അണ്ണാഡി.എം.കെ എം.എല്‍.എമാരുടെ യോഗം ഇന്ന് ചെന്നൈയില്‍
നിര്‍ണായക നിയമസഭസമ്മേളനം അടുത്തയാഴ്ച തുടങ്ങാനിരിക്കെ അണ്ണാഡി.എം.കെ എം.എല്‍.എമാരുടെ യോഗം ഇന്ന് ചെന്നൈയില്‍ പാര്‍ട്ടി ആസ്ഥാനത്ത് വിളിച്ചുകൂട്ടുന്നു. എത്ര എം.എല്‍.എമാര്‍ യോഗത്തില്‍ പങ്കെടുക്കുമെന്ന് ഉറ്റുനോക്കുകയാണ് ഔദ്യോഗികവിമത നേതൃത്വങ്ങള്‍. ജയലളിതയുടെ മരണത്തെതുടര്‍ന്ന് ഒഴിവുവന്ന ആര്‍.കെ നഗറില്‍ വിമതനേതാവ് ടി.ടി.വി. ദിനകരന്‍ വന്‍ ഭൂരിപക്ഷത്തോടെ ജയിച്ചത് പാര്‍ട്ടിയില്‍ വിള്ളലുകള്‍ വീഴ്ത്താന്‍ സാധ്യതയുണ്ടെന്നാണ് വിലയിരുത്തല്‍. ദിനകരനെ പിന്തുണക്കുന്ന പതിനെട്ട് എം.എല്‍.എമാരെ അയോഗ്യരാക്കിയ സാഹചര്യത്തില്‍ 234 അംഗ നിയമസഭയുടെ എണ്ണം 216 ആയി ചുരുങ്ങി. കേവലഭൂരിപക്ഷത്തിന് 108 പേരുടെ പിന്തുണ വേണം.
113 പേരുടെ പിന്തുണയുണ്ടെന്നാണ് മുഖ്യമന്ത്രി എടപ്പാടി കെ. പളനിസാമിയുടെ അവകാശവാദം. അണ്ണാഡി.എം.കെ സ്വതന്ത്ര എം.എല്‍.എമാരായ നടന്‍ കരുണാസ്, തമീമുന്‍ അന്‍സാരി, യു. തനിയരസ് എന്നിവര്‍ ചാഞ്ചാടി നില്‍ക്കുകയാണ്. മൂന്ന് സ്വതന്ത്രരെ മാറ്റിനിര്‍ത്തിയാല്‍ എത്രപേര്‍ യോഗത്തിനെത്തുമെന്നത് നിര്‍ണായകമാണ്. ദിനകരന്‍പക്ഷ എം.എല്‍.എമാരുടെയും പ്രതിപക്ഷത്തിന്റെയും നിവേദനങ്ങളുടെ അടിസ്ഥാനത്തില്‍ വിശ്വാസവോട്ടെടുപ്പിന് ഗവര്‍ണര്‍ നിര്‍ദേശം നല്‍കിയാല്‍ സഭയില്‍ സര്‍ക്കാര്‍ വെള്ളംകുടിക്കും.
അതേസമയം, എം.എല്‍.എമാരെ അയോഗ്യരാക്കിയ സ്പീക്കറുടെ നടപടി ചോദ്യംചെയ്തുള്ള ഹരജിയില്‍ മദ്രാസ് ഹൈകോടതിയുടെ വിധിയും അടുത്ത് വരാന്‍ സാധ്യതയുണ്ട്. ആര്‍.കെ നഗറില്‍ അട്ടിമറിവിജയം നേടിയതിനുപിന്നാലെ ടി.ടി.വി. ദിനകരപക്ഷത്തേക്ക് കൂടുതല്‍ എം.എല്‍.എമാര്‍ കൂറുമാറുമെന്ന അഭ്യൂഹം നിലനില്‍ക്കുന്നുണ്ട്
പാര്‍ട്ടിആസ്ഥാനത്ത് നടക്കുന്ന യോഗത്തില്‍ രജനികാന്തിന്റെ രാഷ്ട്രീയ പ്രവേശനം ചര്‍ച്ചയാകും. ഇന്നത്തെ സാഹചര്യത്തില്‍ രജനിയുടെ രംഗപ്രവേശം അണ്ണാഡി.എം.കെക്ക് ദോഷകരമാകുമെന്നാണ് നിഗമനം. പാര്‍ട്ടിഅണികളെ ഉറപ്പിച്ചുനിര്‍ത്തുന്നതിനുള്ള തന്ത്രങ്ങള്‍ തീരുമാനിക്കും. ആഭ്യന്തരപ്രശ്‌നങ്ങള്‍ കാരണം പാര്‍ട്ടി സംഘടനസംവിധാനങ്ങള്‍ കാര്യക്ഷമമാക്കാന്‍ ചര്‍ച്ചകള്‍ നടക്കും.
ഒ.പി.എസ്ഇ.പി.എസ് ലയന സമയത്തെ ധാരണകള്‍ പലതും താഴെതട്ടില്‍ നടപ്പാക്കാത്തതില്‍ പ്രാദേശിക നേതൃത്വങ്ങളില്‍ അസമത്വം പുകയുകയാണ്. അതിനിടെ, ദിനകരന്‍ അനുകൂലികളായ നൂറോളംപേരെ അണ്ണാഡി.എം.കെയില്‍നിന്ന് പുറത്താക്കി.
https://www.facebook.com/Malayalivartha
