പരസ്പരം ഫോണ്‍ ചെയ്യാറുണ്ട്, ഇടയ്ക്ക് കാണാറുണ്ട്, ഷോപ്പിംഗിന് ഒരുമിച്ച് പോകാറുണ്ട്; പക്ഷെ ഒരുമിച്ച് താമസിക്കുമ്പോള്‍ ഭയങ്കര വഴക്കാണ്!! ഇങ്ങനെ പോയാല്‍ ചാവാന്‍കാലത്ത് ഓര്‍ക്കാന്‍ പറ്റിയ ഒരു നല്ല ദിവസം പോലും ജീവിതത്തില്‍ ഉണ്ടാകില്ല- ദാമ്പത്യ തകര്‍ച്ചയെക്കുറിച്ച് നീന കുറുപ്പ്
ദാമ്പത്യ തകര്‍ച്ചയെക്കുറിച്ച് നടി നീന കുറിപ്പ് മനസ്സ് തുറക്കുന്നു... ഞാനും കണ്ണനും സ്വന്തം ഇഷ്ടത്തിന് വിവാഹം കഴിച്ചവരാണ്. (കൊച്ചിയില്‍ സീ ഫുഡ് എക്‌സ്‌പോര്‍ട്ടിങ് ബിസിനസുകാരനാണ് കണ്ണന്‍). ഒരുമിച്ച് ജീവിക്കുന്നത് പ്രയാസമാണെന്ന് മനസ്സിലായപ്പോള്‍ രണ്ടു വീടുകളിലായി താമസം മാറി. പക്ഷേ, നിയമപരമായി പിരിഞ്ഞിട്ടില്ല.
മോള്‍ക്ക് രണ്ടുപേരെയും മിസ്സാവാതിരിക്കാന്‍ ഞങ്ങള്‍ ശ്രദ്ധിക്കുന്നുണ്ട്. ഞാനും മോളും താമസിക്കുന്ന ഫ്ലൂറ്റില്‍ നിന്ന് രണ്ടു കിലോമീറ്റര്‍ മാറിയാണ് കണ്ണന്‍ താമസിക്കുന്നത്. മിക്ക ദിവസവും ഓഫീസില്‍ നിന്ന് മടങ്ങുമ്പോള്‍ മോളെ കണ്ടിട്ടേ അദ്ദേഹം പോകാറുള്ളൂ. അവള്‍ക്കെന്ത് ആവശ്യം വരുമ്പോഴും അദ്ദേഹമത് സാധിച്ചുകൊടുക്കാറുണ്ട്.
ബന്ധം ഒഴിയണം എന്നുള്ളത് അത്ര മസ്റ്റായ കാര്യമാണെന്ന് ഞങ്ങള്‍ക്ക് തോന്നുന്നില്ല. വ്യത്യസ്തമായ ചിന്താഗതിയും കാഴ്ചപ്പാടുമൊക്കെയുള്ള രണ്ടുപേര്‍ ഒരുമിച്ച് ജീവിക്കുമ്പോള്‍ പ്രശ്‌നങ്ങള്‍ ഉണ്ടാകും. ചിലര്‍ക്കത് അഡ്ജസ്റ്റ് ചെയ്ത് പോകാന്‍ പറ്റും. ചിലര്‍ക്ക് പറ്റില്ല. അവര്‍ വേര്‍പിരിയും. ഇതുമല്ലാത്ത മറ്റൊരു കൂട്ടരുണ്ട്. അകന്നു ജീവിച്ചാല്‍ അഡ്ജസ്റ്റ് ചെയ്യാന്‍ പറ്റുന്നവര്‍. അക്കൂട്ടത്തിലാണ് ഞങ്ങള്‍. ഞങ്ങള്‍ പരസ്പരം ഫോണ്‍ ചെയ്യാറുണ്ട്, ഇടയ്ക്ക് കാണാറുണ്ട്, ഷോപ്പിങ്ങിന് ഒരുമിച്ച് പോകാറുണ്ട്. ഇതൊക്കെയാണെങ്കിലും ഒരുമിച്ച് താമസിക്കുമ്പോള്‍ ഭയങ്കര വഴക്കാണ്.
ദിവസവും ഇതിന്റെ ടെന്‍ഷനാണ്. ഇങ്ങനെപോയാല്‍ ചാവാന്‍കാലത്ത് ഓര്‍ക്കാന്‍ പറ്റിയ ഒരു നല്ല ദിവസംപോലും ജീവിതത്തില്‍ ഉണ്ടാകില്ല എന്നു തോന്നിയപ്പോള്‍ ഞങ്ങള്‍ എടുത്ത തീരുമാനമാണ് ഈ മാറിത്താമസം. ഇപ്പോള്‍ ഒരു കുഴപ്പവുമില്ല. ആള് ആളുടെ ഇഷ്ടത്തിന് ജീവിക്കുന്നു. ഞാന്‍ എന്റെ ഇഷ്ടത്തിനും. പക്ഷേ, മോളുടെ കാര്യം വരുമ്പോള്‍ രണ്ടുപേരും വിട്ടുവീഴ്ചക്ക് തയ്യാറാവും. വഴക്കുകള്‍ മനസമാധാനത്തെ ബാധിച്ചു തുടങ്ങിയപ്പോള്‍ പിരിഞ്ഞു താമസിക്കാന്‍ തുടങ്ങി. 2007 മുതല്‍ പിരിഞ്ഞാണ് താമസിക്കുന്നത്’
ശ്രീധരന്റെ ഒന്നാം തിരുമുറിവ് എന്ന ചിത്രത്തിലൂടെ നായികയായി അഭിനയം തുടങ്ങിയ നീന കുറുപ്പ് പിന്നീട് പ്രത്യക്ഷപ്പെട്ടത് സീരിയലുകളില്‍ നായികയായിട്ടാണ്. സിനിമകളില്‍നിന്ന് വിളിച്ച് ഡയലോഗ് പോലുമില്ലാത്ത റോളുകള്‍ തന്നപ്പോഴാണ് ഇനി സിനിമ വേണ്ട സീരിയല്‍ മതിയെന്ന തീരുമാനത്തില്‍ എത്തിയത്. പഞ്ചാബി ഹൗസാണ് ഇതിനിടയില്‍ ചെയ്‌തൊരു സിനിമ. റാഫി-മെക്കാര്‍ട്ടിന്‍ എന്നീ സംവിധായകരോടുള്ള മതിപ്പ് കൊണ്ടാണ് ആ സിനിമ പൂര്‍ത്തിയാക്കിയതെന്ന് ഗൃഹലക്ഷ്മിക്ക് നല്‍കിയ അഭിമുഖത്തില്‍ നീന കുറുപ്പ് പറഞ്ഞു.
കഴിഞ്ഞയിടയ്ക്ക് പുറത്തിറങ്ങിയ ശ്യാമപ്രസാദ് നിവിന്‍ പോളി തൃഷ ചിത്രം ഹെയ് ജൂഡില്‍ സാമാന്യം ഭേദപ്പെട്ട വേഷം നീനകുറുപ്പ് കൈകാര്യം ചെയ്തിരുന്നു. സിനിമ ജീവിതത്തില്‍ മുപ്പത് വര്‍ഷങ്ങള്‍ പിന്നിടുകയാണ് നീന കുറുപ്പ്.
https://www.facebook.com/Malayalivartha
