ദേ പുട്ട് റസ്റ്ററന്റിന്റെ ഉദ്ഘാടനത്തിന് ദിലീപ് ദുബായിലേയ്ക്ക് പറക്കുമ്പോൾ കൂടെ കാവ്യ ഉണ്ടാകില്ല; ഹണിമൂണിന് കിട്ടിയ സ്വീകരണം ഇത്തവണ ഉണ്ടാകുമോ?
നടി ആക്രമിക്കപ്പെട്ട കേസിലെ ജാമ്യാപേക്ഷയില് ഇളവ് ലഭിച്ച നടന് ദിലീപ് ഈ മാസം 28ന് ദുബൈയിലെത്തുമെന്നാണ് സൂചന.ദുബൈയുടെ ഹൃദയഭാഗമായ കരാമയില് ആരംഭിക്കുന്ന ദേ പുട്ട് റസ്റ്ററന്റിന്റെ ഉദ്ഘാടനം 29ന് നടക്കും. ഉദ്ഘാടനത്തിന് ശേഷം രണ്ടു ദിവസം ദുബൈയില് തങ്ങിയ ശേഷമായിരിക്കും കേരളത്തിലേയ്ക്ക് മടങ്ങുക. എന്നാല് ഭാര്യയും നടിയുമായ കാവ്യാ മാധവന് ദിലീപിനോടൊപ്പം ദുബൈയിലേയ്ക്ക് പോകില്ല.
ഇരുവരും വിവാഹം കഴിഞ്ഞ് ആദ്യമെത്തിയത് ദുബൈയിലായിരുന്നു. അന്ന് വന് സ്വീകരണം ലഭിച്ച നടന് ഈ വരവില് ഏതു തരം സ്വീകരണമാണ് ലഭിക്കുക എന്ന കാര്യത്തില് സുഹൃത്തുക്കള്ക്ക് ആശങ്കയുണ്ട്.യുവനടിയെ തട്ടിക്കൊണ്ടുപോയി ആക്രമിച്ച കേസില് ജാമ്യത്തിലിറങ്ങിയ ദിലീപിന് വിദേശത്തുപോകാന് നാലു ദിവസത്തേക്കാണ് കോടതി അനുമതി നല്കിയിരിക്കുന്നത്. ‘ദേ പുട്ട്’ റസ്റ്റോറന്റിന്റെ ഉദ്ഘാടനത്തിനായി ദുബൈയില് പോകാന് പാസ്പോര്ട്ട് വിട്ടു നല്കണമെന്ന ദിലീപിന്റെ അഭ്യര്ഥന അംഗീകരിച്ച കോടതി ദിലീപ് വിദേശത്തെ വിലാസം നല്കണമെന്നും ആവശ്യപ്പെട്ടിട്ടുണ്ട്.
എന്നാല്, എവിടെയാണ് തങ്ങുക എന്ന കാര്യത്തില് ഇതുവരെ തീരുമാനമായിട്ടില്ലെന്ന് ദിലിപീന്റെ ദുബൈയിലെ അടുത്തവൃത്തങ്ങള് പറഞ്ഞു. ദിലീപിന് ദുബൈയില് ഒട്ടേറെ സുഹൃത്തുക്കളും ബിസിനസ് പാര്ട്ണര്മാരുമുണ്ട്. നാദിര്ഷയും ദുബൈയിലെ ബിസിനസുകാരുമടക്കം അഞ്ചു പേര് ചേര്ന്നാണ് ദേ പുട്ട് കരാമയില് ആരംഭിക്കുന്നത്. നാദിര്ഷയും ദുബൈയിലെ പാര്ട്ണര്മാരുമാണ് റസ്റ്ററന്റിന്റെ നിയമപരമായ രേഖകള് തയ്യാറാക്കിയത്. ദിലീപ് അറസ്റ്റിലാകുന്നതിന് മുന്പ് തന്നെ റസ്റ്ററന്റ് ഉദ്ഘാടനത്തിന് തയ്യാറായിരുന്നു. എന്നാല്, അറസ്റ്റോടെ അത് നീട്ടിവയ്ക്കുകയായിരുന്നു.
ദിലീപിന്റെ ജയില്വാസം നീണ്ടുപോയതോടെ വന് തുക ചെലവിട്ട് ഒരുക്കിയ റസ്റ്റോറന്റിന്റെ ഭാവി അടഞ്ഞുപോകുമോ എന്ന ആശങ്ക ദുബായിലെ സുഹൃത്തുക്കള്ക്ക് പോലുമുണ്ടായിരുന്നു. പിന്നീട്, ജാമ്യം ലഭിച്ചതോടെയാണ് അവസാന മിനുക്കു പണികള് നടത്തി ഉദ്ഘാടനത്തിന് ഒരുക്കിയത്. ഒട്ടേറെ മലയാളി റസ്റ്റോറന്റുകളുള്ള ദുബൈയിലെ പ്രധാനസ്ഥലമാണ് കരാമ. മലയാളി കുടുംബങ്ങള് നിരവധി താമസിക്കുന്ന പ്രദേശം കൂടിയാണിത്.
വാരാന്ത്യദിനങ്ങളായ വ്യാഴാഴ്ച വൈകിട്ടും വെള്ളി, ശനി ദിവസങ്ങളിലും മിക്ക റസ്റ്ററന്റുകളിലും വന് തിരക്ക് അനുഭവപ്പെടുന്നു. കരാമയിലെ പാര്ക് റെജിസ് ഹോട്ടലിന് പിന്വശത്തായി അല് ഷമ്മാ കെട്ടിടത്തിലെ താഴത്തെ നിലയിലാണ് ദേ പുട്ട് ഉദ്ഘാടനത്തിന് ഒരുങ്ങുന്നത്. ലോകത്തെ രുചികരങ്ങളായ ഭക്ഷണങ്ങളെല്ലാം സംഗമിക്കുന്ന ദുബൈയില് കേരളത്തിന്റെ സ്വന്തം പുട്ടിന്റെ വൈവിധ്യങ്ങള് നുകരാന് സ്വദേശികളും ഇതര രാജ്യക്കാരുമെത്തുമെന്നാണ് പ്രതീക്ഷ.
https://www.facebook.com/Malayalivartha
