പ്രധാനമന്ത്രി നരേന്ദ്ര മോദിയുടെ വിദേശയാത്രകള്‍ക്കായി എയര്‍ ഇന്ത്യക്ക് എത്ര രൂപ ചെലവായെന്നത് സംബന്ധിച്ച വിവരങ്ങള്‍ നല്‍കാന്‍ വിദേശകാര്യ മന്ത്രാലയത്തിന് കേന്ദ്ര വിവരാവകാശ കമ്മിഷന്‍ നിര്‍ദേശം. പ്രധാനമന്ത്രി വിദേശ യാത്രകൾക്ക് ചെലവഴിച്ച തുക വെളിപ്പെടുത്തണമെന്ന് ആവശ്യപ്പെട്ട് ലോകേഷ് ബത്ര എന്ന മുന്‍ നാവികസേന ഉദ്യോഗസ്ഥനാണ് വിവരാവകാശ നിയമപ്രകാരം അപേക്ഷ നല്‍കിയത്.

2014 മുതല്‍ 2017 വരെയുള്ള കാലയളവിലെ പ്രധാനമന്ത്രി മോദിയുടെ വിദേശയാത്ര തുകയുടെ ബില്ല്​ സംബന്ധിച്ച കൂടുതല്‍ വിവരങ്ങള്‍ നല്‍കാനാണ് വിവരാവകാശ കമ്മീഷണറുടെ നിര്‍ദേശം. വിവരങ്ങള്‍ നല്‍കുന്നതിന് പ്രായോഗിക ബുദ്ധിമുട്ടുണ്ടെന്ന വിദേശകാര്യ മന്ത്രാലയത്തിന്റെ നിലപാട് വിവരാവകാശ കമ്മിഷന്‍ തള്ളി.

പ്രധാനമന്ത്രിയുടെ വിദേശ യാത്ര ചെലവിനെ സംബന്ധിച്ച് നല്‍കപ്പെട്ട മറുപടി അപൂര്‍ണവും അവ്യക്തവുമാണന്നതിനാലാണ് ലോകേഷ് ബത്ര മുഖ്യവിവരാവകാശ കമ്മീഷണറെ സമീപിച്ചത്.