ഈമാസം റിലീസായ മലയാള സിനിമകള് വന് പ്രതിസന്ധിയില്; നവാഗതരുടെ സിനിമകള്ക്ക് ഒന്നോ, രണ്ടോ ഷോയേ തിയേറ്ററുകാര് നല്കുന്നുള്ളൂ
ഈമാസം റിലീസായ മലയാള സിനിമകള് വന് പ്രതിസന്ധിയില്. നാം, കാമുകി, സ്കൂള് ഡയറി, പ്രേമസൂത്രം ,കുട്ടന് പിള്ളയുടെ ശിവരാത്രി, കൃഷ്ണം, ടൂ ഡെയ്സ് തുടങ്ങിയ ചിത്രങ്ങള് നോയമ്പ് സമയത്ത് റിലീസായത്. നോമ്പ് സമയമായതിനാല് പലര്ക്കും സിനിമ കാണാന് കഴിയുന്നില്ല. നല്ല ചിത്രമെന്ന അഭിപ്രായമുണ്ടായിട്ടും ടൊവിനോ, വിനീത് ശ്രീനിവാസന് ,ഗൗതം മേനോന് തുടങ്ങിയവരുടെ സാന്നിദ്ധ്യമുണ്ടായിട്ടും ''നാം ' എന്ന ചിത്രം റിലീസായ നാലാം ദിവസം നിര്മ്മാതാവ് തീയറ്ററുകളില് നിന്നും പിന്വലിച്ചു.
റിലീസിനു കിട്ടിയ തീയറ്ററുകളില് ഒരു ഷോ, രണ്ട് ഷോ ക്രമത്തിലാണ് കിട്ടിയത്. അറിഞ്ഞ് കേട്ട് ചിത്രം കാണാന് തീയറ്ററിലെത്തുംമ്പോള് ഷോയില്ല. ഇതാണ് അവസ്ഥ. ഭൂരിപക്ഷം തിയേറ്ററുകാര്ക്കും താരങ്ങളുടെ സിനിമ കളിക്കാനാണ് താല്പര്യം. തിയേറ്ററുകളുടെ എണ്ണം മാളുകളില് ഉള്പ്പെടെ കൂടിയിട്ടുണ്ട്. എന്നിട്ടും നവാഗത സിനിമകളോട് അയിത്തമാണ്.
സ്റ്റാര് വാല്യൂ ഇല്ലാത്ത സിനിമകള്ക്ക് തിയറ്റര് സപ്പോര്ട്ട് വളരെ കുറവാണ്. തീയറ്ററുകാര്ക്ക് ഒരു തരം പുശ്ചമാണെന്ന് പ്രൊഡക്ഷന് കണ്ട്രോളര്മാര് പറഞ്ഞു. ആദ്യ ദിവസം തന്നെ ആള് കുറവാണെങ്കില് അത് എത്ര നല്ല ചിത്രമായാലും പിറ്റേന്ന് മാറ്റിക്കളയും . പുതിയ നിര്മ്മാതാക്കളോടും പുതിയ താരങ്ങളോടും യുവ സംവിധായകരോടും കാണിക്കുന്ന ഈ നീചമായ പ്രവൃത്തിക്ക് അവസാനമുണ്ടാകണം.. നെല്ലും പതിരും തിരിച്ചറിയാനുള്ള അവസരം ഒരാഴ്ചയെങ്കിലും പ്രേക്ഷകന് നല്കണം. ലക്ഷങ്ങളും, കോടികളും മുടക്കി മാസങ്ങളോളം കഷ്ടപ്പെട്ട് സിനിമ നിര്മ്മിക്കുന്നവരുടെ സ്വപ്നങ്ങള് ഒറ്റ ദിവസം കൊണ്ട് തന്നെ തകര്ത്തെറിയുന്ന ഈ ദയയില്ലാത്ത തീയറ്ററുകാരുടെ ഏര്പ്പാടിന് അവസാനമുണ്ടാകണമെന്ന് നിര്മാതാക്കളില് പലരും ആവശ്യപ്പെടുന്നു.
എല്ലാ സിനിമകള്ക്കും പ്രേക്ഷകര് അറിഞ്ഞു വരുന്നത് വരെ ഒരാഴ്ചയെങ്കിലും കഴിഞ്ഞാണ്. അതിനാല് പുതിയ താരങ്ങളുടെയും സംവിധായകരുടെയും സിനിമകള് ഒരാഴ്ചയെങ്കിലും തിയേറ്ററുകളില് പ്രദര്ശിപ്പിക്കണം. അതിന് സര്ക്കാരിന്റെയും സിനിമാ സംഘടനകളുടെയും പിന്തുണ വേണം. ഇല്ലെങ്കില് നല്ല സിനിമകള് പ്രേക്ഷകര് അറിയാതെ ,കാണാതെ പോകേണ്ടി വരും. സര്ക്കാരും, സംഘടനകളും പുതിയ നിര്മ്മാതാക്കളുടെ കടന്നു വരവിനെ അവഗണിച്ചാല് ഫിലിം ഇന്ഡസ്ട്രിയില് കാശ് മുടക്കാന് നിര്മ്മാതാക്കള് മടിക്കും. പാത്രം കഴുകുന്നവര് മുതല് ടിക്കറ്റ് കീറിക്കൊടുക്കുന്നവര് വരെ ഏകദേശം ഇരുപത്തഞ്ച് ലക്ഷത്തോളം പേര് പണിയെടുക്കുന്ന തൊഴിലിടമാണ് സിനിമ ... തിയറ്ററുകാരുടെ നീചമായ പ്രവൃത്തി കാരണം സിനിമ ഇല്ലാതാവരുത് . തൊഴിലാളികള്ക്ക് കിട്ടുന്ന ജോലി നഷ്ടമാകരുത് . ഇവിടെ പുതിയവര്ക്ക് വരാന് ... വളരാന് അവസരമൊരുക്കണം.. അങ്ങനെ പുതുതായി വന്നവരാണ് ഇന്നുള്ളവരെല്ലാം ..
https://www.facebook.com/Malayalivartha
