുടുംബാംഗങ്ങളെയും അദ്ദേഹം ചായക്കു ക്ഷണിച്ചു. ചായയും പഴംപൊരിയും ഇഷ്ടതാരത്തോടൊപ്പം കഴിച്ചു. ഒടുവില്‍ അനഘയ്ക്ക് സ്‌നേഹാശംസകളും നേര്‍ന്നാണ് സുപരേഷ്‌ഗോപി മടങ്ങിയത്.