നിപ്പ കാരണം മലയാള സിനിമക്ക് കോടികണക്കിന് രൂപയുടെ നഷ്ടം. കോഴിക്കോട്, മലപ്പുറം ജില്ലകളിൽ ആഴ്ചകളായി തീയേറ്ററുകൾ അടഞ്ഞുകിടക്കുകയാണ്. മോഹൻലാലിന്റെ നീരാളിയുടെ റിലീസ് ഇപ്പോൾ ഒരു മാസത്തേക്കാണ് മാറ്റിയിരിക്കുന്നത്. മലബാറിൽ ഷൂട്ടിങ്ങുകളും നടക്കുന്നില്ല. ജനക്കൂട്ടം വന്നു ചേരാൻ സാധ്യതയുള്ള സ്ഥലങ്ങൾ പരമാവധി ഒഴിവാക്കാനാണ് ആരോഗ്യ വകുപ്പ് നൽകിയിരിക്കുന്ന നിർദ്ദേശം. ഈദിന് നീരാളി റിലീസ് ചെയ്യാനാണ് തീരുമാനിച്ചിരിക്കുന്നത്.

നീരാളി ഇതിനകം ട്രെൻറ്സെറ്ററായി മാറി കഴിഞ്ഞിട്ടുണ്ട്. മോഹൻലാലിന്റെ അഭിനയ ജീവിതത്തിലെ ഏറ്റവും മികച്ച കഥാപാത്രങ്ങളിലൊന്നായിരിക്കും നീരാളി. മോഹൻലാൽ നീരാളിയിൽ ഒരു ഗാനം ആലപിക്കുന്നുണ്ട്. ജൂലൈ മാസത്തിൽ ചിത്രം റിലീസ് ചെയ്യാമെന്നാന്ന് തീരുമാനം. എന്നാൽ ജയസൂര്യ ചിത്രമായ ഞാൻ മേരിക്കുട്ടിയും പൃഥ്വിരാജിന്റെ മൈ സ്റ്റോറിയും ജൂൺ 15ന് തന്നെ തീയേറ്ററിലെത്തും. മമ്മൂട്ടി ചിത്രമായ അബ്രഹാമിന്റെ സന്തതികൾ ജൂൺ 16ന് തീയേറ്ററിലെത്തും. അതേ സമയം ടൊവിനോ തോമസിന്റെ പുതിയ ചിത്രമായ തീവണ്ടിയുടെ റിലീസ് ജൂൺ 29 ലേക്ക് മാറ്റി. ഫെല്ലിനിയാണ് ചിത്രത്തിന്റെ സംവിധായകൻ.

ഒരു ഇടവേളക്ക് ശേഷമാണ് ഒരു രോഗം സമസ്ത മേഖലകളെയും കീഴ്പ്പെടുത്തിയത്. റംസാൻ പ്രമാണിച്ച് ഉണ്ടരേണ്ട വിപണി ഒന്നാകെ ഉറങ്ങിക്കഴിഞ്ഞു. ഇതിനു മുമ്പുണ്ടായ ഒരു ദുരന്തങ്ങളും സിനിമയെ ഇത്രകണ്ട് ബാധിച്ചിരുന്നില്ല. സിനിമാ റിലീസുകൾ മാറ്റിവയ്ക്കേണ്ട തരത്തിലേക്ക് ഒരു ദുരന്തങ്ങളും വളർന്നിരുന്നുമില്ല. ജനം ഒത്തുകൂടുന്ന സ്ഥലങ്ങളൊക്കെ ആരോഗ്യംവകുപ്പിന്റെ നിരീക്ഷണത്തിലാണ്. മലബാറിൽ കടകൾ പോലും ശരിയായി തുറക്കാറില്ല. എല്ലാവരും നിപ്പ ഭീതിയിലാണ്. കോഴിക്കോട്ടെ വർത്തമാനങ്ങളും നിപ്പയെ ചുറ്റിപറ്റിയാണ്. പുതിയ നിപ്പ കേസുകൾ റിപ്പോർട്ട് ചെയ്യാത്തതിൽ ആരോഗ്യ വകുപ്പിന് ആശ്വാസമുണ്ട്. ആരോഗ്യ മന്ത്രി നേരിട്ട് തന്നെയാണ് സ്ഥിതിഗതികൾ വിശകലനം ചെയ്യുന്നത്.

മലബാറിലാണ് സിനിമയുടെ യഥാർത്ഥ പൾസ് അനുഭവപ്പെടാറുള്ളത്. മലബാറിൽ സിനിമക്കുള്ളത് പോലെ ആരാധകർ മറ്റൊരിടത്തുമില്ല. നിറഞ്ഞ സദസിൽ ആഴ്ചകളോളം സിനിമ പ്രദർശിപ്പിക്കുന്ന സ്ഥലമാണ് മലബാർ. സൂപ്പർ താരങ്ങളുടെ ചിത്രങ്ങൾക്ക് പുറമേ മറ്റ് താരങ്ങളുടെ ചിത്രങ്ങളും കോഴിക്കോട്ട് വലിയ വിജയമായി തീരാറുണ്ട്. ഉയർന്ന സിനിമാ ബോധമുള്ള പ്രേക്ഷകരാണ് കോഴിക്കോടിന്റെ ഏറ്റവും വലിയ നേട്ടം. നിരവധി മികച്ച ചലച്ചിത്ര പ്രവർത്തകർക്കും കോഴിക്കോട് ജന്മം നൽകിയിട്ടുണ്ട്.

ഒരു വലിയ ചിത്രത്തിന്റെ റിലീസ് മാറ്റി വയ്ക്കുക എന്നത് തീർത്തും നഷ്ടകച്ചവടമാണ്. ഒരു മാസം റിലീസ് വൈകുമ്പോൾ കോടികൾ വെള്ളത്തിലൊഴുകും. ഈദിന് റിലീസാകാൻ ഉദ്ദേശിക്കുന്ന ചിത്രം റിലീസായില്ലെങ്കിൽ അക്കാര്യം മനസിലാകും.