പാര്‍ലമെന്റിൽ പ്രധാനമന്ത്രി നരേന്ദ്ര മോഡിയുടെ പ്രസംഗത്തിനിടയിലെ പൊട്ടിച്ചിരിച്ച കോണ്‍ഗ്രസ് വനിതാ നേതാവിന് പ്രധാനമന്ത്രിയുടെ ഉരുളയ്ക്കുപ്പേരി മറുപടി . ആന്ധ്രയില്‍ നിന്നുള്ള കോണ്‍ഗ്രസ് എംപി രേണുകാ ചൗധരിയുടെ ചിരിയും പ്രധാനമന്ത്രിയുടെ മറുപടിയുമാണ് ഇപ്പോള്‍ തരംഗമായി മുന്നേറുന്നത്.

ബുധനാഴ്ച പാര്‍ലമെന്റില്‍ രാഷ്ട്രപതിയുടെ നയപ്രസംഗത്തിന് നന്ദി പറഞ്ഞു കൊണ്ട് പ്രധാനമന്ത്രി കോണ്‍ഗ്രസിനെ പ്രസംഗത്തിലൂടെ വിമർശിക്കുമ്പോളാണ് രേണുകാ ചൗധരി പൊട്ടിച്ചിരിച്ചത്. എല്ലാവരും നിശബ്ദരായിരിക്കെ പ്രധാനമന്ത്രിയുടെ പ്രസംഗം മാത്രം ഉയരുമ്പോള്‍ ഉണ്ടായ രേണുകയുടെ ചിരി എല്ലാവരുടെയും ശ്രദ്ധയിൽ പെട്ടു. എന്നാൽ ചിരി വകവയ്ക്കാതെ മോഡി പ്രസംഗം തുടര്‍ന്നു. അതേസമയം രാജ്യസഭാ സ്പീക്കര്‍ വെങ്കയ്യാ നായിഡു രേണുകയെ ശാസിക്കുകയും ചിരി നിര്‍ത്താന്‍ ആവശ്യപ്പെട്ടെങ്കിലും രേണുക ചിരിച്ചു കൊണ്ടിരുന്നതോടെ പ്രധാനമന്ത്രി പ്രതികരണവുമായി മുന്നോട്ട് വരുകയായിരുന്നു.

രാമായണം സീരിയലിന് ശേഷം ഇത്തരം ചിരി കേള്‍ക്കാന്‍ അവസരം കിട്ടുന്നത് ഇതാദ്യമാണെന്നായിരുന്നു പ്രധാനമന്ത്രിയുടെ പ്രതികരണം. ബിജെപി അംഗങ്ങള്‍ ഡസ്‌ക്കിലടിച്ച് പ്രോത്സാഹിപ്പിക്കുകയും ചെയ്തു. തനിക്കെതിരേ പ്രധാനമന്ത്രി നടത്തിയ പരാമര്‍ശത്തെ ബിജെപിയ്ക്ക് സ്ത്രീകളോടുള്ള അസഹിഷ്ണുത വ്യക്തമാക്കുന്നതാണെന്നായിരുന്നു രേണുകയുടെ പ്രതികരണം. ഇന്നലെ മോഡി കോണ്‍ഗ്രസിനെ രൂക്ഷമായിട്ടായിരുന്നു വിമര്‍ശിച്ചത്. രാജ്യത്തിന്റെ ഇപ്പോഴത്തെ അവസ്ഥയ്ക്ക് കാരണം കോണ്‍ഗ്രസാണെന്നായിരുന്നു വിമര്‍ശനം. അവരുടെ നയങ്ങള്‍ മൂലം സ്വാതന്ത്ര്യം കിട്ടി 70 വര്‍ഷത്തിന് ശേഷവും ഇന്ത്യക്കാര്‍ ദിനംപ്രതി വിഷമിക്കുകയാണെന്നും പ്രധാനമന്ത്രി വിമർശിച്ചിരുന്നു.