പോലീസിന് കനത്ത തിരിച്ചടി നല്‍കിക്കൊണ്ടാണ് നടിയെ ആക്രമിച്ച കേസിലെ പ്രതിയായ ദിലീപിന് വിദേശത്തേക്ക് പോകാന്‍ കോടതി അനുമതി നല്‍കിയത്. കരാമയില്‍ ദേ പുട്ട് ശാഖയുടെ ഉദ്ഘാടനത്തിന് പോകാന്‍ വേണ്ടിയാണ് ജാമ്യവ്യവസ്ഥയില്‍ ദിലീപ് ഇളവ് തേടിയത്. നാല് ദിവസത്തേക്ക് ദുബായില്‍ പോകാന്‍ ഹൈക്കോടതി അനുമതി നല്‍കുകയും ചെയ്തു.

എന്നാല്‍ ദിലീപിന്റെ ദുബായ് യാത്രയ്ക്ക് മറ്റ് ചില ലക്ഷ്യങ്ങള്‍ കൂടിയുണ്ടെന്നാണ് സംവിധായകന്‍ ബൈജു കൊട്ടാരക്കരയുടെ വെളിപ്പെടുത്തല്‍. പോലീസ് സംശയിക്കുന്ന ചില കാര്യങ്ങള്‍ തന്നെയാണ് ബൈജു കൊട്ടാരക്കര വെളിപ്പെടുത്തിയിരിക്കുന്നത്. കഴിഞ്ഞ ഫെബ്രുവരി 17ന് തൃശൂരില്‍ നിന്നും എറണാകുളത്തേക്കുള്ള യാത്രയ്ക്കിടെയാണ് പ്രമുഖ നടി ക്രൂരമായി ആക്രമിക്കപ്പെട്ടത്. പള്‍സര്‍ സുനിയുടെ നേതൃത്വത്തിലുള്ള സംഘം നടിയെ ഉപദ്രവിച്ച് ദൃശ്യങ്ങള്‍ പകര്‍ത്തുകയായിരുന്നു.

ഈ ദൃശ്യങ്ങളും മൊബൈല്‍ ഫോണും കേസിലെ നിര്‍ണായക തെളിവാണ്. എന്നാലിവ കണ്ടെത്താന്‍ പോലീസിന് സാധിച്ചിട്ടില്ല. പലയിടത്തും നടത്തിയ അന്വേഷണങ്ങളൊക്കെ പാഴായി. ഫോണും മെമ്മറി കാര്‍ഡും നശിപ്പിച്ചുവെന്ന് പള്‍സര്‍ സുനിയുടെ അഭിഭാഷകന്‍ പ്രതീഷ് ചാക്കോ മൊഴി നല്‍കിയത് പോലീസ് കണക്കിലെടുത്തിട്ടില്ല. അതിനിടെ ദൃശ്യങ്ങള്‍ വിദേശത്തേക്ക് കടത്തിയെന്ന തരത്തിലും വാര്‍ത്തകള്‍ പ്രചരിച്ചിരുന്നു. പോലീസ് ഇക്കാര്യം സ്ഥിരീകരിച്ചിട്ടില്ല.

പോലീസ് ഇതുവരെ കണ്ടെത്തിയിട്ടില്ലാത്ത മൊബൈല്‍ ഫോണും മെമ്മറി കാര്‍ഡും പ്രതീഷ് ചാക്കോ പറഞ്ഞത് പോലെ നശിപ്പിക്കപ്പെട്ടിട്ടില്ല. അവ ഇതിനോടകം കടല്‍ കടന്നു കഴിഞ്ഞെന്നാണ് ബൈജു കൊട്ടാരക്കര വെളിപ്പെടുത്തിയിരിക്കുന്നത്. ദിലീപ് വിദേശത്തേക്ക് പോകുന്നത് നടിയെ ആക്രമിച്ച കേസിലെ സുപ്രധാന തെളിവ് നശിപ്പിക്കാന്‍ വേണ്ടിയാണെന്നും ബൈജു കൊട്ടാരക്കര ആരോപിച്ചു. ദിലീപിന്റെ ദുബായ് യാത്രയ്ക്ക് ഗൂഢലക്ഷ്യങ്ങളാണ് ഉള്ളത്. ആ തിരക്കിട്ട വിദേശ സന്ദര്‍ശനം ഒഴിവാക്കുന്നതില്‍ കേരള പോലീസ് പരാജയപ്പെട്ടുവെന്നും ബൈജു കൊട്ടാരക്കര പറഞ്ഞു.

കേരളത്തില്‍ ഇരുന്ന് തെളിവ് നശിപ്പിക്കാന്‍ ദിലീപിന് എളുപ്പമല്ല. അതേസമയം വിദേശത്തിരുന്ന് അത് എളുപ്പത്തില്‍ ചെയ്യാവുന്നതേ ഉള്ളൂ എന്നും ബൈജു കൊട്ടാരക്കര പറഞ്ഞതായി റിപ്പോര്‍ട്ട് ചെയ്തിരിക്കുന്നു. അത്രയധികം സ്വാധീനം ദിലീപിനുണ്ടെന്നും ബൈജു കൊട്ടാരക്കര പറഞ്ഞു. വന്‍ സ്വാധീനം ഉള്ളത് കൊണ്ട് തന്നെ ദിലീപ് എന്ത് നീചതന്ത്രം വേണമെങ്കിലും പ്രയോഗിക്കുമെന്നും ബൈജു ആരോപിച്ചു.

കേസിലെ തെളിവുകളേയും സാക്ഷികളേയും സ്വാധീനിക്കാന്‍ ദിലീപിന് സാധിക്കും. അതിനുള്ള ശ്രമങ്ങള്‍ നല്ല രീതിയില്‍ പുരോഗമിക്കുന്നുണ്ടെന്നും ബൈജു കൊട്ടരക്കര വെളിപ്പെടുത്തി. ദിലീപ് സാക്ഷികളെ സ്വാധീനിക്കുന്നതായി പോലീസും ആരോപിക്കുന്നുണ്ട്.