സിനിമാ സീരിയില്‍ ഓഡിന് പിന്നിലെ ഉടായിപ്പുകളെ കുറിച്ച് അവതാരകയും മോഡലും നടിയുമായ ലിനി തുറന്ന് പറയുന്നു. മുമ്പൊക്കെ ഓഡിഷനെന്ന് കേട്ടാല്‍ ചാടിക്കയറി പോകുമായിരുന്നു. പിന്നീടാണ് ഇതിനൊക്കെ പിന്നിലെ ചതിക്കുഴികള്‍ മനസിലായതെന്ന് ലിനി പറയുന്നു. പലര്‍ക്കും അഡ്ജസ്റ്റ്‌മെന്റുകളാണ് വേണ്ടത്. നല്ല കഥാപാത്രമാണ് പക്ഷെ, സംവിധായകനും നിര്‍മാതാവിനും വേണ്ടി അഡ്ജസ്റ്റ് ചെയ്യണം, ഇത് സ്ഥിരമായപ്പോള്‍ മടുത്തു. അതോടെ ഓഡിഷനും നിര്‍ത്തി. പെണ്‍കുട്ടികളെ ചൂഷണം ചെയ്യുന്ന പരിപാടിയാണ് 90 ശതമാനം ഓഡിഷനുകളും. പലരും തന്നോട് നേരിട്ട് ചോദിച്ചിട്ടുണ്ടെന്നും അതിനെല്ലാം നോ പറഞ്ഞിട്ടുണ്ടെന്നും താരം വ്യക്തമാക്കി. ഇനിയും അഡ്ജസ്റ്റ്‌മെന്റിന് തയ്യാറല്ലെന്നും ലിനി പറഞ്ഞു. 

ഓഡിഷന്‍ പ്ലാന്‍ ചെയ്യുന്നവരെ കുറ്റംപറഞ്ഞിട്ട് കാര്യമില്ല, ചെറിയ വേഷങ്ങള്‍ക്ക് വേണ്ടി വലിയ അഡ്ജസ്റ്റ്‌മെന്റുകള്‍ക്ക് തയ്യാറായി നൂറ് കണക്കിന് പേരാണ് വരുന്നത്. അതുകൊണ്ട് തട്ടിപ്പുകാര്‍ക്ക് ക്ഷാമം ഉണ്ടാകില്ല. ഇത്തരക്കാരുടെ ചതിയില്‍പ്പെട്ട് ജീവിതം തകര്‍ന്ന നിരവധി പേരെ അറിയാം. പലരും പേരിന് ഷൂട്ടിംഗ് ആരംഭിക്കും എന്നിട്ട് കാര്യം കണ്ട ശേഷം സാമ്പത്തിക പ്രശ്‌നമെന്ന് പറഞ്ഞ് നിര്‍ത്തിവയ്ക്കും. അതിനാല്‍ താന്‍ ആംഗറിങ്ങിനും മോഡലിംഗിനുമാണ് ആദ്യപരിഗണന നല്‍കുന്നതെന്ന് ലിനി പറയുന്നു. മോഡലിംഗിലും അഡ്ജസ്റ്റ്‌മെന്റുകാരുടെ പ്രളയമാണ്. വിവിധ റാമ്പുകളില്‍ ഇറക്കി താരമാക്കാമെന്നാണ് വാഗ്ദാനം. ചില സുഹൃത്തുക്കള്‍ ഇത്തരം ചതിക്കുഴികളില്‍ വീണിട്ടുണ്ടെന്നും താരം പറയുന്നു. 

പരസ്യചിത്രങ്ങളിലാണ് കൂടുതലായും ലിനി അഭിനയിക്കുന്നത്. അതിനായി കുറച്ച് സമയം നീക്കിവെച്ചാല്‍ മതി. വലിയ ടെന്‍ഷനില്ല, ആരോടും പ്രതിബദ്ധതയുമില്ല. ഏറ്റവും അടുത്ത സുഹൃത്തുക്കള്‍ ചെയ്യുന്ന ഷോര്‍ട്ട് ഫിലിമുകളിലും സിനിമകളിലും അഭിനയിക്കും. കൊച്ചി സ്വദേശിയായ ലിനി നിരവധി ടി.വി ഷോകളില്‍ ആങ്കര്‍ ചെയ്യുന്നുണ്ട്. ലില്ലി , അമല എന്നീ സിനിമകളില്‍ അഭിനയിച്ചിട്ടുണ്ട്. കൈരളി ചാനലില്‍ ഫില്‍മി ബസാറിലും ലിനിയായിരുന്നു അവതാരക.