പിഎന്‍ബി തട്ടിപ്പുകേസിലെ പൊതു താത്പര്യ ഹര്‍ജി ഇന്ന് പരിഗണനയില്‍
കോടികളുടെ പി.എന്‍.ബി തട്ടിപ്പുകേസില്‍ പ്രത്യേക അന്വേഷണ സംഘം രൂപവത്കരിക്കണമെന്നും കുറ്റാരോപിതനായ നീരവ് മോദിയെ തിരിച്ച് ഇന്ത്യയില്‍ എത്തിക്കണമെന്നും ആവശ്യപ്പെട്ട് നല്‍കിയ പൊതുതാല്‍പര്യ ഹരജിയില്‍ സുപ്രീംകോടതി ബുധനാഴ്ച വാദം കേള്‍ക്കും. അഭിഭാഷകനായ വിനീത് ധണ്ഡയാണ് ഹരജി സമര്‍പ്പിച്ചത്. ചീഫ് ജസ്റ്റിസ് ദീപക് മിശ്ര, ജസ്റ്റിസുമാരായ എ.എം. ഖാന്‍വില്‍കര്‍, ഡി.വൈ. ചന്ദ്രചൂഡ് എന്നിവരടങ്ങിയ ബെഞ്ചാണ് ഹരജിക്ക് അടിയന്തര പ്രാധാന്യം നല്‍കിയത്.
പഞ്ചാബ് നാഷനല്‍ ബാങ്കിനു പുറമെ, റിസര്‍വ് ബാങ്ക് ഓഫ് ഇന്ത്യ, ധന, നിയമ മന്ത്രാലയങ്ങള്‍ എന്നിവക്കെതിരെയാണ് വിനീതിന്റെ ഹരജി. വലിയ തുക വായ്പ നല്‍കുമ്പോള്‍ പാലിക്കേണ്ട കാര്യങ്ങളില്‍ ധനമന്ത്രാലയം മാര്‍ഗനിര്‍ദേശങ്ങള്‍ പുറപ്പെടുവിക്കുക, രാജ്യത്തെ കിട്ടാക്കടം സംബന്ധിച്ച കേസുകള്‍ കൈകാര്യം ചെയ്യാന്‍ വിദഗ്ധ സമിതി രൂപവത്കരിക്കുക തുടങ്ങിയ ആവശ്യങ്ങളും ഹരജിയിലുണ്ട്. അഭിഭാഷകനായ എം.എല്‍. ശര്‍മ സമര്‍പ്പിച്ച മറ്റൊരു ഹര്‍ജിയില്‍ പ്രത്യേക അന്വേഷണ സംഘം രൂപവത്കരിക്കുമ്പോള്‍ അതില്‍ റിട്ട. ജഡ്ജിമാര്‍ ഉണ്ടാകണമെന്ന് ആവശ്യപ്പെട്ടു.
https://www.facebook.com/Malayalivartha
