"സന്യാസിയായ തനിക്ക് പുരസ്കാരങ്ങളില് താത്പര്യമില്ല"; പത്മശ്രീ നിരസിച്ച് പ്രധാനമന്ത്രിക്ക് സിദ്ധേശ്വര് സ്വാമിയുടെ കത്ത്
പത്മശ്രീ പുരസ്കാരം നിരസിച്ച് പ്രധാനമന്ത്രിക്ക് സിദ്ധേശ്വര് സ്വാമിയുടെ കത്ത്. താന് ഒരു സന്യാസിയായതിനാല് തന്നെ പുരസ്കാരങ്ങളില് താത്പര്യമില്ലെന്നായിരുന്നു സിദ്ധേശ്വറിന്റെ വിശദീകരണം.
കര്ണാടകയില് നിന്നുള്ള ആത്മീയ ഗുരുവാണ് സിദ്ധേശ്വര്. പത്മശ്രീ പുസ്കാരം നല്കിയതിന് നന്ദിയറിയിച്ച സ്വാമി എന്നാല് സര്ക്കാരിനോടുള്ള സ്നേഹം നിലനിര്ത്തിക്കൊണ്ടുതന്നെ പുരസ്കാരം സ്വീകരിക്കുന്നതിനുള്ള വിമുഖത അറിയിക്കുന്നുവെന്ന് പ്രധാനമന്ത്രിക്കയച്ച കത്തില് പറയുന്നു.
'ഒരു സന്യാസിയെന്ന നിലയ്ക്ക് പുരസ്കാരങ്ങളില് താന് തത്പരനല്ല, ഏറെ ബഹുമതിയുള്ള പത്മശ്രീ പുരസ്കാരം സ്വീകരിക്കാത്ത തന്റെ തീരുമാനത്തെ താങ്കള് സ്വാഗതം ചെയ്യുമെന്ന് പ്രതീക്ഷിക്കുന്നു, സിദ്ധേശ്വര് സ്വാമി കത്തില് വ്യക്തമാക്കി. ആത്മീയ ദര്ശനങ്ങളടങ്ങിയ നിരവധി പുസ്തകങ്ങള് അദ്ദേഹത്തിന്റേതായിട്ടുണ്ട്.
റിപ്പബ്ലിക് ദിനത്തില് പ്രഖ്യാപിച്ച പുരസ്കാരങ്ങളില് കല, സാമൂഹ്യസേവനം, പൊതുകാര്യം, ശാസ്ത്രം, വ്യവസായം, സാഹിത്യം കായികം, വിദ്യാഭ്യാസം തുടങ്ങി സമൂഹത്തിന്റെ വിവിധ മേഖലകളില്പ്പെട്ട നിരവധി പേര്ക്ക് പത്മ പുരസ്കാരങ്ങള് ലഭിച്ചിരുന്നു. ഈ വര്ഷം സമ്മാനിച്ച 85 പത്മ പുരസ്കാരങ്ങളില് മൂന്ന് പത്മവിഭൂഷണ്, ഒമ്ബത് പത്മഭൂഷണ്, 73 പത്മശ്രീ പുരസ്കാരങ്ങള് എന്നിവയാണ് ഉള്പ്പെടുന്നത്.
https://www.facebook.com/Malayalivartha
