അഗ്നി-5 ഇന്ത്യ വിജയകരമായി വിക്ഷേപിച്ചു. 5000 കിലോമീറ്റര്‍ ദൂരത്തില്‍ പ്രയോഗിക്കാവുന്ന ആണവവാഹക ഭൂതല-ഭൂതല ബാലിസ്റ്റിക് മിസൈല്‍ ആണ് അഗ്നി-5. രാവിലെ 9.53ന് ഒഡിഷയിലെ അബ്​ദുള്‍ കലാംഐലന്‍റ്​ എന്നറിയപ്പെടുന്ന വീലര്‍ ഐലന്‍റില്‍ നിന്നായിരുന്നു വിക്ഷേപണം. കേന്ദ്ര പ്രതിരോധ മന്ത്രി നിര്‍മല സീതാരാമനാണ് പരീക്ഷണ വാര്‍ത്ത പുറത്തുവിട്ടത്.

ഡിഫന്‍സ് റിസര്‍ച് ആന്‍ഡ് ഡെവലപ്പ്മെന്‍റ് ഒാര്‍ഗനൈസേഷന്‍ (ഡി.ആര്‍.ഡി.ഒ) ആണ് മൂന്നു ഘട്ടമുള്ള ദീര്‍ഘദൂര മിസൈലായ അഗ്നി-5 വികസിപ്പിച്ചത്. 5000 മുതല്‍ 5500 കിലോമീറ്റര്‍ വരെ ദൂരപരിധിയുള്ള 17 മീറ്റര്‍ ഉയരവും 2 മീറ്റര്‍ വ്യാസവുമുള്ള മിസൈലിന് 1.5 ടണ്‍ ആണ് ഭാരം. അഗ്നി-1 (700 കിലോമീറ്റര്‍), അഗ്നി-2 (2000 കിലോമീറ്റര്‍), അഗ്നി-3 (2500 കിലോമീറ്റര്‍), അഗ്നി-4 (2500 കിലോമീറ്റര്‍ മുതല്‍ 3500 കിലോമീറ്റര്‍ വരെ) എന്നീ അഗ്നി പതിപ്പുകളുടെ പരീക്ഷണം വിജയകരമായിരുന്നു.

2012 ഏപ്രില്‍ 19നാണ് അഗ്നി-5ന്‍റെ ആദ്യ പരീക്ഷം നടത്തിയത്. തുടര്‍ന്ന് 2013 സെപ്റ്റംബര്‍ 15നും 2015 ജനുവരി 3നും രണ്ടും മൂന്നും പരീക്ഷണങ്ങള്‍ നടന്നു. 2016 ഡിസംബര്‍ 26നാണ് അഗ്നി-5ന്‍റെ നാലാമത്തെയും അവസാനത്തേതുമായ പരീക്ഷണവും വിജയകരമായി പൂര്‍ത്തിയാക്കിയത്.