നടന്‍ ദിലീപിനെ അമ്മ സംഘടനയില്‍ തിരിച്ചെടുത്തതിനെതിരെയുള്ള വിമണ്‍ ഇന്‍ സിനിമ കളക്ടീവിന്റെ അഭിപ്രായ പ്രകടനങ്ങളെ വിമര്‍ശിച്ച്‌ തിരക്കഥാകൃത്ത് മനോജ് രാംസിങ്. 'അമ്മ, രാഷ്ട്രീയത്തിലോ സമൂഹത്തിലോ ഇടപെട്ടു പ്രവര്‍ത്തിക്കുന്ന പ്രസ്ഥാനമേ അല്ല, അമ്മ അതിലെ അംഗങ്ങളുടെ സ്വകാര്യ പ്രസ്ഥാനം മാത്രമാണ്'- മനോജ് ഫേസ്ബുക്കില്‍ കുറിച്ചു.

ദിലീപിനെ തിരിച്ചെടുത്ത തീരുമാനത്തിലൂടെ ആക്രമണത്തിനിരയായ നടിയെ അമ്മ വീണ്ടും അപമാനിക്കുകയാണ് എന്നായിരുന്നു വിമണ്‍ ഇന്‍ സിനിമ കളക്ടീവിന്റെ ആരോപണം. ഇതിനെതിരെയാണ് മനോജ് പ്രതികരണമറിയിച്ചത്.

ഇതിലൊക്കെ അപലപിച്ച്‌ അഭിപ്രായം പറയുന്നവരെ കാണുമ്ബോള്‍ ഓര്‍മ്മ വരുന്നത്, അന്യന്റെ വീട്ടില്‍ നിന്ന് അയല്‍ക്കാരുടെ നിര്‍ബന്ധം കാരണം ഇറക്കിവിട്ട മകളെ പിന്നീട് തിരിച്ചു വീട്ടില്‍ കയറ്റിയത് കണ്ട് പരവേശപ്പെടുന്ന കുശുമ്ബത്തി സുശീല ടീച്ചറിനെയാണെന്നും മനോജ് മറുപടി നല്‍കി.

ഫേസ്ബുക്ക് പോസ്റ്റിന്റെ പൂര്‍ണരൂപം:

AMMA എന്ന, "മലയാള ചലച്ചിത്ര അഭിനേതാക്കളുടെ മാത്രം സ്വകാര്യമായ" സംഘടനയുമായി, എനിക്കും യാതൊരു ബന്ധവും ഇല്ല. എന്നാലും WCC എന്ന ഫേസ്ബുക്ക് പേജിലെ പോസ്റ്റ് വായിക്കേണ്ടി വന്നതു കൊണ്ട് മാത്രം; ചിലത്
പറയാതെ വയ്യ.
അമ്മ, രാക്ഷ്ട്രീയത്തിലോ സാമൂഹത്തിലോ ഇടപെട്ടു പ്രവര്‍ത്തിക്കുന്ന പ്രസ്ഥാനമേ അല്ല, എന്തിന്, അതൊരു സ്വകാര്യ NGO പോലും അല്ല. അതിലെ അംഗങ്ങളുടെ മാത്രം ക്ഷേമം ലാക്കാക്കി, അതിലെ അംഗങ്ങളുടെ അഭിപ്രായ പ്രകാരം, അവരുടെ മൂലധനം കൊണ്ട്, അവര്‍ക്കായി മാത്രം പ്രവര്‍ത്തിക്കുന്ന സംഘടനയാണ്. സ്വാഭാവികമായും, അതിന്റെ തീരുമാനങ്ങളില്‍ അംഗങ്ങള്‍ക്കല്ലാതെ മറ്റാര്‍ക്കാണ് അവകാശം ! അതിലെ അംഗങ്ങള്‍ എടുക്കുന്ന തീരുമാനങ്ങള്‍ക്ക് എതിരെ പ്രതികരിക്കുന്നത്, ജനാധിപധ്യ വിരുദ്ധതയുള്‍ക്കൊള്ളുന്ന ശുദ്ധ മണ്ടത്തരവും, അതിലേറെ അന്യരിലേക്കുള്ള ഫാസിസ്റ്റ് കടന്നു കയറ്റ പ്രവണതയുമാണ്. അത്, സിപിഎം അംഗങ്ങള്‍ അവരുടെ പാര്‍ട്ടിക്കുള്ളില്‍ എടുക്കുന്ന തീരുമാനങ്ങളെ ബിജെപി വിമര്‍ശിക്കുന്നതു പോലുള്ള വിഡ്ഢിത്തനം പോലുമല്ല എന്നോര്‍ക്കണം; കാരണം സിപിഎം ജനകീയ പ്രസ്ഥാനമാണ്. അമ്മ അതിലെ അംഗങ്ങളുടെ സ്വകാര്യ പ്രസ്ഥാനം മാത്രമാണ്. അതാണീ WCC ടെ പോസ്റ്റിനെ മ്ലേച്ചമാക്കുന്നതും. ഒരു ആക്രമണത്തെ അതിജീവിച്ചവരും, മറ്റൊരു ആക്രമണത്തെ അതിജീവിക്കാന്‍ ശ്രമിക്കുന്നവരും സംഘടനയില്‍ ഒരുമിച്ചുണ്ടാവാന്‍ പാടില്ല എന്ന് ബൈലായില്‍ പറയുന്നുണ്ടോ എന്നറിയില്ല, ACT പ്രകാരം ഇല്ലെന്നുറപ്പ്. മറ്റൊന്ന്, ഒരു നീതിന്യായ സംവിധാനവും പറഞ്ഞിട്ടല്ലാ, പ്രസ്തുത അംഗത്തെ അവര്‍ പുറത്താക്കിയതും. അന്നാ അടിയന്തിര ഭരണസമിതിക്ക് അങ്ങിനെ തോന്നിയിട്ടുണ്ടാവും, ഇപ്പോള്‍ ജനറല്‍ ബോഡി അത് നിയമാനുസൃതമല്ല എന്ന് കണ്ട് തിരുത്തിയിട്ടും ഉണ്ടാവും. അത് അവരുടെ സംഘടനയുടെ അംഗങ്ങളുടെ ഐക്യകണ്ഠേനയുള്ള തീരുമാനമല്ലേ, അതവരുടെ അവകാശമല്ലേ ? നമ്മള്‍ പൊതു സമൂഹത്തെ ബാധിക്കുന്നതല്ല, അമ്മയുടേയോ, WCC ടെയോ പോലുള്ള സംഘടനകളുടെ തീരുമാനങ്ങള്‍ ഒന്നും തന്നെ.
ഇതിലൊക്കെ അപലപിച്ചഭിപ്രായം പറയുന്നവരെ കാണുമ്ബോള്‍ ഓര്‍മ്മ വരുന്നത്; അന്യന്റെ വീട്ടീന്ന് അയല്‍ക്കാരുടെ നിര്‍ബന്ധം കാരണം ഇറക്കിവിട്ട മകളെ പിന്നീട് തിരിച്ചു വീട്ടില്‍ കയറ്റിയത് കണ്ട് പരവേശപ്പെടുന്ന കുശുമ്ബത്തി സുശീല ടീച്ചറിനെയാണ് ! - ആശംസകളോടെ, Manoj Ramsingh