മലയാളികളുടെ ചങ്ക് ബ്രോയും ഏട്ടനുമായ മോഹന്‍ലാലിന്റെ 58ാം പിറന്നാള്‍ ആഘോഷം ലണ്ടനില്‍. രഞ്ജിത്തിന്റെ പുതിയ സിനിമയുടെ ചിത്രീകരണത്തിനായി ഒരാഴ്ച മുമ്പാണ് മോഹന്‍ലാല്‍ യു.കെയില്‍ എത്തിയത്. സുഹൃത്തിന്റെ അപ്പാര്‍ട്ട്‌മെന്റിലാണ് താരം താമസിക്കുന്നത്. ലൊക്കേഷനിലും താമസസ്ഥലത്തും പിറന്നാള്‍ പാര്‍ട്ടി ഒരുക്കിയിട്ടുണ്ട്. മഹാസുബൈര്‍ നിര്‍മിക്കുന്ന ചത്രം ഓണത്തിന് റിലീസ് ചെയ്യാനാണ് ഉദ്ദേശിക്കുന്നത്. നീരാളി പൂര്‍ത്തിയാക്കിയ ശേഷമാണ് താരം ലണ്ടനിലേക്ക് പറന്നത്. ഒടിയന്റെ കുറച്ച് ഭാഗങ്ങള്‍ കൂടി ചിത്രീകരിക്കാനുണ്ട്. മോഹന്‍ലാലിന്റെ രൂപമാറ്റം അടക്കമുള്ള കാര്യങ്ങള്‍ക്ക് വേണ്ടിയാണ് ചിത്രീകരണം നീണ്ട് പോകുന്നത്. 

ഭാര്യ സുചിത്ര ദുബയിലും അമ്മ ശാന്തകുമാരി കൊച്ചിയിലും മകന്‍ പ്രണവ് ചെന്നൈയിലും മകള്‍ വിസ്മയ അമേരിക്കയിലുമാണ്. അതിനാല്‍ കുടുംബ സഹിതമുള്ള ആഘോഷം ഇത്തവണ ഉണ്ടാകില്ല. കഴിഞ്ഞതവണ ദുബായില്‍ ഭാര്യയ്‌ക്കൊപ്പമായിരുന്നു ആഘോഷം. കെ.പി കുമാരന്റെ ആകാശഗോപുരമാണ് ലണ്ടനില്‍ ചിത്രീകരിച്ച അവസാനത്തെ മോഹന്‍ലാല്‍ സിനിമ. ഹെഡ് പാര്‍ക്കില്‍ തേംസ് നദിക്കരയില്‍ ജോഗിങ് നടത്തുന്ന ചിത്രം താരം ഏതാനും ദിവസങ്ങള്‍ക്ക് മുമ്പ് സോഷ്യല്‍മീഡിയയിലൂടെ പങ്ക് വച്ചിരുന്നു. ആദ്യ മണിക്കൂറില്‍ അയ്യായിരത്തിലധികം ലൈക്ക് ഈ ചിത്രത്തിന് ലഭിച്ചു. 2012ലെ ലണ്ടണ്‍ ഒളിംമ്പിക്‌സിന്റെ ഉദ്ഘാടന ചടങ്ങ് കാണാന്‍ മോഹന്‍ലാലും ഭാര്യ സുചിത്രയും പോയിരുന്നു. അന്ന് ഇരുവരും സോഷ്യല്‍ മീഡിയയില്‍ പങ്ക് വെച്ച ചിത്രവും വൈറലായിരുന്നു. 

രഞ്ജിത്തും മോഹന്‍ലാലും അവസാനം ഒന്നിച്ച ലോഹം പരാജയമായിരുന്നു. പിന്നീട് മണിയന്‍പിള്ള രാജുവിന്റെ മകനെ നായകനാക്കി രഞ്ജിത്ത് ആലോചിച്ച ബിലാത്തിക്കഥയില്‍ മോഹന്‍ലാല്‍ അതിഥി താരമായി അഭിനയിക്കുന്നു എന്ന വാര്‍ത്തവന്നു. എന്നാല്‍ ആ ചിത്രം മാറ്റിവച്ചാണ് മോഹന്‍ലാലിനെ നായകനാക്കി ഇതുവരെ പേരിട്ടിട്ടില്ലാത്ത സിനിമ ചെയ്യുന്നത്. സുബിസുരേഷ്, സുരേഷ്‌കൃഷ്ണ തുടങ്ങിയ വലിയ താരനിര ചിത്രത്തിലുണ്ട്.