വീരമൃത്യു വരിച്ച ജവാന്മാരെ വര്‍ഗീയവത്കരിക്കാന്‍ ഞങ്ങള്‍ ശ്രമിച്ചിട്ടില്ലെന്നും അങ്ങനെ പറയുന്നവര്‍ക്ക് സൈന്യത്തെ ശരിക്കും മനസ്സിലായിട്ടില്ലെന്നും ഉത്തര സൈനിക കമാന്‍ഡര്‍ ലെഫ്റ്റനന്റ് ജനറല്‍ ദേവ്രാജ് അന്‍മ്ബു. യുവാക്കള്‍ തീവ്രവാദത്തിലേക്ക് ആകൃഷ്ടരാകുന്നുണ്ട്. തീവ്രവാദം വളരുന്നതില്‍ സാമൂഹ്യമാധ്യമങ്ങള്‍ കാരണമാകുന്നുണ്ടെന്നും ഇത് ഗൗരവമായി പരിഗണിക്കപ്പെടേണ്ട വിഷയമാണെന്നും അദ്ദേഹം പറഞ്ഞു.

സുജ്വാന്‍ ഭീകരാക്രമണത്തില്‍ കൊല്ലപ്പെട്ട സൈനികരില്‍ അഞ്ചുപേര്‍ കശ്മീര്‍ മുസ്ലീമുകളാണെന്ന് ഓള്‍ ഇന്ത്യ മജ്ലിസെ ഇത്തിഹാദുല്‍ മുസ്ലിമീന്‍ (എഐഎംഐഎം) പ്രസിഡന്റ് അസദുദ്ദീന്‍ ഒവൈസി കഴിഞ്ഞ ദിവസം പറഞ്ഞിരുന്നു. കശ്മീരില്‍ തുടര്‍ച്ചയായുണ്ടാകുന്ന ആക്രമണങ്ങളില്‍ ബിജെപി-പിഡിപി സര്‍ക്കാരുകളെ വിമര്‍ശിച്ചുകൊണ്ട് സംസാരിക്കവെയായിരുന്നു ഒവൈസിയുടെ വിവാദ പരാമർശം.