താരസംഘടനയായ അമ്മയുമായി ബന്ധപ്പെട്ട വിവാദങ്ങൾ കൊടുമ്പിരികൊള്ളുമ്പോളും സംഘടനാ വക്താക്കളിൽ നിന്നും യാതൊരു പ്രതികരണവും ഉണ്ടാകാത്തതിൽ വ്യാപക പ്രതിഷേധം. മോഹൻലാൽ എത്തിയതിനു ശേഷം മാത്രമേ ഇതുസംബന്ധിച്ച് പ്രതികരണം ഉണ്ടാകുള്ളൂ എന്നാണ് സൂചന. നിലവിൽ സൂര്യക്ക് ഒപ്പമുള്ള തമിഴ് സിനിമയുടെ ഷൂട്ടിങ് തിരക്കിലാണ് മോഹൻലാൽ. എന്നാൽ ഷൂട്ടിങ്ങിനു ശേഷം അടുത്ത ദിവസം തന്നെ സ്വകാര്യ ആവശ്യങ്ങൾക്കായി മോഹൻലാൽ ലണ്ടനിലേക്ക് പോകും. അതിനുശേഷം ജൂലൈ പത്തിനു ശേഷം മാത്രമേ അദ്ദേഹം കേരളത്തിലേക്ക് തിരികെ വരുള്ളൂ. അതുവരെയും 'അമ്മ തീരുമാനത്തിനായി കാത്തിരിക്കും എന്നാണ് ലഭിക്കുന്ന വിവരം.

മോഹൻലാൽ തിരികയെത്തി വിഷയം ചർച്ച ചെയ്തതിന് ശേഷം മാത്രമേ ഇക്കാര്യത്തിൽ അമ്മയുടെ ഔദ്യോഗിക നിലപാട് ഉണ്ടാകുള്ളൂ. കൂടുതൽ വിവാദങ്ങൾക്ക് വഴിവയ്ക്കാൻ താൽപര്യമില്ലാത്തത്കൊണ്ട് തന്നെയാണ് അമ്മയുടെ ഇത്തരത്തിലുള്ള മൗനം. അതുകൊണ്ടുതന്നെയാണ് മോഹൻലാലിന്റെ തിരിച്ചുവരവ് വരെ കാത്തിരിക്കാം എന്ന നിലപാടുമായി 'അമ്മ രംഗത്ത് വന്നിരിക്കുന്നത്. ഇതിനിടയിൽ ദിലീപിന് പൂർണ പിന്തുണയുമായി തീയറ്റർ സംഘടനയായ ഫിയോക്ക് രംഗത്ത് വന്നു. കോടതി കുറ്റക്കാരനാണെന്ന് പ്രഖ്യാപിക്കും വരെ ദിലീപിന് പൂർണ പിന്തുണ നൽകാനാണ് ഫിയോക്കിന്റെ തീരുമാനം