സഹസംവിധായകനായി സിനിമയില്‍ തുടക്കം കുറിച്ച സൗബിന്‍ സംവിധാനം ചെയ്ത പറവ കഴിഞ്ഞ വര്‍ഷമായിരുന്നു തിയറ്ററുകളിലേക്ക് എത്തിയത്. മികച്ച പ്രതികരണമായിരുന്നു ചിത്രത്തിന് ലഭിച്ചത്. പറവകളിയുമായി ബന്ധപ്പെടുത്തി നിര്‍മ്മിച്ച സിനിമയില്‍ ഇച്ചാപ്പിയും ഹസീബും എന്ന പേരില്‍ രണ്ട് കൊച്ച് താരങ്ങള്‍ കൂടിയുണ്ടായിരുന്നു. മട്ടാഞ്ചേരി ടിഡി ഹൈസ്‌കൂളില്‍ പത്താം ക്ലാസില്‍ പഠിക്കുമ്പോഴായിരുന്നു ഗോവിന്ദിനെ തേടി സിനിമയിലേക്കുള്ള അവസരം വന്നത്.

ഗോവിന്ദിന്റെ അമ്മ ഒരു ചായ കട നടത്തുകയാണ്. സംവിധായകന്‍ സൗബിന്‍ ഷാഹിറും കൂട്ടുകാരും ഗോവിന്ദിന്റെ കടയില്‍ നിന്നും ചായ കുടിക്കുകയായിരുന്നു. ആ സമയത്ത് സൈക്കിളില്‍ അതിവേഗത്തില്‍ പാഞ്ഞ് വന്ന ഗോവിന്ദ് സൈക്കിളില്‍ നിന്നും അവരുടെ മുന്നില്‍ വീഴുകയായിരുന്നു. പിടിച്ചെഴുന്നേല്‍പ്പിച്ചതിന് ശേഷം സൗബിന്‍ തന്റെ സിനിമയില്‍ അഭിനയിക്കാമോ എന്നായിരുന്നു ഗോവിന്ദിനോട് ചോദിച്ചത്. അങ്ങനെയായിരുന്നു ഗോവിന്ദ് സിനിമയിലേക്ക് എത്തിയത്.

പതിനാറ് വര്‍ഷം മുന്‍പ് ഗോവിന്ദിന്റെ അച്ഛന്‍ മരിച്ചതിന് ശേഷം അമ്മ വീടുകളില്‍ പ്രസവ ശൂശ്രൂഷയ്ക്കും മറ്റും പോയിട്ടായിരുന്നു കുടുംബം നോക്കിയിരുന്നത്. പിന്നീട് ചായക്കട തുടങ്ങുകയായിരുന്നു. ചെറളായി മഞ്ഞഭഗവതി ക്ഷേത്രത്തിന് സമീപത്താണ് ഗോവിന്ദിന്റെ അമ്മ നടത്തുന്ന ചായക്കട. വലിയ കടയൊന്നുമല്ല. രാത്രിയിലാണ് കച്ചവടം. ഗോവിന്ദിന്റെ സഹോദരിയുടെ വിവാഹം കഴിഞ്ഞു.

ഒരു സഹോദരന്‍ പ്ലസ് ടുവിന് പഠിക്കുന്നു.. സിനിമയില്‍ അഭിനയിച്ചെങ്കിലും അന്നും ഇന്നും ഗോവിന്ദിന്റെ ജീവിതം ചായക്കടയിലെ വരുമാനം കൊണ്ടാണ്. സ്‌കൂള്‍ കഴിഞ്ഞ് വന്നാല്‍ കടയില്‍ അമ്മയെ സഹായിച്ചതിന് ശേഷമാണ് ഗോവിന്ദ് പോകാറുള്ളത്. 11 മണി വരെ നീളുന്ന കച്ചവടം കഴിഞ്ഞിട്ടാണ് ഗോവിന്ദിന്റെ പഠിത്തമൊക്കെ...

സിനിമയില്‍ അഭിനയിച്ച് ശ്രദ്ധിക്കപ്പെട്ടതിന് ശേഷം ഗോവിന്ദും അമലും കൊച്ചിക്കാരുടെ പ്രിയപ്പെട്ടവരായി മാറിയിരുന്നു. സിനിമയിലേക്ക് കണ്ടെത്തിയ മിടക്കന്മാര്‍ അഭിനയത്തില്‍ മുന്‍ പരിചയമൊന്നും ഇല്ലാതിരുന്നിട്ടും കിടിലന്‍ പ്രകടനമായിരുന്നു കാഴ്ച വെച്ചത്. അതിന്റെ ക്രെഡിറ്റ് മുഴുവന്‍ സൗബിനിക്കായ്ക്ക് ആണെന്നാണ് ഗോവിന്ദ് പറയുന്നത്. അഭിനയിക്കുന്നത് എങ്ങനെയാണെന്നുള്ള കാര്യമെല്ലാം അദ്ദേഹമായിരുന്നു പറഞ്ഞ് തന്നത്. സത്യത്തില്‍ സിനിമയില്‍ കാണിച്ചത് പോലെ സൈക്കിളില്‍ അഭ്യാസം കാണിച്ചും മീനും പറവയുമായി കൂട്ട് കൂടി നടക്കുന്ന കുട്ടികള്‍ തന്നെയായിരുന്നു ഇരുവരും. അതായിരുന്നു ഇരുവരുടെയും അഭിനയം റിയലായി പ്രേക്ഷകര്‍ക്ക് തോന്നിയതും.