രജനികാന്തും കമല്‍ഹാസനും രാഷ്ട്രീയത്തില്‍ ഇരിപ്പിടം നേടാന്‍ ഒരുപോലെ മത്സരിക്കുകയാണ്. രജനി രാഷ്ട്രീയ പ്രവേശം പ്രഖ്യാപിച്ചുകഴിഞ്ഞു. രാഷ്ട്രീയത്തിലിറങ്ങുന്നതോടെ അഭിനയത്തോട് വിടപറയുകയാണെന്ന് കമലും പ്രഖ്യാപിച്ചു. തമിഴകത്തെ രാഷ്ട്രീയാന്തരീക്ഷം തിളച്ചുമറിയുന്നതിനിടെ കമല്‍ഹാസന്‍ രജനിയെ സന്ദര്‍ശിച്ചു. രജനിയുടെ രാഷ്ട്രീയ പാര്‍ട്ടി പ്രഖ്യാപനത്തിനുശേഷം ഇതാദ്യമായാണ് കമല്‍ രജനിയെ സന്ദര്‍ശിക്കുന്നത്.

പോയ്സ് ഗാര്‍ഡനിലെ രജനിയുടെ വീട്ടിലെത്തിയാണ് കമല്‍ സന്ദര്‍ശിച്ചത്.പാര്‍ട്ടി പ്രഖ്യാപനച്ചടങ്ങിലേയ്ക്ക് ക്ഷണിക്കാനാണ് കമല്‍ എത്തിയതെന്ന് രജനി മാധ്യമപ്രവര്‍ത്തരോട് പറഞ്ഞു. ഇക്കാര്യം കമലും പിന്നീട് സ്ഥിരീകരിച്ചു. ഫെബ്രുവരി ഇരുപത്തിയൊന്നിനാണ് കമല്‍ തന്റെ രാഷ്ട്രീയ പാര്‍ട്ടി പ്രഖ്യാപിക്കുന്നത്. എന്റെ ശൈലി കമലിന്റേതില്‍ നിന്ന് ഏറെ വ്യത്യസ്തമാണ്. എന്നാല്‍, രണ്ടുപേരുടേതും ഒരൊറ്റ ലക്ഷ്യമാണ്. അത് പാവപ്പെട്ട ജനങ്ങളെ സേവിക്കുക എന്നതാണ്-രജനി പറഞ്ഞു.

രജനിയുടെ രാഷ്ട്രീയ നിറം കാവിയാണെങ്കില്‍ അദ്ദേഹവുമായി യാതൊരുവിധ സഖ്യവുമുണ്ടാക്കില്ലെന്ന് പറഞ്ഞ് ദിവസങ്ങള്‍ക്കുള്ളിലാണ് കമല്‍ സ്റ്റൈല്‍ മന്നനെ സന്ദര്‍ശിച്ചത്. പ്രധാനമന്ത്രി നരേന്ദ്ര മോദിയുമായി ഏറെ അടുപ്പം പുലര്‍ത്തുന്ന രജനി ബി.ജെ.പിയുമായി ധാരണയുണ്ടാക്കുമെന്ന് കണക്കുകൂട്ടലിലായിരുന്നു രജനിയുടെ അഭിപ്രായപ്രകടനം. രാജനിയുടെ രാഷ്ട്രീയത്തില്‍ കാവിയുടെ സ്വാധീനമുണ്ട്. അത് മാറാത്തിടത്തോളം കാലം അദ്ദേഹവുമായി യാതൊരുവിധ സഖ്യവുമുണ്ടാക്കില്ല എന്നായിരുന്നു ഒരു വെബ്സൈറ്റിന് നല്‍കിയ അഭിമുഖത്തില്‍ ഇയ്യിടെ കമല്‍ പറഞ്ഞത്.

ഡെല്‍ഹി മുഖ്യമന്ത്രി അരവിന്ദ് കെജ്രിവാളുമായി ചര്‍ച്ച നടത്തിയിരുന്നുവെന്നും ആം ആദ്മി പാര്‍ട്ടിക്ക് തന്റെ പുതിയ പാര്‍ട്ടിയുമായി സഖ്യമുണ്ടാക്കാന്‍ താത്പര്യമുണ്ടെന്ന് അദ്ദേഹം അറിയിച്ചിട്ടുണ്ടെന്നും കമല്‍ പറഞ്ഞിരുന്നു.