ഒറ്റദിവസംകൊണ്ട് സോഷ്യൽ മീഡിയയിൽ തരംഗമായ അഡാർ ലവ് എന്ന സിനിമയിലെ പ്രിയാ വാര്യർ ഉൾപ്പെടെയുള്ള അണിയറപ്രവർത്തകർക്കെതിരെ പരാതിയുമായി ഒരു കൂട്ടം യുവാക്കൾ. ഈ ഗാനത്തിനെതിര യുവാക്കൾ ഹൈദരാബാദ് പോലീസില്‍ പരാതി നൽകി. പാട്ടിലെ വരികള്‍ മത വികാരം വൃണപ്പെടുത്തുന്നുവെന്ന് പരാതിയിൽ പറയുന്നു. ഈ ഗാനം ഇംഗ്ലീഷിലേക്ക് വിവർത്തനം ചെയ്യുമ്പോൾ പ്രവാചകനെ നിന്ദിക്കുന്നുവെന്ന് ഹൈദരാബാദ് സ്വദേശിയായ അദ്നാൻ ഖമർ ഫേസ്ബുക്ക് ലൈവിൽ പറയുന്നു. ആളുകൾക്ക് മനസ്സിലാക്കുന്നതിനായി പാട്ടിന്റെ വരികളും അതിന്റെ ഇംഗ്ലീഷ് വിവർത്തനവും അദ്ദേഹം പോസ്റ്റു ചെയ്യുകയും ചെയ്തു. എന്നാൽ പരാതി നൽകിയ യുവാക്കൾ ഗാനത്തിന്റെ വീഡിയോ ഹാജരാക്കിയിട്ടില്ലെന്നും. പരാതിയുടെ അടിസ്ഥാനത്തില്‍ എഫ്.ഐ.ആര്‍ രജിസ്റ്റര്‍ ചെയ്തിട്ടില്ലെന്നും ഹൈദരാബാദ് പോലീസ് പറഞ്ഞു.

പാട്ടിലെ നായികമാരില്‍ ഒരാളായ പ്രിയ പി വാര്യർ ഗാനരംഗത്തിലെ ഒറ്റ സൈറ്റടി കൊണ്ട് മലയാളികളുടെ മനം കവർന്നിരിക്കുകയാണ്. ഈ ഗാനം ട്രോളന്മാരും നന്നായി ട്രോളിക്കൊണ്ടിരിക്കുകയാണ്. ‘മാണിക്യമലരായ പൂവി’ലൂടെ താരമായ പ്രിയാ വാര്യര്‍ ഇന്‍സ്റ്റാഗ്രാമിലും താരമായി. ഒറ്റ ദിവസം കൊണ്ട് ഏറ്റവുമധികം ഫോളേവഴ്‌സിനെ നേടിയ സെലിബ്രിറ്റികളുടെ പട്ടികയില്‍ മൂന്നാം സ്ഥാനത്തെത്തിയിരിക്കുകയാണ് പ്രിയ. 6.06 ലക്ഷം പേരാണ് ഇന്‍സ്റ്റാഗ്രാമില്‍ ഒറ്റ ദിവസം കൊണ്ട് പ്രിയയെ പിന്തുടര്‍ന്നത്. പുരികക്കൊടി ഉയര്‍ത്തി കണ്ണിറുക്കിയ പ്രിയയ്ക്ക് കഴിഞ്ഞ 24 മണിക്കൂറിനിടെ സണ്ണി ലിയോണിനേക്കാളും ദീപിക പദുകോണിനേക്കാളും സൈബര്‍ ലോകം തെരഞ്ഞത് പ്രിയയെ ആണെന്നാണ് പുതിയ വാര്‍ത്തകള്‍.

