മദ്യലഹരിയിലായിരുന്ന യുവതി അമ്മയ്ക്കും സഹോദരനും നേരെ വെടിയുതിർത്തു. ഡൽഹിയിലെ ഡിഫൻസ് കോളനിയിലാണ് സംഭവം. ഇതുമായി ബന്ധപ്പെട്ട് യുവതിയെ പൊലീസ് അറസ്റ്റ് ചെയ്തു. മദ്യലഹരിയിൽ വീട്ടിലേക്ക് വന്ന യുവതി, പിന്നീടുണ്ടായ ചെറിയ വഴക്കിനെ തുടർന്ന് അമ്മയ്ക്കും സഹോദരനും നേരെ വെടിയുതിർക്കുകയായിരുന്നു.

ഇരുവരെയും ഗുരുതരമായ പരിക്കുകളോടെ ആശുപത്രിയിൽ പ്രവേശിപ്പിച്ചു. വീട്ടിലേക്ക് വരുമ്പോൾ തന്നെ നടക്കാൻ കഴിയാത്ത അവസ്ഥയിലായിരുന്നു യുവതിയെന്ന് ദൃക്സാക്ഷികൾ പറഞ്ഞു. ഭൂമിയിടപാടുമായി ബന്ധപ്പെട്ട് ചില അസ്വാരസ്യങ്ങൾ യുവതിക്കും കുടുംബാംഗങ്ങൾക്കുമിടയിൽ നിലനിന്നിരുന്നു.

ഇതു തന്നെയാണോ ആക്രമണത്തിന് പ്രേരിപ്പിച്ചതെന്ന് വ്യക്തമല്ല. സംഭവത്തെക്കുറിച്ച് അന്വേഷിച്ചു വരുന്നതായി പൊലീസ് അറിയിച്ചു.