അടുക്കള കഥകള് ബാലചന്ദ്രമേനോന് അവസാനിപ്പിച്ചു, ഇത്തവണ കട്ട സസ്പെന്സുമായാണ് കുടുംബപ്രേക്ഷകരുടെ ഇഷ്ടസംവിധായകന് എത്തുന്നത്
മലയാളസിനിമയില് അടുക്കളപ്പടങ്ങള് എടുക്കാന് വിദഗ്ധര് രണ്ട് പേരാണ്, ഒന്ന് ബാലചന്ദ്രമേനോനും മറ്റൊന്ന് സത്യന് അന്തിക്കാടും. താന് അടുക്കള സിനിമകള് എടുക്കുന്നത് അവസാനിപ്പിക്കുകയാണെന്ന് ബാലചന്ദ്രമേനോന് ഫെയിസ്ബുക്കിലൂടെ അറിയിച്ചു. പുതിയ സിനിമ എന്നാലും ശരത് കട്ട സസ്പെന്സാണെന്ന് പോസ്റ്ററിലെ വാചകം വ്യക്തമാക്കുന്നു. നടന് പൃഥ്വിരാജ് ചിത്രത്തിന്റെ ഫസ്റ്റ്ലുക്ക് പോസ്റ്റര് പുറത്തിറക്കി. അതേക്കുറിച്ച് ബാലചന്ദ്രമേനോന്റെ കുറിപ്പില് പറയുന്നതിങ്ങനെ...
ഈ പോസ്റ്റര് കാണുന്ന നിങ്ങളുടെ മുഖത്തു ഞാന് ഒരു കുസൃതിച്ചിരി കാണുന്നുണ്ട്. അതിന്റെ കാരണവും എനിക്കൂഹിക്കാന് കഴിയും .
'ഇങ്ങേര്ക്കിതു എന്ത് പറ്റി ? മര്യാദക്ക് കുടുംബ കഥകളുമായി സ്വസ്ഥമായി കഴിഞ്ഞിരുന്നതാണല്ലോ !
ദേ , ഇപ്പം എന്താ ഇങ്ങിനെ ?'
ആ ചോദ്യം ന്യായം . ഞാനും അഭിമാനത്തോടെ സമ്മതിക്കുന്നു , കുറച്ചൊക്കെ ഞാനും മാറാന് തീരുമാനിച്ചു . അടുക്കളയിലെയും കിടപ്പുമുറിയിലെയും ഒക്കെ കാര്യങ്ങള് മാത്രം ഇന്ന് സിനിമക്ക് മതിയാവില്ല . ഇവിടുത്തെ ചെറുപ്പക്കാര് ആണ് ശരിക്കും സിനിമയുടെ സാമ്പത്തിക ഭദ്രത ഉറപ്പു വരുത്തുന്നത് . ഞാന് ഇത്തവണ അവരോടൊപ്പം കൂടുകയാണ് . എന്ന് കരുതി എന്റെ കുടുംബസദസ്സുകളെ ഒരിക്കലും കൈ വെടിയുകയില്ല .കാര്യം സസ്പെന്സ് ഒക്കെ ആണെങ്കിലും ഹൃദയമുള്ളവര്ക്കു ഇറ്റു കണ്ണീരു ഉതിര്ത്താനുള്ള ഒരു രംഗമെങ്കിലും എന്റെ സിനിമയില് ഉണ്ടാകാതിരിക്കില്ല. ഞാന് തന്നെ പണ്ട് പറഞ്ഞത് പോലെ ' ജെയിംസ് ബോണ്ടിനെ വെച്ചും ഞാന് സിനിമയെടുക്കാം . പക്ഷെ എന്റെ ജെയിംസ് ബോണ്ട് ഇടിക്കുന്ന ഓരോ ഇടിയുടെയും പിന്നില് 'കട്ട ' സെന്റിമെന്റ്സ് ഉണ്ടായിരിക്കും ...
ഇവിടെയും സംഗതി അത് തന്നെ . പക്ഷെ ഇതില് നിങ്ങള്ക്കായി ഞാന് ' കട്ട' സസ്പെന്സ് ഒളിച്ചു വെച്ചിട്ടുണ്ട് . അതൊക്കെപ്പോട്ടെ . ഈ പോസ്റ്റര് ആദ്യമായിക്കണ്ടപ്പോള് എന്റെ സിനിമകള് കണ്ടു ശീലിച്ച നിങ്ങളുടെ മനസ്സിലൂടെ കടന്നുപോയ ചിന്തകളെന്താണ് ?
എനിക്കതു അറിയാന് സ്വാഭാവികമായിട്ടും ആകാംക്ഷ ഉണ്ടാവുമല്ലോ. എന്തൊക്കെയാണേലും ,റിലീസ് ചെയ്യുന്ന ദിവസം തന്നെ സിനിമ കാണാന് തിയേറ്ററില് വരണം- എന്ന് പറഞ്ഞാണ് കുറിപ്പ് അവസാനിക്കുന്നത്.
https://www.facebook.com/Malayalivartha
