സുപ്രീംകോടതിയില്‍ ജഡ്ജിമാര്‍ക്കിടയിലെ ഭിന്നതകള്‍ തുടരവേ ബെഞ്ചുകള്‍ തമ്മില്‍ പഴയ ഉത്തരവിന്റെ പേരില്‍ വീണ്ടും ഏറ്റുമുട്ടല്‍
സുപ്രീംകോടതിയില്‍ ജഡ്ജിമാര്‍ക്കിടയിലെ ഭിന്നതകള്‍ തുടരവേ ബെഞ്ചുകള്‍ തമ്മില്‍ പഴയ ഉത്തരവിന്റെ പേരില്‍ ഏറ്റുമുട്ടി. ചീഫ് ജസ്റ്റിസിനെതിരെ പരസ്യമായി പ്രതികരിച്ച നാല് ജഡ്ജിമാരില്‍ മദന്‍ ബി.ലോക്കൂറും കുര്യന്‍ ജോസഫും ഉള്‍പ്പെട്ട മൂന്നംഗ ബെഞ്ച് 2014ല്‍ പുറപ്പെടുവിച്ച ഉത്തരവ് അലക്ഷ്യമായ നീതിനിര്‍വഹണമാണെന്ന് ജസ്റ്റിസ് അരുണ്‍ മിശ്ര ഉള്‍പ്പെട്ട ബെഞ്ച് ഈ മാസം എട്ടിന് മറ്റൊരു വിധിയില്‍ നിരീക്ഷിച്ചതാണ് പുതിയ വിവാദം.സി.ബി.ഐ ജഡ്ജി ലോയയുടെ മരണത്തില്‍ അന്വേഷണം ആവശ്യപ്പെട്ടുള്ള ഹര്‍ജികള്‍ അരുണ്‍ മിശ്രയുടെ ബെഞ്ചിന് വിട്ടതായിരുന്നു നാല് ജഡ്ജിമാരെ പ്രകോപിപ്പിച്ച ഒരു കാരണം. ഇന്‍ഡോര്‍ ഡെവലപ്‌മെന്റ് അതോറിറ്റി കേസിലാണ് ജസ്റ്റിസ്മാരായ എ.കെ.ഗോയല്‍, അരുണ്‍ മിശ്ര, ശന്തന ഗൗഡര്‍ എന്നിവരുള്‍പ്പെട്ട ബെഞ്ച് 2014ലെ ഉത്തരവിനെ രൂക്ഷമായി വിമര്‍ശിച്ചതും മറികടന്നതും
കഴിഞ്ഞ ദിവസം ഭൂമി ഏറ്റെടുക്കല്‍ കേസുകളില്‍ പഞ്ചാബ്, ഹരിയാന ഹൈക്കോടതികളുടെ ഉത്തരവുകള്‍ പരിശോധിച്ച ജസ്റ്റിസുമാരായ മദന്‍ ബി.ലോക്കൂര്‍, കുര്യന്‍ ജോസഫ്, ദീപക് ഗുപ്ത എന്നിവരടങ്ങിയ ബെഞ്ചില്‍ മുതിര്‍ന്ന അഭിഭാഷകന്‍ മുകുള്‍ റോഹ്തഗി ഈ വിഷയം ശ്രദ്ധയില്‍പ്പെടുത്തി. ഒരു മൂന്നംഗ ബെഞ്ചിന്റെ ഉത്തരവ് മറ്റൊരു മൂന്നംഗ ബെഞ്ച് റദ്ദാക്കുന്നത് എങ്ങനെയെന്നും അദ്ദേഹം സംശയം പ്രകടിപ്പിച്ചു. ഒരു മൂന്നംഗ ബെഞ്ചിന്റെ ഉത്തരവില്‍ മറ്റൊരു മൂന്നംഗ ബെഞ്ചിന് വിയോജിപ്പുണ്ടെങ്കില്‍ വിശാല ബെഞ്ചിന് വിടുകയാണ് കീഴ്‌വഴക്കം. ഇവിടെ അത് സംഭവിച്ചില്ലെന്നും റോഹ്തഗി ചൂണ്ടിക്കാട്ടി
ഇതോടെ, ജസ്റ്റിസ് ലോക്കൂറിന്റെ ബെഞ്ച് ജസ്റ്റിസ് അരുണ്‍ മിശ്രയുടെ വിവാദ ഉത്തരവ് മരവിപ്പിച്ചു. ഇത്തരം നടപടികള്‍ കണ്ടിരിക്കാനാവില്ലെന്ന് ജസ്റ്റിസ് കുര്യന്‍ ജോസഫ് തുറന്നടിച്ചു. തുടര്‍ന്ന് വിശാല ബെഞ്ചിന് വിടണോയെന്ന തീരുമാനിക്കുന്നത് വരെ ഹൈക്കോടതികളും സുപ്രീംകോടതിയിലെ മറ്റ് ബെഞ്ചുകളും ഈ വിഷയത്തില്‍ ഉത്തരവുകള്‍ പുറപ്പെടുവിക്കരുതെന്ന് ജസ്റ്റിസ് ലോക്കൂറിന്റെ ബെഞ്ച് ഉത്തരവിട്ടു. അതിന് പിന്നാലെ ഇന്നലെ ജസ്റ്റിസുമാരായ എ.കെ.ഗോയലിന്റെയും അരുണ്‍ മിശ്രയുടെയും ബെഞ്ചുകള്‍ ഭൂമി ഏറ്റെടുക്കല്‍ കേസുകള്‍ ചീഫ് ജസ്റ്റിസിന് തിരിച്ചയച്ചു. ഇതോടെ കേസുകളുടെ കാര്യത്തില്‍ തുറന്ന കോടതിയില്‍ ജഡ്ജിമാര്‍ വീണ്ടും ഏറ്റുമുട്ടുന്ന സാഹചര്യമാണ് വന്നിരിക്കുന്നത്.
https://www.facebook.com/Malayalivartha
