ഇന്നസെന്റിന് 70 വയസായോ? ശരിക്കും പറഞ്ഞാല് എത്ര വയസാണെന്ന് കൃത്യമായി തനിക്ക് പോലും അറിയില്ലെന്നാണ് താരം അടുപ്പക്കാരോട് പറയുന്നത്
സ്ത്രീകളുടെ പ്രായവും ആണുങ്ങളുടെ ശമ്പളവും ചോദിക്കരുതെന്ന് പലരും പറയാറുണ്ട്, എന്നാല് നടനും എം.പിയുമായ ഇന്നസെന്റിന്റെ കാര്യത്തില് അങ്ങനെയല്ല. താരത്തോട് ആരെങ്കിലും പ്രായം ചോദിച്ചാല് ഉരുണ്ട് കളിക്കും. ശരിക്കും പറഞ്ഞാല് എത്ര വയസാണെന്ന് കൃത്യമായി തനിക്ക് പോലും അറിയില്ലെന്നാണ് ഇന്നച്ചന് അടുപ്പക്കാരോട് പറയുന്നത്. ചിലരോടൊക്കെ പല പല ഡേറ്റുകളാണ് പറഞ്ഞിട്ടുള്ളത്. രേഖകള് അനുസരിച്ച് 1948 ഫെബ്രുവരി 28നാണ് ജനനം. അങ്ങനെ നോക്കുമ്പോള് താരത്തിന് 70 വയസായി. ഇത് ശരിയല്ലെന്നാണ് നാട്ടുകാരന്കൂടിയായ നടന് ഇടവേള ബാബു പറയുന്നത്.
പത്ത് വര്ഷം മുമ്പ് ഇന്നസെന്റിന്റെ സപ്തതി ആഘോഷിക്കാന് ഇടവേള ബാബുവും മറ്റ് ചില സുഹൃത്തുക്കളും തീരുമാനിച്ചിരുന്നു. അന്ന് നിനക്കെന്താ ബാബൂ എന്നെ വൃദ്ധനാക്കാന് ധൃതിയാണോ എന്ന് ഇന്നസെന്റ് ചോദിച്ചതോടെ ആഘോഷകമ്മിറ്റി പിരിച്ചുവിട്ടു. സെറ്റുകളിലൊക്കെ പലരും പിറന്നാള് ആഘോഷിക്കുമ്പോള് ഇന്നസെന്റും പങ്കെടുക്കും. താരത്തിന്റെ ജന്മദിനം ഇതുവരെ കൊണ്ടാടിയിട്ടില്ല. പലര്ക്കും ഡേറ്റ് അറിയില്ല, അതാണ് പ്രശ്നം. പിന്നെ ഇത്തരം പരിപാടികളോടൊന്നും വലിയ താല്പര്യവുമില്ല. പണ്ട് ദാരിദ്രവും പട്ടിണിയുമായി നടന്ന കാലത്ത് ഇതൊക്കെ ആഘോഷിക്കാന് കൊതിച്ചിട്ടുണ്ട്. നടന്നില്ല. ഇനിയിപ്പോ വേണ്ടെന്ന നിലപാടിലാണ് താരം.
വാക്കുകളിലും പ്രവര്ത്തികളിലും പ്രായം തോന്നുന്നതൊന്നും ഇന്നസെന്റിന്റെ ഭാഗത്ത് നിന്നുണ്ടാകില്ല. എല്ലായ്പ്പോഴും തന്നെയും ഭാര്യ ആലീസിനെയും ചേര്ത്താണ് ഇന്നസെന്റ് സംസാരിക്കുന്നത്. അതെന്താ അങ്ങനെയെന്ന് ഒരിക്കല് ഒരാള് ചോദിച്ചു; ഞാന് എന്റെ ഭാര്യയെ കുറിച്ചല്ലാതെ നാട്ടുകാരുടെ ഭാര്യമാരെ കുറിച്ച് പറഞ്ഞ് അടിമേടിക്കണോന്ന് താരം തിരികെ ചോദിച്ചു. വയസിന്റെ കാര്യത്തില് താരം സത്യവാങ്മൂലം നല്കണമെന്ന് മമ്മൂട്ടിയടക്കം പലരും കളിയാക്കും. എത്ര വയസായെന്ന് ചിലരൊക്കെ രഹസ്യമായും ചോദിക്കാറുണ്ട്. അവരോടൊക്കെ എന്തായാലും അടുത്ത പിറന്നാളിന് 69 തികഞ്ഞില്ലെന്ന് പറയില്ലെന്ന് താരം ഉറപ്പ് നല്കി.
https://www.facebook.com/Malayalivartha