നഖക്ഷതങ്ങള്, ആരണ്യകം, വന്ദനം തുടങ്ങിയ ചിത്രങ്ങളിലൂടെ മലയാളികള്ക്ക് പ്രിയപ്പെട്ട നായിക സലീമ വീണ്ടും തിരിച്ച് വരുന്നു
ആരണ്യകത്തിലെ അമ്മുവായി അഭിനയിച്ച സലീമ തിരിച്ചുവരവിനൊരുങ്ങുന്നു. നഖക്ഷതങ്ങള്, വന്ദനം, മഹായാനം തുടങ്ങിയ സിനിമകളില് അഭിനയിച്ച ശേഷം തമിഴ് സീരിയലുകളിലും മറ്റും അഭിനയിക്കുകയായിരുന്നു സലീമ. ഇനി സിനിമയില് സജീവമാകണമെന്നാണ് ആഗ്രഹം. അമ്മയായും സഹോദരിയായും നെഗറ്റീവ് വേഷങ്ങളും അഭിനയിക്കണം മലയാളത്തിലെ ന്യൂജെന് സിനിമകള് ഇഷ്ടമാണ്. നല്ല കഥാപാത്രങ്ങള്ക്കായി കാത്തിരിക്കുകയാണ്. അവസരങ്ങള് ലഭിച്ചാല് ചെന്നൈയില് നിന്ന് കൊച്ചിയിലേക്ക് താമസം മാറ്റുമെന്നും താരം പറഞ്ഞു.
സിനിമയില് തിരക്കേറി നില്ക്കുമ്പോഴാണ് സലീമ രണ്ടായിരത്തില് അഭിനയം നിര്ത്തിയത്. ബിസിനസില് ശ്രദ്ധിക്കാന് വേണ്ടായായിരുന്നു അത്. ഓട്ടോമൊബൈല് ബിസിനസ്സിലും റിയല് എസ്റ്റേറ്റിലും സജീവമായി. 18 വര്ഷം കഴിഞ്ഞപ്പോള് വീണ്ടും മലയാളത്തിലേക്ക് തിരിച്ചുവരാന് ആഗ്രഹിച്ചതിന് കാരണം കേരളത്തിലെ സുഹൃത്തുക്കളാണ്. അവര് നിരന്തരം പറഞ്ഞുകൊണ്ടിരുന്നു തിരിച്ചുവരണമെന്ന്. നഖക്ഷതങ്ങള് ആയിരുന്നു ആദ്യ സിനിമ. നടി കാഞ്ചന പറഞ്ഞതനുസരിച്ചാണ് ഹരിഹരനും എം.ടിയും സലീമയുടെ ചെന്നൈയിലെ വീട്ടിലെത്തിയത്. കഥ കേട്ടപ്പോള് ഇഷ്ടം തോന്നു. ഒരു ഡയലോഗ് പോലുമില്ലാതെ ഭാവങ്ങളിലൂടെ കഥാപാത്രത്തിന്റെ മാനറിസങ്ങള് അവതരിപ്പിക്കുക വെല്ലുവിളിയായിരുന്നു. ഹരിഹരന് സാര് എല്ലാ കാര്യങ്ങളും കൃത്യമായി പറഞ്ഞ് തന്നെന്ന് സലീമ ഓര്മിക്കുന്നു.
അഭിനയ ജീവിതത്തിലെ ശ്രദ്ധേയമായ കഥാപാത്രം ആരണ്യകത്തിലെ അമ്മുവായിരുന്നു. ഒളിച്ചിരിക്കാന് വള്ളിക്കുടിലൊന്നൊരുക്കി വച്ചില്ലേ... എന്ന പാട്ടിലഭിനയിക്കുമ്പോള് തന്റെ തലയ്ക്ക് മുകളിലൂടെ ഒരു പച്ചില പാമ്പ് പോയ കാര്യവും സലീമ ഓര്മിച്ചു. അഭിനയം നിര്ത്തിയ ശേഷം വിവാഹ ആലോചനകള് ഒരുപാട് വന്നു. ഒന്നും ശരിയായില്ല. അല്ലാതെ മനപ്പൂര്വം മാറിനിന്നതല്ല. 1995ല് മുത്തശി മരിച്ചതോടെ സലീമ ഒറ്റപ്പെട്ടു. ഇപ്പോള് 40 വയസായി. വിവാഹ ആലോചനകള് വരുന്നുണ്ടെങ്കിലും സിനിമയില് അഭിനയിക്കാനാണ് ആഗ്രഹമെന്ന് സലീമ വ്യക്തമാക്കി.
https://www.facebook.com/Malayalivartha