ബി.ജെ.പി നേതാവും കേന്ദ്രമന്ത്രിയുമായി ഉമാ ഭാരതി മൂന്ന് വര്‍ഷത്തേക്ക് തിരഞ്ഞെടുപ്പ് രാഷ്ട്രീയത്തില്‍ നിന്നും വിട്ടുനില്‍ക്കുന്നു. ആരോഗ്യപ്രശ്‌നങ്ങള്‍ മൂലമാണ് സജീവരാഷ്ട്രീയത്തില്‍ നിന്നും വിട്ടുനില്‍ക്കുന്നതെന്ന് ഉമാഭാരതി വ്യക്തമാക്കി. എന്നാല്‍ രാഷ്ട്രീയത്തില്‍ നിന്നും വിരമിക്കില്ലെന്നും അവര്‍ കൂട്ടിച്ചേര്‍ത്തു.

കേന്ദ്രമന്ത്രി സ്ഥാനത്ത് നിന്ന് രാജിവയ്ക്കാനും ആലോചിക്കാനും ഇപ്പോള്‍ ഉദ്ദേശിക്കുന്നില്ലെന്ന് അവര്‍ വ്യക്തമാക്കി. ബി.ജെ.പി ദേശീയ അദ്ധ്യക്ഷന്‍ അമിത് ഷായുമായി ഇക്കാര്യം സംസാരിച്ചിരുന്നുവെന്നും എന്നാല്‍ 2019 വരെ തുടരാന്‍ അദ്ദേഹം ആവശ്യപ്പെടുകയായിരുന്നെന്നും ഉമാഭാരതി കൂട്ടിച്ചേര്‍ത്തു.

ഈ മൂന്ന് വര്‍ഷം കഴിഞ്ഞാലും രാഷ്ട്രീയത്തില്‍ ഇനിയും ഒരുപാട് കാലം തനിക്ക് തുടരാന്‍ സാധിക്കുമെന്നും അതിനാല്‍ ഇപ്പോള്‍ ആരോഗ്യം മാത്രം ശ്രദ്ധിക്കാനാണ് തീരുമാനമെന്നും അവര്‍ വ്യക്തമാക്കി. പുറം വേദനയും കാല്‍മുട്ടിനുള്ള വേദനയുമാണ് ഉമാ ഭാരതിയെ ഏറെ നാളായി അലട്ടുന്നത്.