പ്രത്യേക സിബിഐ ജഡ്ജിയായിരുന്ന ബിഎച്ച്‌ ലോയയുടെ മരണത്തില്‍ ദുരൂഹ നീക്കണമെന്ന് ആവശ്യവുമായി പ്രതിപക്ഷ പാര്‍ട്ടികള്‍ രാഷ്ട്രപതിയെ സമീപിക്കാനൊരുങ്ങുന്നു. ലോയയുടെ മരണത്തില്‍ സ്വതന്ത്ര അന്വേഷണം ആവശ്യപ്പെട്ടുള്ള ഹര്‍ജികള്‍ സുപ്രീംകോടതിയുടെ പരിഗണനയിലിരിക്കെയാണ് ഇങ്ങനെയൊരു ആവശ്യം. ലോയയുടെ സഹപ്രവര്‍ത്തകരായ രണ്ട് അഭിഭാഷകരുടെയും മരണം അന്വേഷിക്കണമെന്നും, സിബിഐ ,എന്‍ഐഎ ഏജന്‍സികള്‍ക്ക് അന്വേഷണ ചുമതല നല്‍കണമെന്നുമാണ് പ്രതിപക്ഷ പാര്‍ട്ടികള്‍ ആവശ്യപ്പെട്ടിരിക്കുന്നത്. ഇത് സംബന്ധിച്ച് എംപിമാര്‍ ഒപ്പുവെച്ച കത്ത് ഈ ആഴ്ച രാഷ്ട്രപതി രാംനാഥ് കോവിന്ദിന് നല്‍കും .

ജസ്റ്റിസ് ലോയയുടെ സഹപ്രവര്‍ത്തകരായിരുന്ന അഭിഭാഷകന്‍ ശ്രീകാന്തിന്റെയും, ജില്ലാ ജഡ്ജിയായിരുന്ന പ്രകാശ് തോംബറിന്റെയും മരണം ദുരൂഹമാണെന്ന് ആരോപിച്ച്‌ കോണ്‍ഗ്രസ് കഴിഞ്ഞ ദിവസം രംഗത്തെത്തിയിരുന്നു. ഇതിന് പിന്നാലെയാണ് മരണങ്ങളിലുള്ള ദുരൂഹ നീക്കണമെന്ന ആവശ്യവുമായി പ്രതിപക്ഷ പാര്‍ട്ടികള്‍ രാഷ്ടപതിയെ സമീപിക്കാനൊരുങ്ങുന്നത്.

മൂന്ന് പേജുള്ള കത്തില്‍ നൂറോളം പ്രതിപക്ഷ നേതാക്കളും എംപിമാരും ഇതുവരെ ഒപ്പു വെച്ചു. ലോയയുടെ മരണത്തില്‍ സ്വതന്ത്ര അന്വേഷണം ആവശ്യപ്പെട്ടുള്ള ഹര്‍ജികള്‍ ചീഫ് ജസ്റ്റിസ് ദീപക് മിശ്ര അധ്യക്ഷനായ ബെഞ്ചിന്റെ പരിഗണനയിലാണ്.