ഇറക്കമില്ലാത്ത വസ്ത്രത്തിൽ ആരാധനാലയത്തിന് മുന്നില്‍ ഫോട്ടോയ്ക്ക് പോസ് ചെയ്ത മോഡലിനെതിരെ സോഷ്യൽ മീഡിയ ആക്രമണം. പ്രശസ്ത മോഡലും, ടിവി റിയാലിറ്റി ഷോയായ ബിഗ്‌ബോസ് സീസണ്‍ 10 ലെ മത്സരാര്‍ത്ഥിയുമായിരുന്ന നിതിബാ കൗള്‍ ആണ് സോഷ്യൽ മീഡിയ ആക്രമണത്തിന് ഇരയായത്. അവധിക്കാലം ആഘോഷിക്കുവാനായി കര്‍ണ്ണാടക-മഹാരാഷ്ട്ര അതിര്‍ത്തിയിലുള്ള ഗോകര്‍ണ്ണത്തില്‍ പോയ നിതിബാ കൗള്‍ ഗോകര്‍ണ്ണത്തിലെ ഹനുമാന്‍ ജന്മഭൂമി എന്ന ആരാധനാലയം സന്ദര്‍ശിക്കവെയാണ് അതിനുമുന്നിൽനിന്നും ചിത്രങ്ങളെടുത്തത്.

ആരാധനാലയത്തിന് മുന്നില്‍ നിന്നെടുത്ത ചിത്രം നിതിബാ കൗള്‍ ഇന്‍സ്റ്റാഗ്രാമില്‍ പോസ്റ്റ് ചെയ്യുകയും ചെയ്തു. ഇതോടെയാണ് പ്രശ്നങ്ങൾക്ക് തുടക്കമായത്. ഇറക്കം കുറഞ്ഞ വസ്ത്രമാണ് ആളുകളെ പ്രകോപിപ്പിച്ചത്. ചിത്രത്തിന് താഴെ നിരവധിപ്പേർ വളരെ മോശമായി കമന്റുകൾ എഴുതി. ബീച്ചിലാണ് പോയതെന്നാണൊ വിചാരം, സംസ്‌കാരങ്ങളെ ബഹുമാനിക്കാന്‍ പഠിക്കണം തുടങ്ങീ പലരും കമന്റ് ചെയ്തു.

ഇതൊക്കെ കേട്ട് മിണ്ടാതിരിക്കാൻ നിതിബാ തയ്യാറായില്ല. മോശമായി പ്രതികരിച്ചവർക്കെതിരെ മറുപടിയും നൽകിയിരുന്നു. ഇരുപത്തിയൊന്നാം നൂറ്റാണ്ടില്‍ ജീവിക്കുന്ന ഒരു ഇന്ത്യന്‍ പെണ്‍കുട്ടിയാണ് താനെന്നും പലപ്പോഴും ഇറക്കം കുറഞ്ഞ വസ്ത്രങ്ങളും ബിക്കിനിയും ധരിക്കാറുണ്ടെന്നും എന്നാല്‍ ഇതിന് അര്‍ത്ഥം തനിക്ക് ഭാരതീയ സംസ്‌ക്കാരത്തോട് ബഹുമാനമില്ലായെന്നല്ല എന്നുമാണ് നിതിബാ ഇതിനെതിരെ പ്രതികരിച്ചത്. ജീവിതം സന്തോഷകരമായി അടിച്ചു പൊളിച്ച് ജീവിക്കാന്‍ ശ്രമിക്കുകയെന്നും നിതിബാ പറയുന്നു.