സ്വകാര്യ ആശുപത്രിയിലെ നഴ്‌സുമാരുടെ ശമ്പള വര്‍ധനവ് സംബന്ധിച്ച് റിപ്പോര്‍ട്ട് സമര്‍പ്പിച്ച മിനിമം വേജസ് കമ്മിറ്റിയുടെ ശിപാര്‍ശകള്‍ നടപ്പാക്കുന്നത് സുപ്രീംകോടതി സ്‌റ്റേ ചെയ്തു. സ്വകാര്യ ആശുപത്രി മാനേജ്‌മെന്റുകളുടെ ഹര്‍ജി പരിഗണിച്ചാണ് കോടതി നടപടിയുണ്ടായിരിക്കുന്നത്. ഹര്‍ജി നവംബര്‍ രണ്ടിന് വീണ്ടും പരിഗണിക്കും.

നേരത്തെ സ്വകാര്യ ആശുപത്രി നഴ്‌സുമാരുടെ ശന്പള വര്‍ധനവും ജോലി പരിഷ്‌കരണവും സംബന്ധിച്ച പഠനത്തിനായി സര്‍ക്കാര്‍ മിനിമം വേജസ് കമ്മിറ്റിയെ ചുമതലപ്പെടുത്തിയിരുന്നു. നഴ്‌സുമാര്‍ക്ക് അടിസ്ഥാന ശന്പളമായി 20,000 രൂപ നല്‍കണമെന്നായിരുന്നു കമ്മിറ്റിയുടെ പ്രധാന ശിപാര്‍ശ.
മാനേജ്‌മെന്റ് പ്രതിനിധികളുടെ വിയോജിപ്പോടെയാണ് കമ്മിറ്റി സര്‍ക്കാരിന് റിപ്പോര്‍ട്ട് സമര്‍പ്പിച്ചിരുന്നത്. റിപ്പോര്‍ട്ട് സര്‍ക്കാര്‍ അംഗീകരിച്ചതോടെയാണ് മാനേജ്‌മെന്റുകള്‍ കോടതിയെ സമീപിച്ചത്.