പൂർവ വിദ്യാർത്ഥി സംഗമത്തിനിടെ ബെല്ലി ഡാൻസും മദ്യസത്കാരവും നടത്തിയത് വിവാദത്തിൽ. ഉത്തർപ്രദേശിലാണ് സംഭവം. സർക്കാർ നിയന്ത്രണത്തിലുള്ള മീറത്ത് മെഡിക്കൽ കോളേജിലെ പൂർവ വിദ്യാർത്ഥി സംഗമത്തിനിടെയാണ് മദ്യം വിളമ്പിയത്. മീറത്തിലെ ലാലാ ലജ്പത് റായ് മെഡിക്കൽ കോളേജിൽ റഷ്യൻ നർത്തകികൾ ബെല്ലി ഡാൻസ് അവതരിപ്പിക്കുന്ന വീഡിയോ സോഷ്യൽ മീഡിയയിൽ പ്രചരിച്ചതോടെയാണ് സംഭവം പുറത്തറിയുന്നത്.

പരിപാടിയിലേക്ക് മദ്യമെത്തിക്കാൻ ആശുപത്രിയിലെ ആംബുലൻസ് ഉപയോഗിച്ചെന്നും ആരോപണം ഉയർന്നിരുന്നു. കോളേജിൽ ബെല്ലി ഡാൻസ് അവതരിപ്പിക്കുന്നതിൽ തെറ്റൊന്നുമില്ലെന്ന് പരിപാടിയുടെ സംഘാടകർ പറഞ്ഞു. ബെല്ലി ഡാൻസ് ഒരു കലാരൂപമാണ്.

പ്രശസ്ത റഷ്യൻ നർത്തകയെയാണ് പരിപാടിക്ക് ക്ഷണിച്ചിരുന്നത്. പരിപാടി കുടുംബാംഗങ്ങളോടൊത്താണ് ഡോക്ടർമാർ കണ്ടത്. എന്നാൽ ഇവിടേക്ക് ആംബുലൻസ് ഉപയോഗിച്ച് മദ്യം കൊണ്ടുവന്നെന്ന ആരോപണം സംഘാടകർ നിഷേധിച്ചു. സംഭവം അന്വേഷിക്കാൻ ആരോഗ്യ വിദ്യാഭ്യാസ മന്ത്രാലയ തലവൻ അദ്ധ്യക്ഷനായ ഒരു കമ്മിറ്റിയെ നിയോഗിച്ചതായി യു.പി വിദ്യാഭ്യാസ മന്ത്രി അഷുതോഷ് താണ്ടൻ പറഞ്ഞു. ഇത്തരം സംഭവങ്ങൾ നിർഭാഗ്യകരമാണ്. ഇക്കാര്യത്തിൽ മൂന്ന് ദിവസത്തിനകം റിപ്പോർട്ട് സമർപ്പിക്കാൻ കമ്മിറ്റിയോട് ആവശ്യപ്പെട്ടിട്ടുണ്ട്.

റിപ്പോർട്ട് കിട്ടിയ ശേഷം ഇക്കാര്യത്തിൽ എന്ത് ചെയ്യാനാകുമെന്ന് ആലോചിക്കുമെന്നും അദ്ദേഹം പറഞ്ഞു. ഇക്കാര്യത്തിൽ വിശദമായ അന്വേഷണം നടത്തി കുറ്റക്കാർക്കെതിരെ നടപടിയെടുക്കാൻ സംസ്ഥാന സർക്കാർ ഉത്തരവിട്ടിട്ടുണ്ട്.