അരിസ്‌റ്റോ സുരേഷും യുവനടി ഗ്രീഷ്മയും തമ്മിലുള്ള ഐറ്റംഡാന്‍സ് മലയാളസിനിമയില്‍ വലിയ ചര്‍ച്ചയാകുന്നു. കൂരേടെ മൂല കുലുങ്ങണടീ പെണ്ണേ... കാലം പോയ പോക്ക കണ്ടോടീ... പെണ്ണേ... എന്ന പാട്ടാണ് സുരേഷ് പാടി അഭിനയിച്ചത്. കൂടെ അഭിനയിച്ച സുന്ദരി ഗ്രീഷ്മ വശ്യമായ ചിരിയോടൊപ്പം നൃത്തം വെച്ചു. മമ്മി സെഞ്ചറി സംവിധാനം ചെയ്യുന്ന കേണലും കിണറും എന്ന ചിത്രത്തിലേതാണ് ഈ പാട്ട്. സുരേഷ് തന്നെ പാടി അഭിനയിക്കുന്നു എന്നതാണ് ഇതിന്റെ പ്രത്യേകത. ജനങ്ങളുടെ മനസില്‍ നിറഞ്ഞ് നില്‍ക്കുന്ന നാടന്‍പാട്ടായി ഇത് മാറുമെന്ന് സുരേഷ് പറയുന്നു. 

കേണലിന്റെ വിവാദമായ ഗ്രാമത്തില്‍ താമസിക്കുന്ന സുരേഷ് ചെറിയ പണികളെടുത്ത് ജീവിതം തള്ളിനീക്കുന്നു. മദ്യം കഴിക്കാനാണ് പണിയെടുക്കുന്നത്. കൂടെയുള്ളവര്‍ക്കും വാങ്ങിക്കൊടുക്കും. പിന്നെ നന്നായി പാടും. വിവാഹം കഴിച്ചിട്ടില്ല. ഇതാണ് സുരേഷ് എന്ന തന്റെ കഥാപാത്രമെന്ന് അരിസ്റ്റോ സുരേഷ് പറഞ്ഞു. മദ്യലഹരിയില്‍ മയങ്ങുമ്പോള്‍ സുന്ദരികളെ സ്വപ്‌നം കാണും. അവരോടൊത്ത് നൃത്തമാടും. കെട്ടിപ്പിടിക്കും ചുംബിക്കും. സ്വപ്‌നത്തില്‍ നിന്ന് ഉണരുമ്പോള്‍ നാണിച്ചിരിക്കും. ഗ്രാമത്തിലെ കേണലിനും ജാനകിയമ്മയ്ക്കും സുരേഷിനെ ഇഷ്ടമാണ്. അവരുടെയെല്ലാം ഓമനപുത്രനാണ് സുരേഷ്. 

നീണ്ട ഇടവേളയ്ക്ക് ശേഷം മമ്മി സെഞ്ച്വറി സംവിധാനം ചെയ്യുന്ന ചിത്രത്തില്‍ അരിസ്റ്റോസുരേഷ് നായകനാകുന്നു എന്നതാണ് പ്രത്യേകത. ആക്ഷന്‍ ഹീറോ ബിജുവിലൂടെ സിനിമയിലെത്തിയ സുരേഷ് മമ്മൂട്ടി അടക്കമുള്ള സൂപ്പര്‍താരങ്ങളുടെ ഇഷ്ട നടനാണ്. പരോളില്‍ മമ്മൂട്ടി വിളിച്ച് സുരേഷിന് വേഷം നല്‍കുകയായിരുന്നു. തോപ്പില്‍ ജോപ്പനിലേക്ക് മമ്മൂട്ടി വിളിച്ചെങ്കിലും തിരക്ക് കാരണം അഭിനയിക്കാന്‍ കഴിഞ്ഞിരുന്നില്ല.