പുതിയ വിശേഷണം സ്വന്തമാക്കി ചൈനീസ്​ വാഹന നിര്‍മാണ കമ്പനിയായ വുളിംഗ് ഹോങ്​ഗുവാങ്ങിന്റെ 'നാനോ'. ലോകത്തിലെ ഏറ്റവും വിലകുറഞ്ഞ ഇവി കാര്‍ എന്ന്​ വിശേഷണവുമായിട്ടാണ് ഇനി ഈ കാർ തുടരുക . ഈ ഇലക്​ട്രിക്​ കാറിന്​ 300 കിലോമീറ്റര്‍ റേഞ്ചും കമ്പനി വാഗ്​ദാനം ചെയ്യുന്നുണ്ട്.

റിപ്പോര്‍ട്ടുകള്‍ പറയുന്നത് അനുസരിച്ച് 'നാനോ' ഇലട്രിക് കാറിന് മാരുതിയുടെ ഏറ്റവും വിലകുറഞ്ഞ പെട്രോള്‍ കാറായ ആള്‍ട്ടോയേക്കാള്‍ വില കുറവാണ് . നാനോ ഇവി ഏകദേശം 2.30 ലക്ഷം രൂപ വിലയില്‍ വില്‍ക്കാനാണ് കമ്പനിയുടെ പദ്ധതി . ടിയാന്‍ജിന്‍ ഇന്‍റര്‍നാഷണല്‍ ഓട്ടോ ഷോയില്‍ നാനോ ഇവിയെ കമ്പനി അവതരിപ്പിക്കുന്നുണ്ട്.

ചൈനീസ് കാര്‍ നിര്‍മാതാക്കളായ വുളിംഗ് ഹോങ്ഗുവാങ് ഇലക്‌ട്രിക് കാറായ 'മിനി'യുടെ വിജയത്തിന് ശേഷമാണ്​ നാനോ എന്ന പേരില്‍ പുതിയ മോഡല്‍ ഇറക്കിയിരിക്കുന്നത് ​. മിനി 2020ല്‍ ചൈനയില്‍ ഏറ്റവും കൂടുതല്‍ വിറ്റഴിക്കപ്പെടുന്ന രണ്ടാമത്തെ ഇവി കാറായിരുന്നു . ചൈനയിലെ വാഹന നിര്‍മാതാക്കളും ഇന്ത്യയില്‍ വില്‍ക്കുന്ന എംജി മോഡലുകളുടെ ഉടമകളുമായ എസ്​എഐസി ഗ്രൂപ്പിന്റെ ഭാഗമാണ്​ വുളിംഗ്​.

നഗര ഉപയോഗത്തിനായി രൂപകല്‍പ്പന ചെയ്​തതാണ് രണ്ട് സീറ്റുകള്‍ മാത്രമുള്ള നാനോ ഇവി.വാഹനത്തിന്​ കരുത്തുപകരുന്നത് പരമാവധി 85 എന്‍എം ടോര്‍ക്ക് സൃഷ്ടിക്കാന്‍ കഴിയുന്ന 33 പിഎസ് ഇലക്‌ട്രിക് മോട്ടോറാണ്.

2,497 എം.എം നീളവും 1,526 എം.എം വീതിയും 1,616 എം.എം ഉയരവും ഉള്ള ഈ വാഹനത്തിന് ​ 1,600 എം.എം ആണ്​ വീല്‍ബേസ്​. നാല് മീറ്ററില്‍ താഴെ ​ ടേണിങ്​ റേഡിയസേ ഉള്ളൂ. നാനോ ഇവി ടാറ്റയുടെ പെട്രോള്‍ നാനോയുമായി താരതമ്യപ്പെടുത്തുമ്പോള്‍ വലുപ്പത്തില്‍ ചെറുതാണ്.