രാഹുല്‍ ഗാന്ധിയുടെ റോഡ് ഷോ ഇന്നു മലപ്പുറം ജില്ലയില്‍....ആറു സ്ഥലങ്ങളിലാണ് ഇന്ന് റോഡ് ഷോ നടക്കുന്നത്, വൈകിട്ട് കരുവാരക്കുണ്ടില്‍ നടക്കുന്ന റോഡ് ഷോക്ക് ശേഷം രാഹുല്‍ ഹെലികോപ്റ്ററില്‍ കണ്ണൂര്‍ വിമാനത്താവളത്തിലേക്ക് തിരിക്കും

ഏറനാട്, വണ്ടൂര്‍ നിലമ്പുര്‍ നിയമസഭാ മണ്ഡലങ്ങളില്‍ ആണ് റോഡ് ഷോ നടക്കുക. കോഴിക്കോട് ജില്ലയിലെ പരിപാടികള്‍ക്ക് ശേഷം രാഹുല്‍ രാവിലെ 11.30ഓടെ മലപ്പുറം കീഴുപറമ്പില്‍ എത്തും. കീഴുപറമ്പ് അങ്ങാടിയില്‍ നടത്തുന്ന റോഡ് ഷോ യില്‍ മുസ്ലിം ലീഗ് നേതാക്കള്‍ ഉള്‍പ്പെടെ പങ്കെടുക്കുകയും ചെയ്യും.

അതേസമയം വയനാട് ലോക്‌സഭ മണ്ഡലത്തില്‍ തെരഞ്ഞെടുപ്പ് പ്രചരണത്തിനിടെ മുഖ്യമന്ത്രി പിണറായി വിജയനെതിരെ വിമര്‍ശനവുമായി രാഹുല്‍ ഗാന്ധി രംഗത്തെത്തി. എന്തുകൊണ്ടാണ് കേരള മുഖ്യമന്ത്രി തന്നെ ആക്രമിക്കുന്നതെന്നായിരുന്നു രാഹുല്‍ ഗാന്ധിയുടെ ചോദ്യം. പ്രധാനമന്ത്രി നരേന്ദ്ര മോദിക്കെതിരേ പറയാനായി പിണറായി മടിക്കുന്നുവെന്നും രാഹുല്‍ വിമര്‍ശിക്കുകയും ചെയ്തു.

ഇടവേളകളില്ലാതെ താന്‍ സംഘപരിവാര്‍ ആശയങ്ങളെ കടന്നാക്രമിച്ചെന്നും പാര്‍ലമെന്റില്‍ നിന്ന് തന്റെ പ്രസംഗം നീക്കം ചെയ്‌തെന്നും രാഹുല്‍ ചൂണ്ടികാട്ടി.

അതേസമയം തന്നെ രാഹുല്‍ കേരളത്തെ വാനോളം പുകഴ്ത്തിയാണ് സംസാരിച്ചത്. കഴിഞ്ഞ 5 വര്‍ഷം കൊണ്ട് കേരളീയര്‍ എന്നെ പലതും പഠിപ്പിച്ചു. കേരളത്തിന് തനതായ സംസ്‌കാരം ഉണ്ട്. ഇന്ത്യയുടെ അതിരുകള്‍ക്ക് ഉള്ളിലും പുറത്തും മലയാളികള്‍ മികച്ച പ്രവര്‍ത്തനം നടത്തുന്നു. കേരളം വിഭജിക്കപ്പെടണമെന്നാണ് അവര്‍ ആഗ്രഹിക്കുന്നത്. എന്നാല്‍ അവര്‍ക്കുള്ള മറുപടി കേരളം നിശ്ശബ്ദമായി തയ്യാറാക്കി കൊണ്ടിരിക്കുകയാണ്.

അബ്ദുല്‍ റഹീമിന്റെ മോചന ശ്രമങ്ങള്‍ എടുത്ത് പറഞ്ഞാണ് രാഹുല്‍ കേരളത്തെ വാഴ്ത്തിയത്. അക്കാര്യത്തില്‍ കേരളം ഒറ്റക്കെട്ടായി കൂടെ നിന്നു. വെറുപ്പിന്റെ രാഷ്ട്രീയത്തെ കേരളം ഒറ്റപ്പെടുത്തി. ഒരു രാജ്യം ഒരു നേതാവ് ഒരു ഭാഷ എന്ന് പറയുന്നവര്‍ സമൂഹത്തെ അപമാനിക്കാന്‍ ശ്രമിക്കുന്നു. രാജ്യത്തിന്റെ സ്വഭാവ സവിശേഷത മനസ്സിലാക്കാനായി പ്രധാനമന്ത്രിക്ക് കഴിയുന്നില്ല. വൈവിധ്യം രാജ്യത്തിന്റെ കരുത്ത് ആണെന്ന് അദ്ദേഹത്തിന് തിരിച്ചറിയാന്‍ ആകുന്നില്ല. അദ്ദേഹത്തിന് അധികാരം മാത്രമാണ് ലക്ഷ്യമെന്നും കുറ്റപ്പെടുത്തി രാഹുല്‍ .