ടെലി കമ്മ്യൂണിക്കേഷന്‍ സേവന ദാതാക്കളായ ഭാരതി എയര്‍ടെല്‍ 4ജിയിലേക്ക് മാറുന്ന ഉപഭോക്താക്കള്‍ക്കായി 12 മാസത്തേക്ക് സൗജന്യ ഡാറ്റാ ഓഫര്‍ പ്രഖ്യാപിച്ചു. 9000 രൂപ മൂല്യമുള്ള ഈ ഓഫറിലൂടെ ഉപഭോക്താക്കള്‍ക്ക് 4ജി നെറ്റ്വര്‍ക്ക് ആസ്വദിക്കാം. 

നിലവില്‍ എയര്‍ടെല്‍ നെറ്റ്വര്‍ക്കിലുള്‍പ്പെടാത്ത 4ജി ഹാന്‍ഡ്‌സെറ്റുള്ള ആര്‍ക്കും 12 മാസത്തെ ഈ ഓഫറിലേക്ക് മാറാം. 4ജി ഹാന്‍ഡ്‌സെറ്റിലേക്ക് മാറുന്ന നിലവിലെ എയര്‍ടെല്‍ വരിക്കാര്‍ക്കും ഓഫര്‍ ലഭ്യമാണ്. ഓഫര്‍ ഫെബ്രുവരി 28 വരെ ലഭിക്കും. 

തിരഞ്ഞെടുക്കപ്പെട്ട പ്രീ പെയ്ഡ്, പോസ്റ്റ്‌പെയ്ഡ് വരിക്കാര്‍ക്ക് 2017 ഡിസംബര്‍ 31 വരെ എല്ലാ മാസവും 3 ജി.ബി. ഡാറ്റ സൗജന്യമായി ലഭിക്കും. നിലവിലെ പാക്ക്/പ്ലാന്‍ കൂടാതെയായിരിക്കും ഈ സൗജന്യ ഡാറ്റ നേട്ടം.

ടാറ്റാ ഡോകോമോ, കേരളത്തിലെ പ്രീ പേ വരിക്കാര്‍ക്കായി 148 രൂപയില്‍ തുടങ്ങുന്ന പുതിയ അണ്‍ലിമിറ്റഡ് കോളിങ് പ്ലാനുകള്‍ അവതരിപ്പിച്ചു. വോയ്‌സ് സേവനങ്ങളോടൊപ്പം മിതമായ നിരക്കില്‍ 3ജി ഡാറ്റായും വാഗ്ദാനം ചെയ്യുന്നു.

348 രൂപക്ക് 28 ദിവസത്തെ വാലിഡിറ്റിയോടു കൂടി അണ്‍ലിമിറ്റഡ് എസ്ടിഡി ലോക്കല്‍ കോളുകളും 5ജിബി 3ജി ഡാറ്റായും, 298 രൂപക്ക് അണ്‍ലിമിറ്റഡ് എസ്ടിഡി ലോക്കല്‍ കോളുകളും 2ജിബി 3ജി ഡാറ്റായും, 14 ദിവസത്തെ വാലിഡിറ്റിയോടു കൂടി 148 രൂപക്ക് അണ്‍ലിമിറ്റഡ് എസ്ടിഡി ലോക്കല്‍ കോളുകളും 500 എംബി 3ജി ഡാറ്റായും വരിക്കാര്‍ക്ക് ലഭിക്കുന്നു. ഈ പ്ലാനുകള്‍ക്കു പുറമെ 103 രൂപക്ക് 28 ദിവസത്തെ വാലിഡിറ്റിയോടുകൂടി അണ്‍ലിമിറ്റഡ് ഓണ്‍നെറ്റ് കോളുകളും ലഭ്യമാണെന്ന് ടാറ്റാ ടെലിസര്‍വ്വീസസ് ലിമിറ്റഡ്, കണ്‍സ്യൂമര്‍ ബിസിനസ് യൂണിറ്റ് തലവന്‍ ബാലാജി പ്രകാശ് പറഞ്ഞു.