അന്തരിച്ച ബോളിവുഡ് താരം ശ്രീദേവിയുടെ മൃതദേഹം ഇന്ന് ഇന്ത്യയിലെത്തിക്കും. താമസിച്ചിരുന്ന ദുബായിലെ എമിറേറ്റ്സ് ടവര്‍ ഹോട്ടലിലിലെ മുറിയില്‍ ശ്രീദേവി കുഴഞ്ഞുവീഴുകയായിരുന്നെന്നു റിപ്പോര്‍ട്ടുണ്ട്. ഇതേതുടര്‍ന്ന് റാഷിദ് ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ലെന്നും ഔദ്യോഗിക സ്ഥിരീകരണമല്ലാത്ത റിപ്പോര്‍ട്ടില്‍ പറയുന്നുണ്ട്. ശ്രീദേവിക്ക് ഹൃദയസംബന്ധമായ അസുഖങ്ങള്‍ ഉണ്ടായിരുന്നതായി അറിവില്ലെന്നാണ് ഭര്‍ത്താവിന്റെ സഹോദരനും ബോളിവുഡ് നടനുമായ സഞ്ജയ് കപൂര്‍ പറയുന്നത്. യു എ ഇയിലെ റാസല്‍ഖൈമയില്‍ വച്ച്‌ ശനിയാഴ്ച രാത്രി 11.30 യോടെ ആയിരുന്നു ശ്രീദേവിയുടെ മരണം.

അഭിനയ മികവും സൗന്ദര്യം കൊണ്ടും ഇന്ത്യന്‍ സിനിമയെ അത്ഭുതപ്പെടുത്തിയ അപൂര്‍വം നടിമാരേയുള്ളു. അതില്‍ എന്നും ഒന്നാമത്തെയാള്‍ ശ്രീദേവിയാണ്. കഴിഞ്ഞ വര്‍ഷം 54ആം പിറന്നാള്‍ ആഘോഷിക്കുന്‌പോഴും ശ്രീദേവിയെ കാത്ത് സമീപകാലത്ത് ഇത്തരമൊരു ദുര്‍വിധി ഉണ്ടെന്ന് ആരും കരുതിയിരുന്നില്ല. ശ്രീദേവിയുടെ വിയോഗത്തോടെ ഇന്ത്യന്‍ സിനിമയിലെ തന്നെ ഒരു യുഗത്തിന് തന്നെ അന്ത്യമാവുകയാണ്. 1976ല്‍ നായികയായി അരങ്ങേറിയ ശ്രീദേവി ഹിന്ദി, മലയാളം തമിഴ്, തെലുങ്ക്, കന്നഡ ഭാഷകളിലായി മുന്നൂറോളം സിനിമകളില്‍ അഭിനയിച്ചു കഴിഞ്ഞു. ഇന്ത്യന്‍ സിനിമയിലെ ഖാന്‍ ത്രയങ്ങളായ ഷാരൂഖ് ഖാന്‍, ആമിര്‍ ഖാന്‍, സല്‍മാന്‍ ഖാന്‍ എന്നിവര്‍ ആകെ ഇതുവരെ 200 മുതല്‍ 250 സിനിമകളിലേ അഭിനയിച്ചിട്ടുള്ളൂ എന്ന സത്യം അംഗീകരിക്കുമ്പോഴാണ് ശ്രീദേവിയുടെ സ്ഥാനം എന്താണെന്ന് മനസിലാവുക.

1963 ആഗസറ്റ് 13ന് തമിഴ്‌നാട്ടിലെ ശിവകാശിയില്‍ വക്കീലായ അയ്യപ്പന്റെയും രാജേശ്വരിയുടെയും മകളായാണ് ശ്രീ അമ്മയങ്കാര്‍ അയ്യപ്പന്‍ എന്ന ശ്രീദേവി ജനിച്ചത്. 1967ല്‍ റിലീസ് ചെയ്ത കന്തന്‍ കരുണൈയില്‍ മുരുകന്റെ കുട്ടിക്കാലം അഭിനയിച്ചു കൊണ്ട് തുടക്കം. നാലു വയസുള്ള കുട്ടി ശ്രീദേവിയുടെ അഭിനയം ഏറെ പ്രശംസ നേടിയിരുന്നു. എ.പി.നാഗരാജന്‍ സംവിധാനം ചെയ്ത ചിത്രത്തില്‍ ശിവാജി ഗണേശന്‍, ജെമിനി ഗണേശന്‍, സാവിത്രി തുടങ്ങിയ വന്‍ താര നിരതന്നെ ചിത്രത്തിലുണ്ടായിരുന്നു. 1969ല്‍ പി. സുബ്രഹ്മണ്യത്തിന്റെ കുമാരസംഭവത്തിലൂടെയാണ് ശ്രീദേവി മലയാള സിനിമയില്‍ ചുവടുവച്ചത്. 1970ല്‍നന്ന നിര്‍ദോഷിയിലൂടെ തെലുങ്കിലും 1974ല്‍ 'ഭക്ത കുമ്പര'യിലൂടെ കന്നഡയിലും 1975ല്‍ ജൂലിഎന്ന സിനിമയിലൂടെ ഹിന്ദിയിലും അരങ്ങേറി. 1976ല്‍ കെ. ബാലചന്ദറിന്റെ മൂണ്‍ട്രു മുടിച്ച് എന്ന ചിത്രത്തിലൂടെ നായികയായി. കമലഹാസനും രജനീകാന്തുമായിരുന്നു ചിത്രത്തിലെ നായകന്മാര്‍. തുടര്‍ന്നു വന്ന പതിനാറു വയതിനിലെ മൂന്‍ട്രാം പിറൈ തുടങ്ങിയവ ശ്രീദേവിയെ മുന്‍നിര നായികാ പദവിയിലേക്ക് ഉയര്‍ത്തി. കമലഹാസന്‍ ശ്രീദേവി ജോഡി നിരവധി ഹിറ്റുകള്‍ സമ്മാനിച്ചു. സമാനമായി മലയാളത്തിലും തെലുങ്കിലും ശ്രീദേവി അഭിനയിച്ചിരുന്നു

