സംസ്ഥാന സ്‌കൂള്‍ ശാസ്‌ത്രോത്സവം നവംബര്‍ 23 മുതല്‍ 26 വരെ കോഴിക്കോട്ട് നടക്കും. 217 ഇനങ്ങളിലായി 6802 മത്സരാര്‍ഥികള്‍ മേളയില്‍ മാറ്റുരക്കും. പ്രവൃത്തിപരിചയ മേളയില്‍ 3500, ശാസ്ത്രമേളയില്‍ 1120, ഗണിതശാസ്ത്ര മേളയില്‍ 924, സാമൂഹികശാസ്ത്ര മേളയില്‍ 700, ഐ.ടി മേളയില്‍ 308, വൊക്കേഷനല്‍ എക്‌സ്‌പോയില്‍ 250 എന്നിങ്ങനെയാണ് മത്സരാര്‍ഥികളുടെ എണ്ണം. 37 ഇനങ്ങളിലായി സ്‌പെഷല്‍ സ്‌കൂള്‍ വിദ്യാര്‍ഥികളും മത്സരത്തിനെത്തും.

മലബാര്‍ ക്രിസ്ത്യന്‍ കോളജ് വേദിയില്‍ 24ന് രാവിലെ 10ന് വിദ്യാഭ്യാസ മന്ത്രി പ്രഫ. സി. രവീന്ദ്രനാഥ് മേള ഉദ്ഘാടനംചെയ്യും. പൊതുവിദ്യാഭ്യാസ ഡയറക്ടര്‍ കെ.വി. മോഹന്‍കുമാര്‍ പതാക ഉയര്‍ത്തും. സമാപന സമ്മേളനം 26ന് വൈകീട്ട് മൂന്നിന് മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്യും. മന്ത്രി ടി.പി. രാമകൃഷ്ണന്‍ സമ്മാനങ്ങള്‍ വിതരണം ചെയ്യും.

ശാസ്ത്രമേള സന്റെ് ജോസഫ്‌സ് ആഗ്ലോ ഇന്ത്യന്‍ ഗേള്‍സ് എച്ച്.എസ്, നടക്കാവ് ഗവ. ഗേള്‍സ് എച്ച്.എസ്.എസ്, സന്റെ് ആഞ്ജലാസ് ആഗ്ലോ ഇന്ത്യന്‍ യു.പി സ്‌കൂള്‍ എന്നിവിടങ്ങളിലും ഗണിതശാസ്ത്ര മേള സെന്റ് ജോസഫ്‌സ് ബോയ്‌സ് എച്ച്.എസ്.എസിലും സാമൂഹിക ശാസ്ത്രമേള ബി.ഇ.എം ഗേള്‍സ് എച്ച്.എസ്.എസിലും പ്രവൃത്തി പരിചയമേള മലബാര്‍ ക്രിസ്ത്യന്‍ കോളജ് എച്ച്.എസ്.എസിലും ഐ.ടി മേളയും ആര്‍.എം.എസ്.എ സയന്‍സ് എക്‌സിബിഷനും നടക്കാവ് ഗവ. ഗേള്‍സ് എച്ച്.എസ്.എസിലും വൊക്കേഷനല്‍ എക്‌സ്‌പോ ഗവ. മോഡല്‍ എച്ച്.എസ്.എസിലുമാണ് നടക്കുകയെന്ന് സംഘാടക സമിതി ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു.

ഒന്നും രണ്ടും മൂന്നും സ്ഥാനക്കാര്‍ക്ക് വ്യക്തിഗത ട്രോഫിയും സര്‍ട്ടിഫിക്കറ്റും നല്‍കും. രജിസ്‌ട്രേഷന്‍ 23ന് രാവിലെ 8.30ന് നടക്കാവ് ഗവ. ഗേള്‍സിലെ ആറ് കൗണ്ടറുകളിലായി നടക്കും. ക്രിസ്ത്യന്‍ കോളജില്‍ 60,000 സ്‌ക്വയര്‍ഫീറ്റ് വിസ്തൃതിയില്‍ ഒരുക്കുന്ന പന്തലാണ് മേളയുടെ പ്രധാന വേദി. ഗവ. മോഡല്‍ എച്ച്.എസ്.എസില്‍ എക്‌സ്‌പോ, കരിയര്‍ ഫെസ്റ്റ് എന്നിവക്കായി 95 സ്റ്റാളുകളും ഒരുങ്ങുകയാണ്. 25ന് പൊതുജനങ്ങള്‍ക്ക് മേള കാണാനും ഉല്‍പന്നങ്ങള്‍ വാങ്ങാനും അവസരമുണ്ടാകും. എല്ലാ വേദികളിലും ആംബുലന്‍സ് അടക്കം മെഡിക്കല്‍ ടീമിന്റെ സേവനമുണ്ടാകും. ബീച്ചിലാണ് വാഹന പാര്‍ക്കിങ്.ചെയര്‍മാന്‍ എ. പ്രദീപ്കുമാര്‍ എം.എല്‍.എ, അഡീഷനല്‍ ഡി.പി.ഐ ജിമ്മി കെ. ജോസ്, ഡി.ഡി.ഇ ഇ.കെ. സുരേഷ് കുമാര്‍, ആനിമോള്‍ കുര്യന്‍, കമാല്‍ വരദൂര്‍, കെ.സി. ഫസലുല്‍ ഹഖ് തുടങ്ങിയവര്‍ വാര്‍ത്തസമ്മേളനത്തില്‍ പങ്കെടുത്തു.