പുതുവത്സരദിനത്തിൽ കുളിക്കാൻ പറഞ്ഞിട്ട് അനുസരിക്കാതെ കൂട്ടുകാരോടൊപ്പം കളിച്ചു. അച്ഛൻ വഴക്കു പറഞ്ഞതിനെത്തുടർന്ന് പത്തു വയസുകാരൻ കുളിമുറിയിൽ തൂങ്ങിമരിച്ചു. കോയമ്പത്തൂരിലാണ് സംഭവം നടന്നത്.

ഇന്നലെ പിതാവ് കുളിക്കാൻ പറഞ്ഞിട്ടും അനുസരിക്കാതെ അഞ്ചാം ക്ലാസുകാരനായ കുട്ടി കൂട്ടുകാരുമായി കളിച്ചുകൊണ്ടിരുന്നു. ഇതിന്റെപ്പേരിൽ അച്ഛൻ മകനെ ശകാരിച്ചു. തുടർന്ന് കുട്ടി വീട്ടിലെത്തുകയും കുളിമുറിയിൽ കയറി വാതിലടയ്ക്കുകയും ചെയ്തു. ഏറെ സമയം കഴിഞ്ഞിട്ടും കുളിമുറിയിൽനിന്നും പുറത്തിറങ്ങാൻ കാണാത്തതിനാൽ വാതിൽ പൊളിച്ച് അകത്ത് കയറിയപ്പോഴാണ് ടവ്വൽ ഉപയോഗിച്ച് തൂങ്ങിനിൽക്കുന്ന നിലയിൽ കണ്ടത്.

ഉടൻ തന്നെ ആശുപത്രിയിലെത്തിച്ചെങ്കിലും കുട്ടി മരിച്ചിരുന്നു. കുട്ടിയെ മരിച്ച നിലയിലാണ് ആശുപത്രിയിൽ കൊണ്ട് വന്നതെന്നും ആശുപത്രി അധികൃതർ പറഞ്ഞു. കുട്ടിയുടെ മൃതദേഹം പോസ്റ്റ് മോർട്ടത്തിനായി മാറ്റിയിട്ടുണ്ടെന്നു പോലീസ് പറഞ്ഞു.