പ്രധാനമന്ത്രി നരേന്ദ്രമോദിയ്‌ക്കെതിരെ ആഞ്ഞടിച്ച് രാഹുല്‍ ഗാന്ധി.ഗതകാലത്തെക്കുറിച്ച് പ്രസംഗിക്കുന്നതു നിര്‍ത്തി ജോലി ചെയ്യാന്‍ തുടങ്ങാന്‍ പ്രധാനമന്ത്രി നരേന്ദ്ര മോദിക്ക് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ ഉപദേശം.

സര്‍ക്കാരിന്റെ കാലാവധി തീരാന്‍ അധിക കാലമില്ലെന്നു ചൂണ്ടിക്കാട്ടിയാണ് മോദിക്കുള്ള രാഹുലിന്റെ ഉപദേശം. രാജ്യത്തിനായി എന്തു ചെയ്‌തെന്ന് അടുത്ത പൊതുതിരഞ്ഞെടുപ്പില്‍ നിങ്ങള്‍ ജനത്തോടു പറയേണ്ടിവരും. അഞ്ചു വര്‍ഷം പൂര്‍ത്തിയാകാറായിട്ടും രാജ്യത്തിനായി ഇപ്പോഴും ഒന്നും ചെയ്യാന്‍ നിങ്ങള്‍ക്കായിട്ടില്ല – രാഹുല്‍ ചൂണ്ടിക്കാട്ടി.

പ്രധാനമന്ത്രി പദത്തില്‍ അധികനാള്‍ ഇനിയുണ്ടാകില്ലെന്നും അതിനാല്‍ പ്രസംഗം നിര്‍ത്തി കഠിനാധ്വാനം ചെയ്യാനുമാണ് രാഹുല്‍ മോദിയോട് പറഞ്ഞത്.അതേസമയം, തൊഴിലവസരങ്ങള്‍ സൃഷ്ടിക്കുന്നതിലും കള്ളപ്പണം രാജ്യത്തേക്ക് തിരിച്ചു കൊണ്ടുവരുന്നതിലും മോദി പരാജയപ്പെട്ടുവെന്ന് രാഹുല്‍ ഗാന്ധി പറഞ്ഞു.

'രാജ്യത്തെ സമ്പദ് വ്യവസ്ഥ തകര്‍ന്നപ്പോഴും കോണ്‍ഗ്രസിനെ വിമര്‍ശിക്കാനാണ് മോദി സമയം കണ്ടെത്തുന്നത്. തൊഴിലവസരങ്ങള്‍ സൃഷ്ടിക്കുകയും സ്‌കൂളുകളും ആശുപത്രികളും നിര്‍മ്മിക്കുകയും അടക്കമുള്ളവയാണ് ജനങ്ങള്‍ പ്രധാനമന്ത്രിയില്‍നിന്ന് പ്രതീക്ഷിക്കുന്നത്. കോണ്‍ഗ്രസിനെ വിമര്‍ശിക്കുന്നത് മാത്രമല്ല.

വന്‍ വ്യവസായികളുടെ കടങ്ങള്‍ എഴുതിത്തള്ളുന്ന സര്‍ക്കാര്‍ കര്‍ഷകരുടെ വായ്പകള്‍ എഴുതിത്തള്ളാന്‍ തയ്യാറാകുന്നില്ല.' രാഹുല്‍ പറയുന്നു.