ഒറ്റപ്പെട്ട ആ തുരുത്തില്‍ മരണവെപ്രാളത്താല്‍ പിടഞ്ഞ ഒരമ്മയ്ക്ക് മുന്നില്‍ രക്ഷകനായി എത്തുകയായിരുന്നു ഡോക്ടര്‍ മുഹമ്മദ് വാഖിദ്. ഡോക്ടറുടെ സാഹസികത വിവരിക്കുന്ന ഫെയ്‌സ്ബുക്ക് പോസ്റ്റ് ഇപ്പോള്‍ വൈറലായിരിക്കുകയാണ്. കഴിഞ്ഞ 19ാനായിരുന്നു സംഭവം. ലക്ഷദ്വീപിലെ കില്‍ത്താന്‍ ദ്വീപില്‍ ഒരു ഗര്‍ഭിണി പ്രസവിച്ചു പക്ഷെ രക്തം വാര്‍ന്നു പോയ്‌കൊണ്ടിരിക്കുന്നു. മറുപിള്ള പുറത്തു വരാത്തതിനാല്‍ രക്തം വാര്‍ന്ന് ഹീമോ ഗ്ലോബിന്‍ ചുരുങ്ങി കൊണ്ടിരിക്കുന്നു.

കൂടുതല്‍ സൗകര്യങ്ങളുള്ള ഒരിടത്തേക്ക് എത്തിക്കുകയല്ലാതെ ഒരു വഴിയുമില്ല. സമയം രാത്രിയോടടുത്തതിനാല്‍ ദ്വീപില്‍ ഹെലികോപ്ടര്‍ ഇറങ്ങില്ല.ഡോക്ടര്‍ വാഖിദായിരുന്നു ഈ സമയം ഡ്യൂട്ടിയിലുണ്ടായിരുന്നത്. അവിടെയുണ്ടായിരുന്നു മെഡിക്കല്‍ സംഘത്തിലെ എല്ലാവരും കിണഞ്ഞു ശ്രമിച്ചു. അവസാനം ഡോക്ടര്‍ വാഖിദ് ഒരു തീരുമാനമെടുത്തു. പ്രതിസന്ധികളെ അതിജീവിച്ച് കൂടുതല്‍ സൗകര്യങ്ങളുള്ള അഗത്തി ദ്വീപില്‍ എത്തിക്കുക.

പിന്നെയെല്ലാം സിനിമാ കഥകളെ വെല്ലുംവിധമായിരുന്നു. യുവതിക്ക് പഴയ രീതിയില്‍ രക്തം നേരിട്ട് കൊടുത്തു കൊണ്ട് വാഖിദിന്റെ നേതൃത്വത്തിലുള്ള സംഘം ആ അമ്മയേയം കൊണ്ട് സ്പീഡ് ബോട്ടില്‍ കാറ്റിനെയും കടലിനെയും വെല്ലു വിളിച്ചു അഗത്തി ദ്വീപിലേക്ക് തിരിച്ചു. തക്ക സമയത്തുള്ള ഡോക്ടര്‍ വാഖിദിന്റെയും സംഘത്തിന്റെയും ഇടപെടലില്‍ ഇപ്പോള്‍ ആ അമ്മയും കുഞ്ഞും സുഖമായിരിക്കുന്നു. സുഹൃത്തും ഡോക്ടറുമായ അനസ് സാലിഹാണ് ഇക്കാര്യം ഫെയ്‌സ്ബുക്കിലൂടെ പങ്കുവെച്ചത്.