ഓണ്‍ലൈന്‍ മാര്‍ക്കറ്റായ ഒഎല്‍എക്‌സില്‍ കാര്‍ വില്‍പ്പനയ്ക്ക് വച്ച സോഫ്റ്റ് വെയര്‍ എഞ്ചിനീയറെ കാണാതായി. ബംഗളുരുവില്‍ സോഫ്റ്റ് വെയര്‍ എഞ്ചിനീയറായ അജിതഭ് കുമാറിനെയാണ് (29) കഴിഞ്ഞ ഒരാഴ്ചയായി കാണാതായിരിക്കുന്നത്. കഴിഞ്ഞ തിങ്കളാഴ്ച പുറത്ത് പോയ അജിഭത് പിന്നീട് തിരിച്ചുവന്നിട്ടില്ല. വില്‍പ്പനയ്ക്ക് വച്ച കാര്‍ വാങ്ങാന്‍ താല്‍പ്പര്യം പ്രകടിപ്പിച്ചവരെ കാണാന്‍ പോയതാണെന്നാണ് സുഹൃത്തുക്കള്‍ നല്‍കുന്ന വിവരം.

എവിടേക്കാണ് പോകുന്നതെന്ന് അജിതഭ് പറഞ്ഞിരുന്നില്ല. തിങ്കളാഴ്ച വൈകുന്നേരം 6.30-ഓടെയാണ് ഇയാള്‍ കാറുമായി പുറത്ത് പോയത്. പിന്നീടാരും ഇയാളെ കണ്ടിട്ടില്ല. തിങ്കളാഴ്ച 7.10 വരെ വാട്‌സ്ആപ്പില്‍ ഓണ്‍ലൈന്‍ ആയിരുന്ന ഫോണ്‍ ഇപ്പോള്‍ സ്വിച്ച് ഓഫ് ചെയ്ത നിലയിലാണ്. പാട്‌ന സ്വദേശിയായ് അജിതഭ് സുഹൃത്ത് രവിക്കൊപ്പം ബംഗളുരുവിലെ വൈറ്റ് ഫീല്‍ഡിലാണ് താമസിച്ചിരുന്നത്.

കൊല്‍ക്കത്തയിലെ ഐഐഎമ്മില്‍ എംബിഎ പഠിക്കുന്നതിന് തയ്യാറെടുക്കുകയായിരുന്നു അജിതഭ്. ഇതിനായി അഞ്ച് ലക്ഷം രൂപ ഫീസ് നല്‍കണമായിരുന്നു. ഇതിനാണ് ഇയാള്‍ കാര്‍ വില്‍ക്കാന്‍ തീരുമാനിച്ചത്. പോലീസ് അന്വേഷണം പുരോഗമിക്കുന്നുവെങ്കിലും അജിതഭിനേയും കാറിനെക്കുറിച്ചും യാതൊരു സൂചനയും ലഭിച്ചിട്ടില്ല.
ടവര്‍ ലൊക്കേഷന്‍ പ്രകാരം ഗുഞ്ചൂരിലാണ് അവസാനമായി അജിഭതിന്റെ ഫോണ്‍ ലൊക്കേറ്റ് ചെയ്തിരിക്കുന്നത്. അതിന് ശേഷം ഫോണ്‍ ഓഫ് ചെയ്തിരിക്കുകയാണ്.