കുറ്റപത്രം കടുപ്പിക്കും... ദുബായില് കോംപ്രമൈസ് നടക്കുന്നുണ്ടോന്ന് കര്ശനമായി നിരീക്ഷിക്കാന് പോലീസ്; യാത്രാ സമയത്ത് യുഎഇലേക്ക് പറന്നവര്ക്ക് നിഴലായി പോലീസ്; രാജ്യം വിട്ടാല് പിന്നെ പേടിക്കാനില്ലെന്ന തോന്നല് വരുത്തിവയ്ക്കുന്നത്
പുട്ടുകടയുടെ ഉദ്ഘാടന വേളയില് ദുബായിലേക്ക് പറക്കാന് കോടതി അനുമതി നല്കവേ ശക്തമായ നീക്കങ്ങളുമായി പോലീസും. കേസിന്റെ പല സാക്ഷികളുമായും കോംപ്രമൈസ് നീക്കങ്ങള് ദുബായില് വച്ച് നടക്കുമെന്നാണ് പോലീസിന്റെ നിഗമനം. ഇക്കാര്യങ്ങള് അവര് കോടതിയുടെ മുമ്പാകെ കൊണ്ടു വരികയും ചെയ്യും. രാജ്യം വിട്ടാല് പിന്നെ പേടിക്കാനില്ലെന്ന തോന്നല് സാക്ഷികളെ സ്വാധീനിക്കുമെന്ന് തന്നെയാണ് പോലീസ് കരുതുന്നത്. അതേസമയം തന്നെ ദിലീപിന്റെ യാത്രാ സമയത്ത് യുഎഇലേക്ക് പറന്നവര്ക്ക് നിഴലായി പോലീസും പിന്നാലെയുണ്ട്. അവരുടെ നീക്കങ്ങള് ശക്തമായി നിരീക്ഷിക്കും. അവരുടെ യാത്രാ രേഖകളും സാമ്പത്തിക സ്ത്രോതസുകളും പരിശോധിക്കാനും നീക്കമുണ്ട്.
അതേസമയം നടിയെ ആക്രമിച്ച കേസില് നടന് ദിലീപിനെതിരെ ഇന്ന് അങ്കമാലി മജിസ്ട്രേറ്റ് കോടതിയില് കുറ്റപത്രം സമര്പ്പിക്കുമെന്ന് വിവരം. ദിലീപ് എട്ടാം പ്രതിയാകും. അന്തിമ കുറ്റപത്രത്തില് ദിലീപ് ഉള്പ്പടെ 11 പ്രതികള് ഉണ്ടാകും. 450 രേഖകളും മുന്നൂറിലേറെ സാക്ഷികളും കുറ്റപത്രത്തിന്റെ ഭാഗമാകും. ഗൂഡാലോചനയില് ദിലീപിന്റെയും പള്സര് സുനിയുടെയും പേരുകള് മാത്രമാണ് ഉള്ളത്. വിദേശത്ത് പോകാന് ഹൈക്കോടതി കഴിഞ്ഞ ദിവസം അനുമതി നല്കിയ സാഹചര്യത്തിലാണ് കുറ്റപത്രം എത്രയും പെട്ടെന്ന് സമര്പ്പിക്കാനുള്ള തീരുമാനത്തിലേക്ക് അന്വേഷണ സംഘം എത്തിയത്. ഇതിന്റെ ഭാഗമായി കഴിഞ്ഞ ദിവസം സംസ്ഥാന പൊലീസ് മേധാവി ലോക്നാഥ് ബെഹ്റ ഹൈക്കോടതിയിലെത്തി ഡയറക്ടര് ജനറല് ഒഫ് പ്രോസിക്യൂഷനെ കണ്ടിരുന്നു.
