ഇന്ത്യന്‍ ഗതിനിര്‍ണ്ണയ സംവിധാനത്തിലെ ( നാവിക് ) പുതിയ ഉപഗ്രഹത്തിന്റെ വിക്ഷേപണം പരാജയം. ഏഴ് ഉപഗ്രഹ പരമ്പരയിലെ ഐ.ആര്‍.എന്‍. എസ്.എസ്1 എച്ച് വിക്ഷേപണമാണ് പരാജയപ്പെട്ടത്. വിക്ഷേപണ സമയത്തെ ചൂടില്‍ നിന്ന് ഉപഗ്രഹത്തെ സംരക്ഷിക്കുന്ന സംവിധാനത്തിലെ പാളിച്ചയാണ് വിക്ഷേപണം പരാജയപ്പെടാന്‍ കാരണം.

2013 ജൂലായ് ഒന്നിന് അയച്ച ആദ്യ ഗതിനിര്‍ണ്ണയ ഉപഗ്രഹം തകരാറിലായതിനെ തുടര്‍ന്നാണ് പുതിയ ഉപഗ്രഹം വിക്ഷേപിക്കേണ്ടി വന്നത്. എന്നാല്‍ പുതിയ ഉപഗ്രഹത്തിന്റെ വിക്ഷേപണം കൂടി പരാജയമായതോടെ ഐ.എസ്.ആര്‍.ഓയ്ക്ക് തിരിച്ചടിയായി.

ഇന്ത്യയുടെ വിശ്വസ്ത വിക്ഷേപണ വാഹനമായ പി. എസ്. എല്‍. വിസി 39 റോക്കറ്റായിരുന്നു വിക്ഷേപണത്തിനായി ഉപയോഗിച്ചത്. 1425 കിലോഗ്രാം ഭാരമുള്ള ഉപഗ്രഹത്തില്‍ സ്ഥാനനിര്‍ണ്ണയം കൃത്യമാക്കാന്‍ അനിവാര്യമായ മൂന്ന് അറ്റോമിക് ഫ്രീക്വന്‍സി സ്റ്റാന്‍ഡേര്‍ഡ് ക്‌ളോക്കുകളാണുള്ളത്. 2013 ജൂലായ് ഒന്നിന് അയച്ച ആദ്യ ഉപഗ്രഹത്തിലെ ക്‌ളോക്കുകള്‍ കേടായതിനാലാണ് പുതിയ വിക്ഷേപണം അനിവാര്യമായത്.