മോഹന്‍ലാലിന്റെ കടുത്ത ആരാധികയായി മഞ്ജുവാര്യര്‍ അഭിനയിക്കുന്ന മോഹന്‍ലാല്‍ എന്ന സിനിമ വിഷുവിന് തിയേറ്ററുകളിലെത്തും. ചിത്രത്തിന്റെ കഥ തന്റെയാണെന്ന് ആരോപിച്ച് തൃശൂര്‍ അതിവേഗ കോടതിയില്‍ പരാതി നല്‍കിയ തിരക്കഥാകൃത്ത് കലവൂര്‍ രവികുമാറിന് അഞ്ച് ലക്ഷം രൂപ നല്‍കിയാണ് നിര്‍മാതാക്കളും സംവിധായകനും തലയൂരിയത്. കഥ കലവൂരിന്റേതാണെന്ന് ഫെഫ്ക കണ്ടെത്തിയിട്ടും ക്രെഡിറ്റ് നല്‍കാനോ, പ്രതിഫലം നല്‍കാനോ അണിയറപ്രവര്‍ത്തകര്‍ തയ്യാറായിരുന്നില്ല. തുടര്‍ന്ന് കലവൂര്‍ രവികുമാര്‍ കോടതിയെ സമീപിക്കുകയായിരുന്നു. തുടര്‍ന്ന് കോടതി റിലീസ് തടഞ്ഞിരുന്നു.

'മോഹന്‍ലാലിനെ എനിക്കിപ്പോള്‍ ഭയങ്കര പേടിയാണ്' എന്ന കഥാസമാഹാരത്തെ ആസ്പദമാക്കിയാണ് ഈ സിനിമ ഒരുക്കിയിരിക്കുന്നതെന്ന് രവികുമാര്‍ നേരത്തെ ഫെഫ്കയ്ക്ക് പരാതി നല്‍കിയിരുന്നു. താന്‍ എഴുതിയ കഥാസമാഹാരത്തിന്റെ രണ്ട് എഡിഷന്‍ പുറത്തിറങ്ങിയിട്ടുണ്ട്. അത് മോഹന്‍ലാലടക്കം വായിച്ചതാണ്. മോഹന്‍ലാല്‍ ആരാധികയായ ഭാര്യ കാരണം ഒരാളുടെ ജീവിതത്തില്‍ ഉണ്ടാകുന്ന രസകരമായ സംഭവങ്ങളും പ്രശ്‌നങ്ങളുമൊക്കെയാണ് കഥയില്‍ അവതരിപ്പിച്ചിരിക്കുന്നത്.

ചിത്രീകരണം തുടങ്ങുന്നതിന് മുന്‍പുതന്നെ കലവൂര്‍ ഫെഫ്കയില്‍ പരാതി നല്‍കിയിരുന്നു. 'മോഹന്‍ലാല്‍' എന്ന കഥയുടെ പകര്‍പ്പാണെന്ന് ഫെഫ്ക കണ്ടെത്തുകയും എനിക്ക് പ്രതിഫലം നല്‍കണമെന്നും കഥയുടെ അവകാശം നല്‍കണമെന്നും പറഞ്ഞിരുന്നു. എന്നാല്‍ അതെല്ലാം അവഗണിച്ചുകൊണ്ട് സിനിമയുടെ അണിയറ പ്രവര്‍ത്തകര്‍ മുന്നോട്ടുപോയി. കോടതിയില്‍ കേസ് എത്തിയപ്പോള്‍ ഒത്തുതീര്‍പ്പിന് ശ്രമിച്ചു. നന്ദി എഴുതി കാണിക്കാം എന്നാണ് അവര്‍ കലവൂരിനോട് പറഞ്ഞത്. അതിലെന്ത് കാര്യം? ഒരാളുടെ കഥ മോഷ്ടിച്ചിട്ട് നന്ദി പറഞ്ഞിട്ട് എന്താണ് ഫലം. സ്വന്തം കഥ മറ്റൊരാളുടെ പേരില്‍ വരുന്നതിനേക്കാള്‍ വലിയ ദുഖം എന്താണ്? അത്തരം ഒരു അവസ്ഥ ഒരു എഴുത്തുകാരനും സഹിക്കാന്‍ കഴിയില്ല. എനിക്ക് ആരുടെയും നന്ദി വേണ്ടെന്ന് കലവൂര്‍ പറഞ്ഞിരുന്നു.

എഴുത്തുകൊണ്ട് ജീവിക്കുന്നവരുടെ കുടുംബത്തിന്റെ അവസ്ഥ എന്താകുമെന്ന് ഇവരാരും ചിന്തിക്കുന്നില്ല. മാന്യമായ പ്രതിഫലം നല്‍കാന്‍ മടിക്കുന്നതെന്തിന്? എന്നാല്‍ കലവൂര്‍ ഇതാദ്യമായിട്ടല്ല ഒരു സിനിമയുടെ അവകാശവാദവും പറഞ്ഞ് കേസ് കൊടുക്കുന്നതെന്ന് ചിത്രത്തിന്റെ സംവിധായകന്‍ സാജിദ് യാഹിയ പറയുന്നു. മുന്‍പ് രക്ഷാധികാരി ബൈജുവിനെതിരെയും ദിലീപ് ചിത്രം ജോര്‍ജേട്ടന്‍സ് പൂരത്തിനെതിരെയും കേസ് കൊടുത്തു. ഇപ്പോള്‍ ഞങ്ങള്‍ക്കെതിരായും. ഇത് വളരെ മോശമാണെന്നായിരുന്നു പറഞ്ഞിരുന്നത്.