തെന്നിന്ത്യയില്‍ താരറാണിയായി തിളങ്ങവേ 1979ല്‍ ബോളിവുഡില്‍ സൊല്‍വാ സാവനി'ലൂടെ ബോളിവുഡിലെത്തി. തൊട്ടടുത്ത വര്‍ഷം ജിതേന്ദ്രയുടെ നായികയായി പുറത്തിറങ്ങിയ ഹിമ്മത്&്വംിഷ;വാല' സൂപ്പര്‍ ഹിറ്റായി. തുടര്‍ന്ന് മി. ഇന്ത്യ, ചാന്ദിനി തുടങ്ങിയ ചിത്രങ്ങളിലൂടെ താരറാണിയായി ഉയര്‍ന്നു. വിവാഹത്തെ തുടര്‍ന്ന് ഏഴു വര്‍ഷത്തെ ഇടവേളയെടുത്ത ശ്രീദേവി ഇടയ്ക്ക് ചില സിനിമകളില്‍ അഭിനയിച്ചെങ്കിലും ശക്തമായ തിരിച്ചുവരവ്

നടത്തിയത് 2012ല്‍ ഇംഗ്ലിഷ് വിംഗ്ലിഷിലൂടെയാണ്. രവി ഉദയവാര്‍ സംവിധാനം ചെയ്യുന്ന മോമില്‍ അമ്മ മകള്‍ ബന്ധത്തെക്കുറിച്ചാണ് പറയുന്നത്. രണ്ട് പെണ്‍മക്കളുടെ അമ്മയായ തനിക്ക് ഈ കഥാപാത്രം വളരെ ആഴത്തില്‍ ഉള്‍ക്കൊള്ളാന്‍ കഴിഞ്ഞുവെന്നാണ് താരം പറഞ്ഞത്. 2015ല്‍ വിജയ് നായകനായ 'പുലി' എന്ന സിനിമയിലൂടെ ശ്രീദേവി തമിഴകത്ത് മടങ്ങിയെത്തി. ചിത്രം ബോക്സോഫീസില്‍ പരാജയപ്പെട്ടെങ്കിലും ശ്രീദേവിയുടെ യവനറാണി എന്ന രാജ്ഞിയുടെ വേഷം ഏറെ ശ്രദ്ധിക്കപ്പെട്ടു. ഈ വര്‍ഷം പുറത്തിറങ്ങിയ 'മോം' എന്ന സിനിമയിലാണ് ശ്രീദേവി ഏറ്റവും ഒടുവില്‍ അഭിനയിച്ചത്.

ഇതിനിടെ ബാഹുബലി 2എന്ന ബ്രഹ്മാണ്ഡ ചിത്രത്തിലെ വേഷത്തെ ചൊല്ലി സംവിധായകന്‍ രാജമൗലിയും ശ്രീദേവിയും തമ്മില്‍ കൊന്പുകോര്‍ക്കുകയും ചെയ്തത് നടിയെ വീണ്ടും ചര്‍ച്ചാ കേന്ദ്രമാക്കി. ചിത്രത്തില്‍ രമ്യാ കൃഷ്&്വംിഷ;ണന്‍ ചെയ്ത ശിവകാമി എന്ന കഥാപാത്രത്തിനായി ആദ്യം സമീപിച്ചത് ശ്രീദേവിയെ ആയിരുന്നു. ശ്രീദേവി മുന്നോട്ട് വച്ച ആവശ്യങ്ങള്‍ അംഗീകരിക്കാന്‍ കഴിയാതെ വന്നതിനാലാണ് താരത്തെ ഒഴിവാക്കിയതെന്ന് രാജമൗലി പരസ്യമായി പറഞ്ഞതാണ് വിവാദത്തിന് തിരി കൊളുത്തിയത്. ആദ്യം മൗനം പാലിച്ച ശ്രീദേവി പിന്നീട് മറുപടിയുമായി എത്തി. രാജമൗലിയെ പോലൊരു സംവിധായകന്‍ ഇങ്ങനെ പറയരുതായിരുന്നു. രാജമൗലി അന്തസുള്ള വ്യക്തിയാണെന്നാണ് താന്‍ കേട്ടിട്ടുള്ളതെന്നും അദ്ദേഹത്തിന്റെ വാക്കുകള്‍ തന്നെ വേദനിപ്പിച്ചെന്നും ശ്രീദേവി പറഞ്ഞിരുന്നു. പിന്നാലെ രാജമൗലി ഖേദം പ്രകടിപ്പിച്ച് വിവാദങ്ങള്‍ക്ക് അന്ത്യം കുറിക്കുകയായിരുന്നു.