കടകംപള്ളിയുടെ ഗുരുവായൂര് ദര്ശനം; വിവാദമാക്കേണ്ടെന്ന നിലപാടില് സി.പി.എം
ദേവസ്വംമന്ത്രി കടകംപള്ളി സുരേന്ദ്രന്റെ ഗുരുവായൂര് ക്ഷേത്രദര്ശനം വിവാദമാക്കേണ്ടതില്ലെന്ന് സി.പി.എം തീരുമാനിച്ചു. തിരുവനന്തപുരത്ത് ചേര്ന്ന പാര്ട്ടി സെക്രട്ടേറിയറ്റ് യോഗത്തിലാണ് ഇതുസംബന്ധിച്ച ധാരണയായത്. ക്ഷേത്രദര്ശനം സംബന്ധിച്ച വിവാദങ്ങള് പാര്ട്ടിക്ക് ഗുണം ചെയ്യില്ലെന്ന് യോഗം വിലയിരുത്തി.
സംഭവത്തില് ബി.ജെ.പി ഇതിനോടകം മുതലെടുപ്പ് ആരംഭിച്ചിട്ടുണ്ടെന്ന് യോഗത്തില് ചില നേതാക്കള് ചൂണ്ടിക്കാട്ടി. ഈ സാഹചര്യത്തില് തുടര്നടപടികളിലേക്ക് കടക്കാതെ മന്ത്രിയുടെ വിശദീകരണം സ്വീകരിച്ച് വിവാദം അവസാനിപ്പിക്കാനാണ് പാര്ട്ടി തീരുമാനം.
യോഗത്തില് കടകംപള്ളിയുടെ വിശദീകരണം സംസ്ഥാന സെക്രട്ടറി കോടിയേരി ബാലകൃഷ്ണന് റിപ്പോര്ട്ട് ചെയ്തു. ക്ഷേത്രാചാരങ്ങള് പാലിച്ചത് ചിലര് വിവാദമാക്കുകയായിരുന്നുവെന്ന് മന്ത്രി പാര്ട്ടിക്ക് നല്കിയ വിശദീകരണത്തില് പറയുന്നു. ഈ വിശദീകരണം തൃപ്തികരമാണെന്നാണ് പാര്ട്ടിയുടെ നിലപാട്.
ഗുരുവായൂര് ക്ഷേത്രത്തില് ദര്ശനം നടത്തിയതിന് ദേവസ്വം മന്ത്രിയോട് വിശദീകരണം തേടിയ സംഭവം സി.പി.എം നേരിടുന്ന ആശയപാപ്പരത്തതിന്റെ സൂചനയാണെന്ന വിമര്ശനവുമായി ബി.ജെ.പി സംസ്ഥാന അദ്ധ്യക്ഷന് കുമ്മനം രാജശേഖരന് നേരത്തെ രംഗത്ത് വന്നിരുന്നു.
സി.പി.എം നടപടി അവരുടെ ഹിന്ദു വിരുദ്ധ മനോഭാവത്തിനുള്ള ഏറ്റവും നല്ല ഉദാഹരണമാണെന്നും സി.പി.എമ്മില് പ്രവര്ത്തിക്കണമെങ്കില് ഭൂരിപക്ഷ സമുദായാംഗങ്ങള് ആത്മാഭിമാനം പണയം വെക്കണമെന്ന അവസ്ഥ പരിതാപകരമാണെന്നും കുമ്മനം കുറ്റപ്പെടുത്തിയിരുന്നു.
https://www.facebook.com/Malayalivartha
