മദ്യലഹരിയിൽ കുരങ്ങൻ ആറാടി. കുരങ്ങനെ വശത്താക്കാൻ ആളുകൾ പല അടവുകളും പയറ്റി. ആളുകൾ പഴവും പാനീയവുമൊക്കെ എറിഞ്ഞുകൊത്തു. എന്നിട്ടും രക്ഷയില്ല. ബംഗളുരുവിലെ ബനസ്വാഡി കമാനഹള്ളിയിലുള്ള ബാറിലാണു കുരങ്ങന്റെ വികൃതികൾ അരങ്ങേറിയത്. ഇവിടുത്തെ ദിവാകര്‍ ബാറിലെ പതിവു സന്ദര്‍ശകനായിരുന്നു കുരങ്ങ്. മദ്യ ഗ്ലാസുകളില്‍നിന്നു മുത്തിക്കുടിക്കുന്നത് അവനു ശീലമായിരുന്നു. എന്നാൽ ഇന്നലത്തെ മദ്യപാനം ഒരൽപം കൂടിപ്പോയി.

തനിയെ കുടിച്ചതാണോ അതോ, ആരെങ്കിലും മദ്യം നല്‍കിയതാണോയെന്നു വ്യക്തമല്ല. കുരങ്ങന്‍ ഫിറ്റായതോടെ കാര്യങ്ങൾ കുഴഞ്ഞുമറിഞ്ഞു. ആളുകളെ നിലത്തുനിര്‍ത്തിയില്ല. എല്ലാവരെയും ഓടിച്ചു. ഇതിനിടെയാണു മൃഗസ്നേഹികളായ ചിലര്‍ പഴങ്ങള്‍ വിതറി ഒരുകൈ നോക്കിയത്. പക്ഷേ, ആ ശ്രമവും നടന്നില്ല. കുരങ്ങന്‍ അവശനാകുന്നതുവരെ ബാറില്‍ ഓട്ടത്തോട് ഓട്ടമായിരുന്നു.