നടി ആക്രമിക്കപ്പെട്ട സംഭവത്തില്‍ കൃത്യമായ നിലപാട് പരസ്യമായി സ്വീകരിച്ച ഏക നടനായിരുന്നു പൃഥ്വിരാജ്. അതിലൂടെ പൊതുസമൂഹത്തിന്റെയാകെ പ്രശംസ പിടിച്ചുപറ്റുകയും ചെയ്തു. തുടര്‍ന്ന് ആക്രമണത്തിന് ഇരയായ നടിയെ തന്റെ സിനിമയില്‍ നായികയാക്കുകയും ചെയ്തു. ഇതോടെ നടിമാരുടെ ഇടയിലും യുവതാരങ്ങളുടെ ഇടയിലും താരത്തിന് സ്വീകാര്യത ലഭിച്ചു. ദിലീപിനെ പൊലീസ് അറസ്റ്റ് ചെയ്തതോടെ പുറത്താക്കണമെന്ന് ശക്തമായ നിലപാട് സ്വീകരിച്ചതും പൃഥ്വിരാജായിരുന്നു. പൃഥ്വിയുടെ സമ്മര്‍ദ്ദത്തിന് വഴങ്ങിയാണ് മമ്മൂട്ടിയും മോഹന്‍ലാലും അടക്കം ചേര്‍ന്ന് ദിലീപിനെ സംഘടനയില്‍ നിന്ന് പുറത്താക്കിയത്. 

കഴിഞ്ഞ ഞായറാഴ്ച ചേര്‍ന്ന അമ്മ ജനറല്‍ബോഡി യോഗം ദിലീപിനെ തിരിച്ചെടുത്ത നടപടി വിവാദമായതോടെ സംഘടയ്ക്കുള്ളിലും പുറത്തും വിവാദങ്ങള്‍ ഉയര്‍ന്നു. എന്നിട്ടും പൃഥ്വിരാജ് തന്റെ നിലപാട് ഇതുവരെ വ്യക്തമാക്കിയിട്ടില്ല. അമ്മയിലെ പല നിലപാടുകളിലും പ്രതിഷേധിച്ച് പൃഥ്വിരാജ് അടക്കമുള്ള യുവതാരങ്ങള്‍ മഴവില്ലിന്‍ അമ്മ ഷോയിലും ജനറല്‍ബോഡിയിലും പങ്കെടുത്തിരുന്നില്ല. ദിലീപിനെ തിരിച്ചെടുക്കുമെന്ന തീരുമാനം അറിഞ്ഞാണ് പലരും പങ്കെടുക്കാത്തതെന്ന് അറിയുന്നു. സാധാരണ ഫെയിസ്ബുക്കിലൂടെയും പൃഥ്വിരാജ് തന്റെ നിലപാടുകള്‍ അറിയിച്ചിരുന്നു. ഇത്തവണ അതും ഉണ്ടായില്ല.

മോഹന്‍ലാലിന്റെ നേതൃത്വത്തെ വിമര്‍ശിക്കാന്‍ പൃഥ്വിരാജിന് തല്‍ക്കാലം പറ്റാത്ത അവസ്ഥയാണുള്ളത്. മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ലൂസിഫര്‍ എന്ന സിനിമ ജൂലായില്‍ ചിത്രീകരണം തുടങ്ങുകയാണ്. അതിന് മുമ്പ് അമ്മയുടെ നിലപാടിനെ വിമര്‍ശിച്ച് മോഹന്‍ലാലുമായി അകലം ഉണ്ടാക്കേണ്ടെന്ന നിലപാടിലാണ് പൃഥ്വിരാജ് എന്നറിയുന്നു. മാത്രമല്ല സംഭവം കൂടുതല്‍ വിവാദമാക്കരുതെന്ന് മോഹന്‍ലാലും മമ്മൂട്ടിയും പൃഥ്വിരാജിനോട് സംസാരിച്ചിട്ടുണ്ട്. ഇവര്‍ രണ്ട് പേരുമായുള്ള ബന്ധം വഷളാക്കണ്ടെന്ന് കരുതിയാണ് പൃഥ്വിരാജ് മൗനംപാലിക്കുന്നത്. താമസിക്കാതെ നിലപാട് അറിയിക്കുമെന്നും സൂചനയുണ്ട്.