മമ്മൂട്ടിയുടെ കരിയറിലെ ഏറ്റവും വലിയ ചിത്രമെന്നാണ് മാമാങ്കത്തെ വിശേഷിപ്പിക്കപ്പെടുന്നത്. സാമൂതിരിയുടെ തലകൊയ്യാന്‍ പുറപ്പെടുന്ന ചാവേറുകളുടെ കഥ പറയുന്ന ചിത്രം സംവിധാനം ചെയ്യുന്നത് സജീവ് പിള്ളയാണ്. ചിത്രത്തില്‍ മമ്മൂട്ടിയുടേത് ഇതുവരെ കാണാത്ത വേഷപ്പകര്‍ച്ചയാണെന്ന് സംവിധായകന്‍ പറയുന്നു. ഫെയ്‌സ്ബുക്കിലിട്ട പോസ്റ്റിലാണ് അദ്ദേഹം ഇക്കാര്യം വ്യക്തമാക്കിയിരിക്കുന്നത്. മമ്മൂട്ടിയോട് കടപ്പെട്ടിരിക്കുന്നുവെന്നും സംവിധായകന്‍ പറയുന്നു.

ചിത്രത്തിന്റെ രണ്ട് ഷെഡ്യൂളുകള്‍ പൂര്‍ത്തിയാക്കിയതായും. ആക്ഷന് മുന്‍തൂക്കമുള്ളതായിരുന്നു ആദ്യ ഷെഡ്യൂളെന്നും എന്നാല്‍ ഇതില്‍ നിന്ന് വിഭിന്നമാണ് രണ്ടാമത്തെ ഷെഡ്യൂളെന്നും അദ്ദേഹം പറയുന്നു. പ്രതികൂലമായ പരിതസ്ഥിതിയില്‍ തുടങ്ങേണ്ടി വന്നെങ്കിലും പൂര്‍ത്തീകരിക്കാന്‍ കഴിയുകയും ചെയ്തുവെന്ന് സജീവ് പിള്ള വ്യക്തമാക്കുന്നു.

ആരാധിക്കപ്പെടുന്ന മഹാധീരന്മാരുടെ ചരിത്രത്തോടൊപ്പമാണ് യാത്രയെങ്കിലും വലിയ ചരിത്ര മുഹൂര്‍ത്തങ്ങളിലെ ഒറ്റപ്പെട്ട നിലപാടുകളുടെ സുധീരതയും സ്ഥൈര്യവും കൂടിയാണ് സിനിമയിലെ ഭൂമിക. അവിടെ ഒറ്റപ്പെടുന്നവരുടെ ജീവിതാവസ്ഥകളും സംവിധായകന്‍ കുറിക്കുന്നു. സ്‌ക്രീന്‍ ഇമേജില്‍ നിന്ന് ഒരിക്കലും പ്രതീക്ഷിക്കാത്ത വേഷപ്പകര്‍ച്ചയാണ് മമ്മൂട്ടിയുടേതെന്നും അതിന് അദ്ദേഹത്തോട് കടപ്പെട്ടിരിക്കുന്നുവെന്നും സജീവ് പിള്ള പറയുന്നു.

സിനിമയുടെ സ്‌ക്രിപ്ടിനെ പൂര്‍ണ ബോധ്യത്തോടെ ഏറ്റെടുത്ത വേണു സാറിനും നന്ദിയുണ്ടെന്ന് സംവിധായകന്‍ പറയുന്നു. ഒപ്പം നില്‍ക്കുന്നവരുടെ ശക്തിയിലും ഊര്‍ജത്തിലുമാണ് നിലനില്‍പ്പെന്നും ഇനിയും ഏറെ ദൂരം മുന്നോട്ട് പോകാനുണ്ടെന്നും സജീവ് പിള്ള വ്യക്തമാക്കുന്നു.

സജീവ് പിള്ളയുടെ ഫെയ്‌സ്ബുക്ക് പോസ്റ്റ്‌