നാഗാലാന്‍ഡ് നിയമസഭാ തെരഞ്ഞെടുപ്പ് ഈ മാസം 27ന് നടക്കാനിരിക്കേ മുന്‍ മുഖ്യമന്ത്രി നെയ്ഫ്യൂ റിയോ എതിരില്ലാതെ സഭയില്‍ എത്തും. നോര്‍തേണ്‍ അങ്കമി-2 സീറ്റില്‍ നിന്നാണ് റിയോ എതിരില്ലാതെ തെരഞ്ഞെടുക്കപ്പെട്ടത്. നാഗാ പീപ്പിള്‍സ് ഫ്രണ്ടിലെ എതിര്‍ സ്ഥാനാര്‍ത്ഥി പത്രിക പിന്‍വലിക്കുകയായിരുന്നു. ഇതോടെ ആകെയുണ്ടായിരുന്ന സ്ഥാനാര്‍ത്ഥി റിയോയെ വിജയിയായി പ്രഖ്യാപിക്കുകയും ചെയ്തു.

മുന്‍ നാഗാ പീപ്പിള്‍സ് ഫ്രണ്ട് നേതാവ് ആയ റിയോ കഴിഞ്ഞ മാസമാണ് പാര്‍ട്ടി വിട്ട് ബി.ജെ.പി സഖ്യത്തോടെ രൂപീകരിച്ച നാഷണലിസ്റ്റ് ഡെമോക്രാറ്റിക് പ്രൊഗ്രസീവ് പാര്‍ട്ടിയില്‍ ചേര്‍ന്നത്. നാലാം തവണയും മുഖ്യമന്ത്രിയാകാനുള്ള ഒരുക്കത്തിലാണ് നെയ്ഫ്യൂ. നിലവില്‍ നാലാഗാന്‍ഡില്‍ നിന്നുള്ള പാര്‍ലമെന്റംഗമാണ് നെയ്ഫ്യൂ റിയോ. 2014ല്‍ പി.എന്‍.എഫ് ടിക്കറ്റിലാണ് റിയോ ലോക്സഭയില്‍ എത്തിയത്.

നെയ്ഫ്യൂ റിയോയുടെ ഏക എതിരാളി എന്‍പിഎഫിലെ ച്യുപ്ഫ്യൂ ആങ്കമി ആയിരുന്നു. റിയോയുടെ ഭാര്യ സഹോദരന്‍ കൂടിയാണ് ആങ്കമി. തന്റെ നില പരുങ്ങലില്‍ ആയതോടെ പിന്‍മാറുകയാണെന്ന് ആങ്കമി വ്യക്തമാക്കി.

ഇതാദ്യമായല്ല, റിയോ എതിരില്ലാതെ നിയമസഭയില്‍ എത്തുന്നത്. 1998ല്‍ കോണ്‍ഗ്രസ് ടിക്കറ്റല്‍ മത്സരിച്ച റിയോ എതിരില്ലാതെ തെരഞ്ഞെടുക്കപ്പെട്ടിരുന്നു. മറ്റു പാര്‍ട്ടികള്‍ തെരഞ്ഞെടുപ്പ് ബഹിഷ്കരിച്ചതായിരുന്നു കാരണം. മൂന്നു തവണയായി 2003 മുതല്‍ 2014 വരെ നാഗാലാന്‍ഡ് മുഖ്യമന്ത്രിയായിരുന്നു റിയോ.