കഴിഞ്ഞ മാസം ഏഴിന് കുറ്റപത്രം സമര്പ്പിക്കുമെന്നാണ് ആദ്യം അന്വേഷണ സംഘം വ്യക്തമാക്കിയിരുന്നത്. ഇതിനിടെ, അന്വേഷണ സംഘത്തെ ഞെട്ടിച്ച് ദിലീപിന് ഹൈക്കോടതിയില് നിന്നും ജാമ്യം ലഭിച്ചു. ഇതോടെ, കുറ്റപത്രം തിരക്കിട്ട് സമര്പ്പിക്കേണ്ട സാഹചര്യമില്ലെന്ന നിലപാടിലേക്ക് പൊലീസ് എത്തി. കേസിന്റെ അന്വേഷണച്ചുമതല ഉണ്ടായിരുന്ന എസ്.പി സുദര്ശനെ സോളാര് കേസുമായി ബന്ധപ്പെട്ട പ്രത്യേക അന്വേഷണ സംഘത്തിലുണ്ടായിരുന്ന മറ്റ് ഉദ്യോഗസ്ഥര്ക്കൊപ്പം സ്ഥലം മാറ്റിയതോടെ വീണ്ടും കുറ്റപത്രം വൈകുമെന്ന റിപ്പോര്ട്ടുകള് പുറത്ത് വന്നു. എന്നാല്, ദിലീപിനെതിരായ കുറ്റപത്രം തയ്യാറായ സാഹചര്യത്തില് എത്രയും വേഗത്തില് വിചാരണ കോടതിയില് സമര്പ്പിക്കാമെന്ന തീരുമാനത്തിലേക്ക് അന്വേഷണ സംഘം എത്തുകയായിരുന്നു.
കേസില്, സമഗ്രമായ കുറ്റപത്രം തന്നെയാണ് പൊലീസ് തയ്യാറാക്കിയിട്ടുള്ളത്. ഇതുവരെ അന്വേഷണ സംഘം വെളിപ്പെടുത്താത്ത ചില നിര്ണ്ണായക വിവരങ്ങളും കുറ്റപത്രത്തില് ഉണ്ടെന്നാണ് സൂചന. പ്രതികളുടെ ജാമ്യാപേക്ഷ പരിഗണിക്കുന്ന വേളകളില് മുദ്രവച്ച കവറില് കോടതിയില് നേരിട്ട് സമര്പ്പിച്ചിരുന്ന വിവരങ്ങളാണിത്. കൂട്ടമാനഭംഗം, ഗൂഢാലോചന, തട്ടിക്കൊണ്ടുപോകല്, തെളിവു നശിപ്പിക്കല്, പ്രതിയെ സംരക്ഷിക്കല്, തൊണ്ടി മുതല് സൂക്ഷിക്കല്, ഭീഷണി, അന്യായമായി തടങ്കലില് വയ്ക്കല് തുടങ്ങിയ വകുപ്പുകള് ദിലീപിനെതിരെ ചുമത്തും. കുറ്റപത്രം സമര്പ്പിച്ചാലും അന്വേഷണം തുടരുമെന്ന് കോടതിയെ അറിയിക്കും. ഇക്കാര്യം കുറ്റപത്രത്തില് അന്വേഷണസംഘം വ്യക്തമാക്കും.
ദിലീപിനൊപ്പം നേരത്തെ അറസ്റ്റിലായ രണ്ട് അഭിഭാഷകരെ കൂടി കുറ്റപത്രത്തില് ഉള്പ്പെടുത്തിയേക്കും. കുറ്റപത്രം സമര്പ്പിക്കുന്നതിന് മുമ്പ് മറ്റു ചില നിര്ണായക നീക്കങ്ങളും പൊലീസ് ആലോചിക്കുന്നുണ്ടെന്നാണ് അറിയുന്നത്.ഇരുപതിലേറെ നിര്ണായക തെളിവുകള് ചൂണ്ടിക്കാട്ടിയിട്ടുണ്ട്. കുറ്റസമ്മത മൊഴികള്, സാക്ഷിമൊഴികള്, കോടതി മുമ്പാകെ നല്കിയ രഹസ്യ മൊഴികള്, ഫോറന്സിക് റിപ്പോര്ട്ടുകള്, സൈബര് തെളിവുകള്, നേരിട്ടുള്ള തെളിവുകള്, സാഹചര്യ ത്തെളിവുകള് എന്നിവ പട്ടികയാക്കി പ്രത്യേക ഫയലുകളാക്കിയാണ് അനുബന്ധ കുറ്റപത്രമായി സമര്പ്പിക്കുന്നത്.
https://www.facebook.com/Malayalivartha
