രാജ്യം ഇന്ന് നേരിടുന്ന പ്രധാന പ്രശ്നം സൈബർ ആക്രമണമാണ്. സൈബര്‍ ആക്രമണങ്ങളും വൈറസുകളും വഴി വിവരങ്ങളും ചോരുന്നതും മറ്റു സുരക്ഷാ പ്രശ്‌നങ്ങളും ഇപ്പോൾ സാധാരണമായി കഴിഞ്ഞിരിയ്ക്കുന്നു. അതിനൊപ്പം തന്നെ രാജ്യത്ത് സൈബര്‍ സുരക്ഷാരംഗത്ത് വിദഗ്ദ്ധരുടെ ക്ഷാമവും ഏറി വരുകയാണ്. ഇത്തരം സുരക്ഷാ പ്രശ്‌നങ്ങളുണ്ടാവുന്നതു സ്ഥിരമായതോടെ പ്രമുഖ കമ്പനികളെല്ലാം സ്വന്തമായി സൈബര്‍ സെക്യൂരിറ്റി ഓഫീസര്‍മാരെ നിയമിക്കുകയാണ്.

സൈബര്‍ സുരക്ഷാരംഗത്ത്‌ കഴിഞ്ഞ 18 മാസത്തിനിടെ മൂന്നിരട്ടിയോളം ഒഴിവുകള്‍ വന്നെന്നാണ് പ്രമുഖ തൊഴില്‍ ഏജന്‍സിയായ ബിലോംഗിന്റെ റിപ്പോര്‍ട്ടില്‍ പറയുന്നത്. നിലവില്‍ സൈബര്‍ സുരക്ഷാ രംഗത്ത് 10,000-നും 15,000-നും ഇടയില്‍ തൊഴിലവസരങ്ങള്‍ ഉണ്ടെന്നു റിപ്പോര്‍ട്ടുകൾ സൂചിപ്പിക്കുന്നു. പോയവര്‍ഷമുണ്ടായ വാനക്രൈ, റാന്‍സംവെയ്ര്‍ ആക്രമണങ്ങളോടെ ഇന്ത്യന്‍ കമ്പനികളെല്ലാം സൈബര്‍ സുരക്ഷയെ സംബന്ധിച്ച് വളരെയധികം ജാഗ്രത പുലർത്തുകയാണ്.