ഒരു ദിവസംകൊണ്ട് ഏറ്റവുമധികം ഫോളേവഴ്‌സിനെ നേടിയ സെലിബ്രിറ്റികളുടെ പട്ടികയിലും പ്രിയ മൂന്നാം സ്ഥാനം നേടിയിരുന്നു. അമേരിക്കന്‍ ടെലിവിഷന്‍ താരമായ കെയില്‍ ജെന്നറാണ് പട്ടികയില്‍ ഒന്നാമത്. 8.8 ലക്ഷം പേരാണ് ഒറ്റദിവസം കൊണ്ട് ജെന്നറിനെ പിന്തുടര്‍ന്നത്. രണ്ടാം സ്ഥാനത്ത് ക്രിസ്റ്റ്യാനോ റൊണാള്‍ഡോയാണ്. 6.5 ലക്ഷം പേരാണ് ഇന്‍സ്റ്റാഗ്രാമില്‍ റൊണാള്‍ഡേയെ പിന്തുടര്‍ന്നത്. ഗാനം റിലീസ് ചെയ്ത് ഒറ്റദിവസത്തില്‍ ഹിറ്റായ താരമാണ് തൃശൂര്‍കാരിയായ പ്രിയ വാര്യര്‍. കിടിലന്‍ എക്‌സ്പ്രഷനുകളിലൂടെയും നോട്ടത്തിലൂടെയുമാണ് യുവാക്കളുടെ മനസ് പ്രിയ കീഴടക്കിയത്. പയ്യന്‍സിനെ നോക്കിയുള്ള പ്രിയയുടെ കണ്ണിറുക്കല്‍ അയല്‍ രാജ്യങ്ങളിലും വാര്‍ത്തയായിരുന്നു. പാക്കിസ്ഥാനി എന്റര്‍ടെയ്നേഴ്സ് എന്ന ഫേസ്ബുക്ക്പേജ്‌ പ്രിയയെ ഏറ്റെടുത്തിരുന്നു. അവള്‍ നിങ്ങളുടെ ഹൃദയത്തെ അലിയിച്ചുകളയും എന്നാണ് ഇവര്‍ പ്രിയയെ പരിചയപ്പെടുത്തുന്നത്. തെലുങ്ക് സൂപ്പർ താരം അല്ലു അർജുനും ഈ ഗാനത്തെ അഭിനന്ദിച്ച് ട്വീറ്റ് ചെയ്തിരുന്നു. ഈയടുത്ത് താന്‍ കണ്ട ഏറ്റവും ക്യൂട്ടായ വിഡിയോയാണിതെന്നും ലാളിത്യമാണ് ഇതിന്റെ ശക്തിയെന്നുമാണ് അല്ലു ട്വീറ്റ് ചെയ്തത്. മലയാളി മങ്ക ഐശ്വര്യ റായി പട്ടം സ്വന്തമാക്കിയ നടിയാണ് പ്രിയ പ്രകാശ് വാര്യര്‍. അന്നേ തനിക്കൊരു നടിയാകണം എന്ന ആഗ്രഹം പ്രിയ പ്രകടിപ്പിച്ചിരുന്നു.

ബോംബെയിലായിരുന്നു പ്രിയ. കുടുംബം തൃശ്ശൂരില്‍ സ്ഥിരതാമസമാക്കിയതോടെ പ്രിയയും തൃശ്ശൂര്‍ക്കാരിയായി. തൃശ്ശൂര്‍ വിമല കോളേജിലാണ് പ്രിയ പഠിച്ചത്. ചെറുപ്പം മുതലേ പ്രിയയുടെ ആഗ്രഹം ഒരു സിനിമാ നടി ആകണം എന്നായിരുന്നു. സംഗീതത്തിലും പ്രിയയ്ക്ക് വലിയ താത്പര്യമുണ്ട്. തനിക്ക് വരുന്ന എല്ലാ അവസരങ്ങളെയും നല്ല രീതിയില്‍ ഉപയോഗിക്കാൻ പ്രിയ ശ്രമിച്ചിരുന്നു. ജീവിതത്തിൽ അച്ഛനും അമ്മയുമല്ലാതെ തന്നെ ഏറ്റവും സ്വാധീനിച്ച വ്യക്തി പൗലോ കൊയ്‌ലോ ആണെന്നും പ്രിയ പറയുന്നു. നിങ്ങള്‍ക്കൊരു ആഗ്രഹമുണ്ടെങ്കില്‍, അത് ദൃഢമാണെങ്കില്‍ നേടിയെടുക്കാന്‍ ലോകം മൊത്തം നിങ്ങളെ സഹായിക്കും എന്ന അദ്ദേഹത്തിന്റെ വാക്കാണ് ഏറ്റവുമധികം സ്വാധീനിച്ചത്.

ഹ്രസ്വ ചിത്രങ്ങളില്‍ അഭിനയിച്ചുകൊണ്ടാണ് പ്രിയ അഭിനയ രംഗത്തെത്തിയത്. കടലാസു തോണി എന്ന ഹ്രസ്വ ചിത്രം ശ്രദ്ധേയമായിരുന്നു. പ്രേമത്തിലെ മലര്‍മിസ്സിന് ശേഷം വൈറലാകുന്ന പുതുമുഖ നടിയാണ് പ്രിയ പ്രകാശ് വാര്യര്‍. ഒരു അഡാര്‍ ലവിൽ ജൂനിയര്‍ ആര്‍ട്ടിസ്റ്റുകളായി എത്തിയതാണ് പ്രിയ ഉള്‍പ്പെടെയുള്ള താരങ്ങൾ. ചില രംഗങ്ങള്‍ ഷൂട്ട് ചെയ്ത് കണ്ടപ്പോള്‍ അവരെ ജൂനിയര്‍ ആര്‍ട്ടിസ്റ്റുകള്‍ ആക്കി ഒതുക്കാന്‍ കഴിയില്ലെന്ന് ഒമറിനു തന്നെ തോന്നി. അത്രയ്ക്കു മനോഹരമായിരുന്നു എല്ലാവരുടേയും അഭിനയം.