സാമ്പത്തിക കാര്യങ്ങളിലെ ആശങ്കയും പണം തിരികെ വാങ്ങുന്നതില്‍ കാണിക്കുന്ന കര്‍ക്കശമായ നിലപാടും തുറന്നുപറഞ്ഞ നിഖിലയുടെ അഭിമുഖത്തിലെ വാക്കുകള്‍ സോഷ്യല്‍ മീഡിയയില്‍ ശ്രദ്ധ നേടുകയാണ്. പണം സമ്പാദിക്കുന്നതിനേക്കാള്‍ അത് നഷ്ടപ്പെടാതെ സൂക്ഷിക്കുന്നതിനാണ് താന്‍ പ്രാധാന്യം നല്‍കുന്നതെന്ന് നടി നിഖില വിമല്‍ പറയുന്നു. നിക്ഷേപം നടത്തി പണം ഇരട്ടിപ്പിക്കുന്നതിനേക്കാള്‍ നല്ലത് കൈവശമുള്ള തുക സുരക്ഷിതമായി നിലനിര്‍ത്താനാണ് ശ്രമിക്കുന്നതെന്നും താരം പറഞ്ഞു. ഒരു യൂട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു നിഖില.

കയ്യിലുളള പണം നിക്ഷേപിച്ച് അതിന്റെ മൂല്യം വര്‍ദ്ധിപ്പിക്കണമെന്ന ചിന്ത തനിക്കും അമ്മയ്ക്കും ഒരുപോലെ ആശങ്കയുണ്ടാക്കുന്നതാണെന്ന് നിഖില വ്യക്തമാക്കി. താനൊരു പിശുക്കിയാണ്. അഞ്ച് ലക്ഷം രൂപ കൈവശമുണ്ടെങ്കില്‍ അത് പത്തോ ഇരുപതോ ലക്ഷമാക്കുന്നതിനേക്കാള്‍ ആ തുക നഷ്ടപ്പെടാതെ സൂക്ഷിക്കാനാണ് തങ്ങള്‍ ശ്രമിക്കുന്നതെന്നും താരം പറഞ്ഞു.

പണം ലാഭിക്കാനും സൂക്ഷിച്ചുവയ്ക്കാനും താല്‍പര്യമുണ്ടെങ്കിലും അത് എങ്ങനെ ഇരട്ടിയാക്കാമെന്ന് അറിയില്ലെന്നും താന്‍ പഴയ രീതികള്‍ പിന്തുടരുന്ന ആളാണെന്നും നിഖില പറയുന്നു. നിക്ഷേപവുമായി ബന്ധപ്പെട്ട സങ്കീര്‍ണതകളോടുള്ള ഭയവും താരം അഭിമുഖത്തില്‍ പങ്കുവച്ചു. പണം നിക്ഷേപിക്കാന്‍ തയ്യാറാണെങ്കിലും അതുമായി ബന്ധപ്പെട്ട കാര്യങ്ങള്‍ വിശദമായി പറഞ്ഞ് ഭയപ്പെടുത്തരുതെന്നാണ് കണ്‍സള്‍ട്ടന്‍സി സ്ഥാപനങ്ങളോട് ആവശ്യപ്പെടാറുള്ളതെന്ന് നിഖില പറഞ്ഞു. നിക്ഷേപത്തില്‍ നഷ്ടമുണ്ടാകാന്‍ സാധ്യതയുണ്ടെന്ന് കേട്ടാല്‍ പണം നിക്ഷേപിക്കുന്നതില്‍ നിന്ന് പിന്മാറുമെന്നും താരം വെളിപ്പെടുത്തി.

സാമ്പത്തിക ഇടപാടുകളില്‍ വിട്ടുവീഴ്ച ചെയ്യാത്ത സ്വഭാവമാണ് തനിക്കുള്ളതെന്നും നിഖിലയുടെ വാക്കുകള്‍ വ്യക്തമാക്കുന്നു. നല്‍കാനുള്ള പണം കൃത്യസമയത്ത് ലഭിച്ചില്ലെങ്കില്‍ അത് തിരികെ കിട്ടുന്നതുവരെ ബന്ധപ്പെട്ടവരെ നിരന്തരം ഓര്‍മിപ്പിക്കുമെന്നും താരം പറയുന്നുണ്ട്. പണം ചോദിക്കാന്‍ മടിക്കില്ലെന്നും സിനിമാരംഗത്ത് പ്രവര്‍ത്തിക്കുമ്പോള്‍ ഇത്തരം സാഹചര്യങ്ങള്‍ നേരിടാന്‍ തൊലിക്കട്ടി ആവശ്യമാണെന്നും നിഖില അഭിപ്രായപ്പെട്ടു.

മൈക്ക് ഓഫ് ചെയ്ത് പറയുന്ന കാര്യങ്ങള്‍ പരസ്യമായി പറയാന്‍ തനിക്ക് മടിയില്ലെന്നും അങ്ങനെ ചെയ്യുമ്പോള്‍ പണം നല്‍കാനുള്ളവര്‍ക്ക് നാണക്കേട് തോന്നുമെന്നും താരം പറഞ്ഞു. ഇതുവഴി പലരും പണം തിരികെ നല്‍കാറുണ്ടെന്നും നിഖില കൂട്ടിച്ചേര്‍ത്തു. എന്നാല്‍, പണം വൈകി നല്‍കിയവരോട് പരസ്യമായി കയര്‍ത്തു സംസാരിക്കുന്നതിന് പകരം മറ്റ് ഇടങ്ങളില്‍ ഇക്കാര്യം ഉന്നയിക്കുകയാണ് തന്റെ രീതിയെന്നും താരം അഭിമുഖത്തില്‍ വ്യക്തമാക്കി.